تكمّل ايدهجكدر. هيچ ممكن ميدر كه؛ سينك قنادينڭ ايجادندن لاقيد قالميان و او قنادڭ ذرّهلرنده پك چوق حكمت و مصلحتلرى تعقيب ايدن صانعِ ذو الجلال، رسالۀِ نور ايله اونڭ تأليف ايديلديگى منزللرله و نور مؤلّفنڭ قدسى وظيفهلرينى گورديگى يرلرله علاقهدار اولماسين و اويله قدسى خدمتلره خادم (خدمت ايدن) اولان مكانلر و درسخانۀِ نوريهلر و شجرۀِ مبارك، رحمتڭ قصدِ تخصيصندن خارج قالسين؟ قطعيًا ممكن دگلدر!
سعيد النورسى حضرتلرى بارلاده ايكن، ياز آيلرنده بعضًا چام طاغنه چيقار، بر مدّت يالڭز اولارق اوراده قاليردى. بولوندقلرى طاغ خيلى يوكسكدى. بارلا درسخانۀِ نوريهسنڭ اوڭندهكى چنار آغاجنڭ تپهسندهكى قولبهجگى گبى، چام طاغنڭ أڭ يوكسك تپهسنده اولان ايكى بيوك آغاج اوزرنده درسخانۀِ نوريه معناسنده برر منزلى واردى. بو چام و قطران آغاجلرينڭ تپهلرنده، رسالۀِ نورله مشغول اولويوردى. هم أكثر زمانلر، بارلادن بو اورمانلق حوالىيه گلوب گيدردى. و ديردى كه: «بن بو منزللرى، ييلديز سراينه دگشمهم!»
شيمدى سوزى بوراده كسهرك، استادڭ رسالۀ نورى تأليف ايتديگى مذكور چام طاغنده و بارلا ناحيهسندهكى حياتنه و رسالۀ نورڭ ماهيتنه عائد رساله و مكتوبلردن بر قاچنى آشاغىيه درج ايدييورز.
* * *