خصملرى بولونان بر شخصه يوكلنمز. يوكلنسه، او قصورلى شخص إهانت ضربهلريله دشمنلرى طرفندن صارصيلسه؛ او يوك دوشر، طاغيلير.
رابعًا: أسكى زماندن بَرى چوق ذاتلر، استادينى ويا مرشدينى ويا معلّمنى ويا رئيسنى قيمتِ شخصيهلرندن چوق زياده حسنِ ظن ايتمهلرى، درسندن و إرشادندن إستفادهيه وسيله اولماسى نقطهسنده او پك فضله حسنِ ظنلر بر درجه قبول ايديلمش، خلافِ واقعهدر دييه تنقيد ايديلمزدى. فقط شيمدى، رسالۀِ نور شاكردلرينه لايق بر استاده موافق علوى مرتبه و فضيلتى؛ بيچاره، قصورلى بو شخصمده قبول ايتدكلرى سببيله غيرت و شوقلريله چاليشمهلرى، بو نقطهده حدّمدن زياده حسنِ ظنلرى قبول ايدهبيلير. فقط رسالۀِ نورڭ شخصِ معنويسنڭ مالى اولارق أليمده بولونويور دييه بيلمك گركدر. فقط باشده زنديقلر و أهلِ ضلالت و أهلِ سياست و أهلِ غفلت، حتّى صافىقلب أهلِ ديانت شخصه فضله أهمّيت ويردكلرى جهتنده، حقسزلر او شخصى چوروتمكله حقيقتلره ضربه وورمق و او نورلره، بنم گبى بر بيچارهيى معدن ظن ايدهرك بتون قوّتلريله بنى چوروتوب، او نورلرى سوندورمگه و صافىقلبلرى ده اينانديرمغه چاليشييورلر. أزجمله، ايكنجى مسئلهده بر حادثه بو حقيقتى گوسترييور.
ايكنجى مسئله:
بايرامڭ ايكنجى گوننده، تنفّس ايچون قيرلره چيقديغم زمان، أهمّيتلى بر مأمور طرفندن بش وجهله قانونسز بر تعرّضه معروض قالدم. جنابِ حق رحمت و كرميله، بليمه، باشمه يوكلهنن رسالۀِ نور أجزالرينى و روحمه و قلبمه يوكلهنن شاكردلرينڭ حيثيت و عزّت و راحتلرينى محافظه ايچون، فوق العاده بر تحمّل و صبر إحسان أيلدى. يوقسه بر پلان نتيجهسنده بنى حدّته گتيروب رسالۀ نورڭ، باخصوص « آيت الكبرا»نڭ فتوحاتنه قارشى بر پرده چكمك اولديغى تحقّق ايتدى. صاقين، صاقين هيچ كدرلنمهيڭز، مراق ايتمهيڭز، هم