إلى آخر.. فقرهسيله ده سراج النورڭ أساسلرندن خبر ويرييور. چونكه (جَلَالٍ بَازِخٍ) عزّت، عظمت و جلال و كبريادر. (شَرَنْطَخٍ) سريانيجه رؤُف و (بَرْكُوتٍ) رحيمدر. ديمك حضرتِ إمامِ على رضى اللّٰه عنه سراج النورى تعريف ايدييور. حياتنى و نورينى، كبريا و عظمت و رأفت و رحيميتدن آلييور دييه ممتاز خاصيتنى بيان ايدر.
اوچنجيسى:
حضرتِ إمامِ على رضى اللّٰه عنه، بو فقرهده (بِهِ النَّارُ اُخْمِدَتْ) جملهسيله دييور كه: بيڭ اوچ يوز أللى درتده (١٣٥٤) سراج النور (يعنى، رسالۀِ النورڭ نورى) ايله ضلالتڭ تجاوز ايدن نارى إن شاء اللّٰه سونهجك. يعنى، فتنۀِ دينيه آتشنى يا تخريباتدن واز گچيرهجك ويا ايلرى تجاوزاتنى قيرهجق. أگر هجرى تاريخى اولسه، بوندن ايكى سنه أوّل؛ «دينى دنيادن تفريق» فرصتندن إستفاده ايله، دينڭ و قرآنڭ ضررينه اولارق ايلرلهين دهشتلى تصوّراتڭ تجاوزاتى توقّف ايتمهسى، ألبته قارشيلرنده قوّتلى بر سدّڭ بولونماسندندر. او سد ايسه، بو زمانده چوق إنتشار ايدن رسالۀِ النورڭ كسكين حجّتلرى و قوّتلى برهانلرى اولديغى، چوق أمارهلر ايله حسّ ايديلييور. و بو ايكنجى إحتمالدهكى إشارتِ عَلَويه دخى اونى تأييد ايدييور. (حاشيه)
أوت جفرجه (بِهِ النَّارُ اُخْمِدَتْ) (خ) آلتى يوز، (ت) درت يوز، (ر)
___
(حاشيه): هم ده «اِنَّا اَعْطَيْنَا»نڭ سرّى قسمًا تحقّق ايتمش. چونكه سفيانيتڭ درت ركنندن أڭ قوّتليسى و دهشتليسى بتون بتون چكيلدى. قبر آلتنده عذاب چكييور. و أڭ بيوگى دخى علاقهسى بِالفعل چكيلمش. ماصون قوميتهسنڭ محكومى و آلَتى اولوب عذابيله مشغولدر. يالڭز اونڭ گولگهسى حكم ايدييور. ايلرى تجاوز ايتمهمكله برابر قسمًا گريلييور. باقى قالان ايكى شخص ايسه، أللرندن گلسه تعميره چاليشهجقلر.