نور طلبهلرينى رسالۀ نوردن چكمك ايستهينلرڭ دسيسهلرينى بيان ايدوب، اويلهلره نه شكلده جواب ويريلمسى حقّنده استادڭ خلاصهلى بر مكتوبى
﴿بِاسْمِهٖ سُبْحَانَهُ﴾
عزيز، صدّيق قارداشلرم!
غايت أهمّيتلى بر مسئلهيى (بوندن أوّل سزه إجمالاً بيان ايتديگم مسئلهيى) تكرار سزه سويلهمهمه قوّتلى، معنوى بر إخطار آلدم. شويله كه:
پرده آلتندهكى دشمنمز منافقلر، شيمدىيه قدر ياپدقلرى گبى، عدليهيى و سياست و إدارهيى ظاهرى دينسزلگه آلَت ايدوب، بزه هجوملرى عقيم قالديغى؛ و رسالۀِ نورڭ فتوحاتنه منفعتى اولان أسكى پلانلرينى بيراقوب، داها منافقانه و شيطانى ده حيرتده بيراقهجق بر پلان چويردكلرينه دائر بورالرده أمارهلرى گوروندى. او پلانلرڭ أڭ مهمّ بر أساسى؛ خاص، ثباتكار قارداشلريمزى صوغوتمق، فتور ويرمك، ممكن ايسه رسالۀِ نوردن وازگچيرمكدر. بو نقطهده او قدر عجيب يالانلرى و دسيسهلرى إستعمال ايدييورلر كه، إسپارطه و حواليسى، گُل و نور فابريقهسنڭ قهرمان شاكردلرى گبى، چليك و دمير گبى بر ثبات و صداقت و متانت لازم كه طايانهبيلسين. بعض ده دوست صورتنده حلول ايدوب، قورقوتمق ممكنسه، حبّهيى قبّه ايدوب أوهام ويرييورلر. «امان، امان سعيده ياناشمايڭز! حكومت تعقيب ايدييور» دييه ضعيفلرى واز گچيرمگه چاليشييورلر. حتّى بعض گنج طلبهلره، هوساتلرينى تحريك ايچون، بعض گنج قيزلرى مسلّط ايدييورلر. حتّى رسالۀِ نور أركانلرينه قارشى ده، بنم شخصمڭ قصوراتنى، چوروكلگنى گوستروب؛ ظاهرًا ديندار أهلِ بدعهدن بعض شهرتلى ذاتلرى گوستروب؛ «بز ده