بياناتى، بويله دنيوى اولان مسائلِ إستقباليهده نهدن تعبيره و تأويله محتاج اولويور؟ دييه خاطريمه گلدى.
بويله بر جواب إخطار ايديلدى كه: غيبى إستقبالِ دنيوىده باشه گلن حادثاتى بيلديرمهمكده؛ جنابِ أرحم الراحمينڭ چوق بيوك بر رحمتى صاقلانديغى و غيبى گيزلهمكده چوق أهمّيتلى بر حكمتى بولونديغى جهتله، غيبى شيلرى خبر ويرمكدن ياساق ايدوب، يالڭز مبهم و مجمل بر صورتده، يا إلهام ويا إخطار ايله بر أمارهيى وسيله ايدهرك، كشفياتده و رؤياىِ صادقهده بر قسم غيبى حقيقتلرينى إحساس ايدر. و او حقيقتلرڭ خصوصى صورتلرى، وقوعندن صوڭره بيلينير.
سعيد النورسى
* * *
رسالۀِ نور شاكردلرندن أمين، حلمى، كامل و فيضىنڭ بر فقرهسيدر.
رسالۀِ نورڭ قصبهلره، جماعتلره بركته مدار اولماسى و اوڭا ضرر ويرنلره طوقات گلمهسى گبى؛ شخصلره ده، پك ظاهر بر صورتده هم بركت و حسنِ معيشت (اوڭا چاليشانلره)؛ و غيبى طوقاتلر، (اونڭ عليهنده چاليشانلره) گلمهسى.. بو حواليده پك چوق حادثهلرى وار. بز كندى نفسمزده؛ چاليشديغمز زمان پك ظاهرى بر صورتده بر حسنِ معيشت، بر عنايت گورديگمز گبى؛ رسالۀِ نورڭ أركانندن نظيف، قطعى بر صورتده خبر ويرييور كه: اوچ درت آدم، دنيا ثروتنڭ خاطرى ايچون رسالۀِ النور عليهنده طوپلانوب، منافقانه بر تدبير قوردقلرى هنگامده؛ اوچ گون صوڭره او اوچ آدمڭ خانهلرى و دكّانلرى يانوب، بيڭلر ليرا ضايعاتله طوقات ييديلر.