بر خيرڭ عدمى شر و بر گوزللگڭ بوزولماسى چركينلك اولماسى إعتباريله؛ او نتيجهلر عددنجه شرلر، چركينلكلر، مرحمتسزلكلر حصول بولور. ديمك بر تك شر گلمهمك ايچون يوزر شرلر، مرحمتسزلكلر إرتكاب ايديلير كه؛ بتون بتون حكمته، مصلحته، ربوبيتدهكى رحمته مخالف دوشر. مثلا: قار، صوغوق، آتش، ياغمور گبى نوعلرڭ يوزر حكمتلرى، مصلحتلرى ايچنده بعض دقّتسز و إحتياطسزلر، سوءِ إختيارلريله كنديلرى حقّنده شر ياپسه؛ مثلا ألنى آتشه صوقسه، آتشڭ خلقتنده رحمت يوقدر ديسه؛ آتشڭ حدّ و حسابه گلمهين خيرلى، مصلحتلى، مرحمتلى فائدهلرى اونى تكذيب ايدوب آغزينه وورور.
هم إنسانڭ خودكام هوساتى و سفلى و عاقبتى گورمهين حسّياتى، كائناتده جريان ايدن رحمانيت و حكيميت و ربوبيت قانونلرينه مقياس و محك و ميزان اولاماز. كندى آيينهسنڭ رنگنه گوره گورور. مرحمتسز سياه بر قلب؛ كائناتى آغلار، چركين، ظلم و ظلمات صورتنده گورور. فقط ايمان گوزيله باقسه؛ يتمش گوزل حلّهلرى گيمش بر جنّت حوريسى گبى، رحمتلر و خيرلر و حكمتلردن ديكيلمش يتمش بيڭلر گوزل لباسلرى بربرى اوستنه گيمش، دائما گولر، رحمتله تبسّم ايدر بر إنسانِ أكبر و اوندهكى إنسان نوعنى بر كائناتِ صُغرا و هر بر إنسانى بر عالمِ أصغر مشاهده ايدر. بتون روح و جانيله
﴿اَلْحَمْدُ لِلّٰهِ رَبِّ الْعَالَمٖينَ الرَّحْمٰنِ الرَّحٖيمِ مَالِكِ يَوْمِ الدّٖينِ﴾ دير.
دردنجى كلمه:
(مَالِكِ يَوْمِ الدّٖينِ) در. حجّتنه غايت قيصه بر إشارت:
أوّلا: بو درسڭ برنجى قسمنڭ آخرنده (وَاِلَيْهِ الْمَصٖيرُ) حجّتنه و حشر و آخرته شهادت ايدن بتون دليللر، عينًا (مَالِكِ يَوْمِ الدّٖينِ) ڭ إشارت ايتديگى ايمانى و گنيش حقيقته شهادت ايدرلر.