أحكامنى، أكثريت إعتباريله إمتثال ايدوب يرينه گتيرسه ايدى، او وقت نظرياتِ شرعيه و مسائلِ دقيقه و نصايحِ خفيهيى آڭلامق ايچون، بيلديگى لسان ايله خطبه اوقونماسى و سُوَرِ قرآنيهنڭ (أگر ممكن اولسه ايدى) ترجمهسى (حاشيه) بلكه مستحسن اولوردى. فقط نماز، زكات، اوروجڭ وجوبى و قتل، زنا و شرابڭ حراميتى گبى معلوم اولان أحكامِ قطعيۀِ إسلاميه مهمل قالييور. عوامِ ناس، اونلرڭ وجوبنى و حراميتنى درس آلمغه محتاج دگللر. بلكه تشويق و إخطار ايله او أحكامِ قدسيهيى خاطرلاتوب، إسلاميت طمارينى و ايمان حسّنى تحريك ايتمكله إمتثاللرينه تشويق و تذكيره و إخطاره محتاجدرلر. حالبوكه بر عامى نه قدر جاهل دخى اولسه، قرآندن و خطبۀِ عربيهدن شو مئالِ إجماليهيى آڭلار كه: «هركسه و بڭا معلوم اولان ايمانڭ ركنلرينى و إسلاميتڭ عمدهلرينى خطيب و حافظ إخطار ايدييور و درس ويرييور، اوقويور» دير؛ قلبنده اونلره قارشى بر إشتياق حاصل اولور. عجبا كائناتده هانگى تعبيرات وار كه؛ عرشِ أعظمدن گلن قرآنِ حكيمڭ إعجازكارانه، مفهّمانه إخطارلرينه، تذكيرلرينه، تشويقلرينه مقابل گلهبيلسين؟
آلتنجيسى:
سلفِ صالحينڭ مجتهدينِ عظامى، عصرِ نور و عصرِ حقيقت اولان عصرِ صحابهيه ياقين اولدقلرندن، صافى بر نور آلوب، خالص بر إجتهاد ايدهبيليرلردى. شو زمانڭ أهلِ إجتهادى ايسه، او قدر پردهلر آرقهسنده و اوزاق بر مسافهده حقيقت كتابنه باقار كه، أڭ واضح بر حرفنى ده زور ايله گورهبيليرلر.
أگر ديسهڭ: «صحابهلر ده إنساندرلر، خطادن، خلافدن خالى اولمازلر. حالبوكه إجتهاداتڭ و أحكامِ شريعتڭ مدارى، صحابهلرڭ عدالتى و صدقيدر كه، حتّى اُمّت «صحابهلر عمومًا عادلدرلر، طوغرى سويلرلر» دييه إتّفاق ايتمشلر.
___
(حاشيه): إعجازه دائر اولان يگرمى بشنجى سوز، قرآنڭ حقيقى ترجمهسى ممكن اولماديغنى گوسترمشدر.