إشاراتِ قرآنيه و اوچ كرامتِ عَلويه و كرامتِ غوثيه حقّنده بر تنبيه و إخطاردر
بو غايت محرم رسالهلر، ناصلسه معنّد بر نامحرمڭ ألنه بو رسالهلردن بريسى گچمش. غايت سطحى و عناد نظريله بر ايكى يرينه حقسز بر إعتراض ايله أهمّيتلى بر حادثهيه سببيت ويرديگندن؛ بو مجموعه، رسالۀِ نورڭ خاص طلبهلرينه بلكه أخصِّ خواصّه مخصوص اولديغى حالده و بنم وفاتمدن صوڭره إنتشارينه مساعده اولماسيله برابر؛ شيمدى مذكور حادثهنڭ سببيله هركسه دگل، بلكه أهلِ إنصاف و رسالۀِ نورله علاقهدار و طلبهلرندن بولونانلره و خاصلردن بر قاچ شاكردڭ تنسيبيله گوستريلهبيلير فكريله يازدق. شيمدى ايسه، ايكى سنه ايكى محكمه تدقيقدن صوڭره بزه إعاده ايديلمهسندن نشرينه مجبور اولدق.
ايكنجى نقطه: بو رساله باشدن آشاغىيه قدر بر تك نتيجهيه باقييور. بيڭه ياقين أمارهلرله، رسالۀِ نورڭ مقبوليتنه بر إمضا باصيلديغنى إثبات ايدييور. بويله بر تك دعوايه بو درجه كثرتلى و آيرى آيرى جهتلرده بيڭلر أمارهلر و ايمالر اونى گوسترمسى علم اليقين دگل، بلكه عين اليقين، بلكه حقّ اليقين درجهسنده او دعوايى إثبات ايدر.
اوچنجى نقطه: بو رسالهيى مطالعه ايدن ذاتلر، اينجهدن اينجهيه، خصوصًا جفرى حساباتنه مشغول اولمغه لزوم يوق؛ بر قسمى آڭلاشيلمسه ده ضررى يوق. هم عمومنى اوقومق ده لازم دگل. هم كرامتِ غوثيهنڭ آخرنده، شاملى حافظ توفيقڭ فقرهسندن باشلايوب آخره قدر مطالعهدن صوڭره و باشدهكى مقدّمهيى اوقودقدن صوڭره (حاشيه) ايستديگى پارچهيى اوقوسون.
سعيد النورسى
* * *
___
(حاشيه): كتابڭ برنجى و يدنجى قسملرينى اوقودقدن صوڭره.