ايله حىّ قيّومڭ محاسنِ ربوبيتنى إظهار ايتمكدر. ايشته بونلر گبى حياتڭ يوكسك حقوقلرى اوزون زمان ايستهمديگى گبى، حياتى بيڭ درجه إعلا ايدر و دنيوى اولان حقوقِ حياتيهدن يوز درجه داها قيمتداردر دييه علم اليقين ايله بيلدم و ديدم: سبحان اللّٰه! ايمان نه قدر قيمتدار و حياتداردر كه، هانگى شيئه گيرسه جانلانديرر و بر شعلهسى بويله فانى حياتى، باقيانه حياتلانديرر، اوستندهكى فنايى سيلهر.
اوچنجى مسئله:
حياتمڭ خالقمه باقان فطرى وظيفهلرينه و معنوى فائدهلرينه باقدم، گوردم كه: حياتم، حياتڭ خالقنه اوچ جهتله آيينهدارلق ايدييور:
برنجى وجه: حياتم، عجز و ضعفيله و فقر و إحتياجيله خالقِ حياتڭ قدرت و قوّتنه و غنا و رحمتنه آيينهدارلق ايدر. أوت ناصلكه آجلق درجهسيله يمگڭ لذّت درجهلرى و قراڭلغڭ مرتبهلريله ايشيق مرتبهلرى و صوغوغڭ مقياسيله حرارتڭ ميزان درجهلرى بيلينير؛ اويله ده حياتمدهكى حدسز عجز و فقر ايله برابر حدسز إحتياجلريمى إزاله و حدسز دشمنلريمى دفع ايتمك نقطهسنده خالقمڭ حدسز قدرت و رحمتنى بيلدم؛ سؤال و دعا و إلتجا و تذلّل و عبوديت وظيفهسنى آڭلادم و آلدم.
ايكنجى وجه: حياتمدهكى جزئى علم و إراده و سمع و بصر گبى معنالريله، خالقمڭ كلّى و إحاطهلى صفتلرينه و شئوناتنه آيينهدارلقدر. أوت بن كندى حياتمده و شعورلى فعللرمده بيلمك، ايشيتمك، گورمك، سويلهمك، ايستهمك گبى چوق معنالريله بيلدم كه؛ بو كائناتڭ شخصمدن بيوكلگى درجهسنده داها بيوك بر مقياسده خالقمڭ محيط علمنى، إرادهسنى، سمع و بصر و قدرت و حيات گبى أوصافنى و محبّت و غضب و شفقت گبى شئوناتنى آڭلادم؛ ايمان ايدهرك تصديق ايتدم و إعتراف ايدهرك بر معرفت يولنى داها بولدم.