گبى أعاظمِ أوليانڭ مناجات و حزبلرينى و صلواتِ نوريهلرى و بِالخاصّه رسالۀِ نورڭ منبعى اولان «حزب النوريه»يى و آياتِ قرآنيهنڭ لمعاتى اولان و بر سلسلۀِ تفكّر بولونان و يگرمى طوقوزنجى لمعهده جمع ايديلن حزب و مناجاتلرى اوقور، بونلرى تمام ايدنجه ده ينه رسالۀِ نورله مشغول اولوردى. گوندوزلرى ايسه، دائما رسالۀِ نورڭ مطالعهسى و تصحيحى ايله مشغول اولور؛ رسالۀِ نور خدمتنى هر شيئه ترجيح ايدر، رسالۀِ نوره عائد يتيشهجك عجله بر ايش زماننده ديگر مشغوليتلرينى بيراقير، أوّلا او ايشى تماملاردى.
سعيد النورسى، بهار موسمنده منزلنڭ اوڭندهكى محتشم چنار آغاجنڭ داللرى آراسندهكى قولبهجگه چيقار، وظيفهسنى اوراده ايفا ايدر؛ رسالۀِ نورڭ حقيقتلرينى، منبع و معدنِ حقيقيسى اولان ملأِ أعلاده تفيّض و تماشا و تفكّر ايدردى. استادڭ، گرك (شَجَرَةٌ مُبَارَكَةٌ) سرّينه مظهر اولان بو چنار آغاجى و گركسه چام طاغلرندهكى او چوق اُنسيت ايتديگى آغاجلرڭ و طاغلرڭ باشندهكى تفكّر و حسّياتنى إفاده ايدهبيلمك عجبا ممكن ميدر؟ أصلا ممكن دگلدر! جنابِ حق كمالِ رحمتيله بو فردِ فريدى، كمالاتِ إنسانيهنڭ بتون أنواعنى جامع بر إستعدادده ياراتمش و بو إستعدادلرڭ ده أعظمى شكلده إنكشافنى إراده ايتمش كه؛ بو مستثنا ذاتى، إسلاميت آغاجنڭ صوڭ عصرلره اوزانان و بيڭلر دال بوداق صالان رسالۀِ نور شخصِ معنويسى إعتباريله بتون حقائقده «استادِ كلّ» حكمنه گتيرمش و طوپيكون إسلاميت حقيقتلرينڭ بر عكسِ نورينى و تجلّيسنى رسالۀِ نور شخصِ معنويسنده درج ايدهرك، أهلِ حقيقت و كمالى حيرتله باقديرمش و بويلهجه رسالتِ أحمديه و حقيقتِ محمّديهنڭ جامع بر آيينهسى اولان رسالۀِ نور ايله سعيد النورسى، بر سعيد اولارق چورومش، أريمش؛ فقط معنًا بتون عالمِ إسلام اولارق تولّد ايتمش، بقا بولمشدر. و تا قيامته قدر رسالۀِ نور باقى قالاجق و دائما