شهيد مرحوم حافظ علىنڭ بر إستخراجيدر
(رسالۀِ نوره إشارت ايدن اوتوز اوچنجى آيتڭ إستخراجنه دائر حافظ علىنڭ (رحمة اللّٰه عليه) بر فقرهسيدر)
دون آقشام نمازينى قيلاركن ايكنجى ركعتنده، فاتحۀِ شريفهدن صوڭره
﴿شَهِدَ اللهُ اَنَّهُ لَٓا اِلٰهَ اِلَّا هُوَ وَالْمَلٰٓئِكَةُ وَاُولُوا الْعِلْمِ قَٓائِمًا بِالْقِسْطِ لَٓا اِلٰهَ اِلَّا هُوَ الْعَزٖيزُ الْحَكٖيمُ﴾
آيتنى اوقوركن، هيچ دوشونمديگم، عقل و قلبمده بر شى، تحرّىيه بر سبب يوقكن، بردن بره روحڭ پنجرهسنه شو عظيم آيتِ كريمهنڭ رسالۀِ نوره و مؤلّفنه بر مناسبتِ معنويه ايله إشارتى گوستريلدى. نمازدن صوڭره بن دوشوندم. حقيقةً قوّتلى بر مناسبتِ معنويهسى وار. شويله كه:
بو كائناتده، وحدانيتِ إلٰهيهيى جنّ و إنسه و روحانياته قارشى قطعى بر صورتده گوستروب إثبات ايدن برنجى، قرآنِ عظيم الشان اولديغى گبى؛ بو عصرده ايكنجى، اوچنجى درجهده كمالِ عدالتله و صادق و مصدّق حجّتلرله وحدانيتى واضح و باهر بر صورتده، كائنات صفحاتنده إنس و جنّڭ أنظارينه عرض ايدوب إثبات ايدن رسالۀِ نور؛ بتون طبقاتِ بشره هم مدرسه، هم مكتب، هم قيشله، هم حكيم، هم حاكم اولارق، أڭ عامى عوامدن أڭ أخصّ خواصّه قدر درس ويروب، تعليم و تربيه ايتمهسى بزجه مشهود اولماسيله، بو آيتِ كريمهنڭ بر موضوعى و بر ماصدقى ده رسالۀِ النور اولماسنه شبههسز بر قناعت ويرييور.
ايكنجى كلمۀِ توحيددن صوڭره «اَلْعَزيِزُ الْحَكِيم» إسملريله جنابِ حق (جلّ جلاله) ذاتنى توصيف بيوروب، ايكنجى درجهده عين إسملرڭ مظهرى اولان رسالة النوره و ترجماننه إشارت ايتمهسى قرآنِ عظيم الشانڭ شأننه ياقيشير بر