رسالۀِ نورڭ قهرمانى خسرو طرفندن قلمه آلينمشدر
﴿بِاسْمِهٖ سُبْحَانَهُ﴾
رسالۀِ النورڭ كرامتلرندندر كه: استاديمز رضى اللّٰه عنه چوق دفعه رسالهلرده: «أى ملحدلر و أى زنديقلر! رسالۀِ النوره ايليشمهيڭز. أگر ايليشيرسهڭز، ياقينده سزى بكلهين بلالر، سيل گبى باشڭزه ياغاجقدر.» دييه اون سنهدن بَرى كرّاتله سويلهيورلردى. بو خصوصده شاهد اولديغمز فلاكتلردن:
برنجيسى: درت سنه أوّل أرزنجانده و إزمير جوارنده وقوعه گلن حركتِ أرض اولمشدر. او وقتلر منافقلر، دسيسهلرله إسپارطه منطقهسنده صاوه و قلهاوڭى و جوارى كويلردهكى رسالۀِ نور طلبهلرينه ايليشديلر. اوتوز قرق قدر رسالۀِ نور طلبهلرينى «جامعه گيتمييورسڭز، تاكيه گييورسڭز، طريقت درسى ويرييورسڭز.» دييه محكمهيه سوق ايتمشلردى. جنابِ حق، إزمير جوارينى و آزريلرى و جوارندهكى خلقى دهشتلر ايچنده بيراقان زلزلهلر ايله رسالۀِ نورڭ بر وسيلۀِ دفعِ بلا اولديغنى گوستردى. بو زلزلهلردن بر هفته صوڭره، محكمهيه سوق ايديلمش اولان او قارداشلريمزڭ هپسى برائت ايتديريلهرك قورتولمشلردى.
ايكنجيسى: ينه وقت وقت رسالۀِ نور طلبهلرينڭ آرقهلرنده قوشمقده دوام ايدن ملحدلر، خطِّ قرآن ايله چوجق اوقوتدقلرينى بهانه ايدهرك إسپارطهده متوفّى محمد زهدى (رحمة اللّٰه عليه) ايله صاوه قريهسندن حافظ محمد (رحمة اللّٰه عليه) إسمندهكى ايكى رسالۀِ النور طلبهسنه هجوم ايتمشلر. نور درسنى اوقويان چوجقلرى، بو ايكى قارداشمزڭ أولرندن آلينان رسالۀِ نور أجزالريله برلكده محكمهيه سوق ايديلمش. مرحوم محمد زهدى، پاره جزاسيله محكوم ايديلمك ايستهنيلمش. نتيجهده، مركزى أربعه و طوقاتده وقوعه گلن ايكنجى بر قورقونج زلزله ايله جنابِ حق، رسالۀِ النور بر وسيلۀِ دفعِ بلا اولمقله شاكردلرينه يارديم ايدهرك