رسالۀِ نورڭ مقبوليتنه إمضا باصان و غيبى إشارتلرله اوندن خبر ويرن سكز پارچهدن برنجى پارچهدر.
عين مسئلهيه بو برنجى رسالهده يگرمى طوقوز إشارت وار. سائر پارچهلرله برابر بيڭه ياقين إشارتلر، رمزلر، ايمالر، أمارهلر عين مسئلهيه، عين دعوايه إتّفاقله باقمهلرى صراحت درجهسندهدر. وحدتِ مسئله جهتيله، او أمارهلر بربرينه قوّت ويرر، تأييد ايدر. او سكزدن اوچ دانهسى، إمامِ علىنڭ (رضى اللّٰه عنه) اوچ كرامتِ غيبيهسيله رسالۀِ النوردن خبر ويرمش.
بو سكز پارچهيى آنقره أهلِ وقوفى تدقيق ايتمش، إعتراض ايتمهمشلر. يالڭز ديمشلر: «بو يازيلماملى ايدى. كرامت صاحبى، كرامتنى يازاماز.» بن ده اونلره جواب ويردم كه: بو بنم دگل، رسالۀِ نورڭ كرامتيدر. رسالۀِ النور ايسه، قرآنڭ ماليدر و تفسيريدر ديدم. اونلر صوصديلر؛ ديمك قبول ايتديلر. گرچه بو چشيد إكراملر يازيلماسه ايدى داها مناسب اولوردى؛ فقط بو قدر حدسز معارضلر و چوق قوّتلى و كثرتلى دشمنلر قارشيسنده آز و ضعيف اولان بزلره قوّۀِ معنويه و غيبى إمداد و تشجيع و ثبات و متانت ويرمك ايچون مجبوريتِ قطعيه اولدى، بن ده يازدم. بنم بنلگمه بر خودفروشلق ويروب سقوطمه سبب اولسه ده، أهمّيتى يوق. بو خدمته؛ يعنى أهلِ ايمانى ضلالتِ مطلقهدن قورتارمغه لزوم اولسه دنيوى حيات گبى، اُخروى حياتمى ده فدا ايتمك بر سعادت بيليرم؛ بيڭلر دوستلرم و قارداشلريمڭ جنّته گيرمهلرى ايچون جهنّمى قبول ايدرم.
سعيد النورسى
* * *