ايشته رسالۀِ نور، بويله دهشتلى و أهمّيتلى بر زمانڭ محصولى و نتيجهسيدر. رسالۀِ نورڭ مؤلّفى، يگرمى بش سنهلك دين ييقيجيلغنڭ حكم ايتديگى دهشتلى بر دورڭ جهادِ دينيه ميداننڭ أڭ بيوك قهرمانى و تا قيامته قدر اُمّتِ محمّديهيى (عصم) دار السلامه دعوت ايدن و بشريته يول گوسترن رهبرِ أكمليدر. و هم رسالۀِ نور، قرآنڭ ألماس بر قلنجيدر كه، زمان و زمين و فعليات بونى قطعيتله إثبات ايتمش و گوزلره گوسترمشدر. ايشته اويله أليم و فجيع و دهشتلى بر دورى إحداث ايدن دينسزلرڭ إجراآتى اولان پك آغير شرطلر داخلنده بديع الزمانڭ عنايتِ حقله تأليفه موفّق اولديغى رسالۀِ نور أثرلرى، دينسزلگڭ إستيلاسنه قارشى، ييقيلماسى غيرِ قابل اولان معظّم و محتشم بر سد تشكيل ايتمشدر. رسالۀِ نور؛ مادّيونلق، طبيعيّونلق گبى دينه معارض فلسفهنڭ محال، باطل و ممتنع اولديغنى؛ جرح ايديلمز برهانلرله، عقلى، منطقى دليللرله إثبات ايدهرك أڭ دينسز فيلسوفلرى دخى إلزام ايتمشدر. كفرِ مطلقى مغلوبيته دوچار ايتمش، دينسزلگڭ إستيلاسنى طورديرمشدر.
أوت بديع الزمانه ياپيلان او تاريخى ظلم و إشكنجه و إهانتلر آلتنده فوران ايدوب پارلايان رسالۀِ نور، بو زمانده و إستقبالده بر سيف الإسلامدر. رسالۀِ نور روحلرڭ سَوْگيليسى، قلبلرڭ محبوبى، عاشقلرڭ معشوقى، جانلرڭ جانانى اولمش؛ ايجابنده بو جانان ايچون جانلر فدا ايديلمشدر. رسالۀِ نور، بشرڭ سرتاجى و خلاصكارى موقعِ معلاّسنده خدمت ياپمش و ياپمقدهدر. رسالۀِ نور، قرآنڭ صوڭ عصرلرده بكلهنن بر معجزۀِ معنويهسى اولارق طلوع ايتمش و باشده مؤلّفى بديع الزمان سعيد النورسى اولارق ميليونلرله طلبهلرى و قارداشلرى، بو حقيقتِ قرآنيه أطرافنده پروانهلر گبى دونهرك اونڭ نوريله نورلانمشلر، اوندهكى قرآن و ايمان حقيقتلرينى مصّ ايتمشلر (أممشلر)، ايمانلرينى قوّتلنديرمشلر و بو حقيقتِ كبرايى بتون دنيايه إعلان ايتمك و ئولونجهيه قدر اونى اوقومق و اوڭا خدمت ايتمك غايهسنى عزم ايتمشلردر.