ييمهيوب ياوروسنه يديرر. و سائر حيواناتڭ و إنسانڭ ياورولرينه ممهلر موصلغندن آبِ كوثر گبى خوش، مُغَدّى، صافى، خالص، بياض سوتلرى قيرمزى قان و ملوّث فيشقى ايچندن بولاشمادن، بولانديرمادن إمدادلرينه گوندرر، والدهلرينڭ شفقتلرينى يارديمجى ويرر. و بر نوع رزق ايستهين عموم آغاجلره، مناسب رزقلرينى اونلره پك خارقه بر طرزده قوشديرديغى گبى، بر نوع مادّى و معنوى رزق ايستهين إنسانڭ طويغولرينه؛ عقل، قلب، روحلرينه دخى پك گنيش بر سفرۀِ أرزاق اونلره إحسان ايديلييور. گويا كائنات، گُل چيچگنڭ ياپراقلرى و مصر سنبلنڭ گوملكلرى گبى بربرى ايچنده صاريلى، يوز بيڭلر آيرى آيرى، چشيد چشيد سفرهلردر كه؛ او سفرهلر عددنجه و اونلردهكى طعاملر و نعمتلر مقدارنجه ديللر ايله و آيرى آيرى، كلّى و جزئى لسانلر ايله بر رحمٰنِ رزّاقى، بر رحيمِ كريمى بتون بتون كور اولميانه گوسترر.
أگر دينيلسه: «بو دنيادهكى مصيبتلر، چركينلكلر، شرلر؛ او إحاطهلى رحمته منافيدر، بولانديرييور.»
الجواب: رسالۀِ قدر گبى نورڭ رسالهلرنده بو دهشتلى سؤاله تام جواب ويريلمش. اونلره حواله ايله، قيصهجق بر إشارتى شودر:
هر بر عنصرڭ، هر بر نوعڭ، هر بر موجودڭ، كلّى و جزئى متعدّد وظيفهلرى و او هر بر وظيفهنڭ چوق نتيجهلرى و ميوهلرى وار. و أكثريتِ مطلقهسى، مصلحت و گوزل و خير و رحمتدرلر. و آز بر قسمى، قابليتسزلره و ياڭليش مباشرت ايدنلره ويا جزا و تربيهيه مستحق اولانلره ويا چوق خيرلرى سنبل ويرمگه وسيله اولانلره راست گلير. ظاهرى، جزئى بر شر، بر چركينلك اولور؛ بر مرحمتسزلك گورونور. أگر او جزئى شر گلمهمك ايچون رحمت طرفندن او عنصر و كلّى موجود او وظيفهسندن منع ايديلسه؛ او وقت بتون خيرلى، گوزل سائر نتيجهلرى وجود بولماز.