أوت تورك ملّتنى و بو وطن أهاليسنى و عالمِ إسلامى أبده قدر شرفله ياشاتهجق و ماضيده اولديغى گبى إستقبالده ده، تاريخڭ آلتون صحيفهلرينه، قرآن و إسلاميت خدمتنده عالمِ إسلامڭ پيشدارى و نامدار قوماندانى اولارق قيد ايتديرهجك مدارِ إفتخارى رسالۀِ نوردر. بيوك بر وسعت و كلّيتى طاشييان و آناطوليده و إسلام عالمنده ظهور ايدوب هر طرفده حسنِ قبوله و تأثيره مظهريتله گيتدكجه إنكشاف و إنتشار ايدن بو أثر؛ قرآنڭ ماليدر، عالمِ إسلامڭ و أهلِ ايمانڭ ماليدر و بو وطن أهاليسنڭ إسلامى بر مدارِ إفتخاريدر. بو مملكتده حكم ايدن بر حكومتڭ نقطۀ إستنادى، هم عين زمانده بتون دنيايه طويورهجغى معظّم حقيقتلر منظومهسيدر كه، إن شاء اللّٰه بر زمان گلوب راديو ايله بتون عالملره درس ويريلهجك و إعلان ايديلهجكدر.
أوت دنيا علم و عرفان ساحهسنه توركيهدن بر گونش طوغمشدر. بو يڭى طوغان گونش، بيڭ اوچ يوز ييل أوّل عالمِ بشريته طوغمش اولان گونشڭ بر إنعكاسيدر و او معنوى گونشڭ هر عصرده پارلايان لمعهلرندن بريسيدر و بكلهنيلن صوڭ معجزۀِ معنويسيدر! يالڭز معنويات ساحهسنده دگل، ظاهرًا و مادّةً دخى تأثيرينى گوسترمشدر.
أوت رسالۀِ نور، بتون دنيا ملّتلرينڭ حياتلرينى محافظه و مدافعه ايچون صاريلدقلرى و گووندكلرى آتوم و أمثالى بومبا و سلاحلرينڭ فوقنده معظّم بر تأثيره صاحبدر! بونڭ بويله اولديغنى، بر پارچه علم و بصيرت نظريله نور رسالهلرينه باقانلر و رسالۀِ نور مؤلّفى بديع الزمان سعيد النورسىنڭ اوتوز سنهدن بَرى آناطوليدهكى خدمتِ ايمانيهلرينه دقّت ايدنلر گورور، آڭلار و تصديق ايدرلر. حقيقته نفوذ ايدن ذاتلر ايچون رسالۀِ نورڭ طلوعندن بوگونه قدر گچن زمان ايچريسندهكى ياپيلان خدمتڭ نتيجهلرى، نهايت درجهده محتشم و معظّمدر، ميليارلر تقدير و تبريكه لايقدر!