استادلرينڭ ويرديگى خبرڭ صحّتنى تصديق ايتمك ايچون او قارداشمزى برائت ايتديرمش و آلينان بتون رسالۀِ نور أجزالرينى كنديلرينه إعاده ايتديرمشدر.
اوچنجيسى ايسه: ايچنده بولونديغمز دڭزلى حپسخانهسندهكى مصيبتڭ باشمزه گلمهسنه سبب اولان او منافقلر؛ رومى بيڭ اوچ يوز أللى طوقوز (١٣٥٩) سنهسنده تكرار باشده سَوْگيلى استاديمز اولديغى حالده، بزه و رسالۀِ النوره هجوم ايتديلر. بر قسممزى إسپارطهدن طوپلاديلر، بر قسمنى چيوريلدن إسپارطهيه گتيرديلر، سَوْگيلى استاديمزى ده يالڭز اولارق قسطمونيدن إسپارطهيه سَوق ايتديلر. داها باشقه ولايتلردن ده آرقداشلريمز إسپارطهيه گتيريلمشدى. أهلِ غرضڭ إغفالنه قاپيلان إسپارطه عدليهسى، رسالۀِ النورڭ غايهسى خارجنده بولونان جبههلرده، بزجه معناسى اولميان إتهاملر آلتنده بزى صيقييوردى. بِالخاصّه قيمتدار استاديمزى داها چوق تضييق ايتدكلرى وقت، استاديمزه لزوملى لزومسز بر چوق سؤاللر آچان إسپارطه مدّعى عموميسنڭ: «بو بلالر ديديگڭ نهدر؟» دييه اولان سؤالنه جوابًا: أوت ديمش، زنديقلر أگر رسالۀِ النوره و شاكردلرينه ايليشسهلر، ياقينده بكلهين بلالرڭ حركتِ أرض صورتيله گلهجگنى سويلهمشدى.
داها صوڭره بزى دڭزلىيه سَوق ايتديلر. قسطمونى، إستانبول، آنقره داخل اولمق اوزره اون ولايتدن عدليهلره سَوق ايديلن يوزى متجاوز رسالۀِ نور طلبهلرينڭ بر قسمى بيراقيلمش، يتمش كيشيدن عبارت اولان بر ديگر قسمى ده دڭزليده «مدرسۀِ يوسفيه» نامنى آلان حپسده بولونويوردى. بزم بتون مراجعتلريمزه صودن جواب ويريلييور، سَوْگيلى استاديمز داها چوق تضييق و صيقنتى ايچريسنده ياشاتديريلييور؛ عفونتلى، روطوبتلى، ظلمتلى، هواسز بر يرده بتون بتون قونوشمقدن و تماسدن منع ايديلمك صورتيله حپسِ منفردده عذاب چكديريلييوردى.
ايشته بو صيرهلرده دڭزلى زنداننڭ بو دهشتلى إضطرابلرينى گچرمكده ايدك. اللّٰهدن باشقه هيچ بر إستنادگاهلرى بولونميان بو بيچارهلرڭ بر قسمى قسطمونيدن،