نورڭ بر قهرمانى محمد قايانڭ رسالۀِ نور حقّنده بر تقريضيدر
﴿بِاسْمِهٖ سُبْحَانَهُ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ اَبَدًا دَائِمًا﴾
چوق شفقتلى، پك كريم، حياتمدن چوق عزيز استادم أفنديم حضرتلرى!
مبتدع و پك عجمى بر چوجغڭ، استادندن آلديغى درسى تكرارى مِثللو، جهلِ مركّب ايچريسنده پويان اولان شو عاجز طلبهڭزه رسالۀِ نورڭ فيضِ نامتناهيسندن سوزولن إكسيرِ حيات، روح و قلبمى، عقل و إدراك و شعوريمى، حسّياتِ سفيههنڭ إستيلاسندن وقايه ايدهرك، أڭ مبارك بر مرشدِ أعظم گبى همّتِ نامتناهيسيله، أڭ مهمّ بر قوّۀِ دافعه اولارق، وجود ملكندن نفسِ أمّاره و هوا شرلرينى دفع و طرد ايدهرك، آشيلماز و ييقلماز بر سدِّ قرآنى و بر سدِّ ايمانى تأسيس ايدييور.
رسالۀِ نور، نباتاتڭ حتّى جماداتڭ دخى لسانِ حاللريله اولان تسبيحاتنى، كائناتڭ مدارِ مفخرتى اولان لسانِ آدمله بيان ايدهرك خالقِ كائناته تقديم ايتمهسندن -رسالۀِ نور- بتون مخلوقات و بتون ذىروح ايله ده يقينًا علاقهدار و مناسبتداردر.
بو قدر إحاطهلى، جامع، معنيدار بر حياتِ نامتناهينڭ فيّاض نورلريله كائناتلر ايشيقلانيركن، ظلماتلر طاغيليركن، عصرلر ييقانركن، گوزلرى فلسفه باتاقلغنڭ چامورلريله قپالى، قلبلرى مُهرلى، بشر چهرهلى متمرّدلرڭ، (كَالْاَنْعَامِ بَلْ هُمْ اَضَلُّ) سرّينڭ مظهرى او زواللى ضالّين گروهنڭ حقائقِ قرآنيهيه قارشى كور، صاغير، غافل اولارق خالقِ كائناته عصيانلرى، هيچ شبههسز كائناتى أمثالسز بر غضبله غضبلنديرييور؛ (تَكَادُ تَمَيَّزُ مِنَ الْغَيْظِ) سرّيله جهنّمى چلّهدن چيقارييور؛ موجوداته، لسانِ حاليله: «ياشاسين عذابِ جهنّم!» ديديرتييور.
رسالۀِ نور بتون ميزانلريله و رياضى قطعيتيله، هر درلو حقائقى تام إثبات ايتمهسيله؛ مادّى علم و فرعونانه دوشونجهلرڭ نتيجهسى روحلرى زفيرى قراڭلقده اولان بو زمرهلرڭ مسئوليتلرى، گچن عصرلردهكى متمرّد كفره نسبتله داها قتمرلى بر صورتده أشدّ بر عذابه إنقلاب ايدهجگى صراحتله تظاهر ايدييور. زيرا بو دهشتلى عصرڭ زنديقلرى، إعتراض ويا إنكار ايتدكلرى حقائقڭ رياضى قطعيتنى، ايكى كرّه ايكى درت ايدر درجهسنده بر قطعيتله، رسالۀِ نورده بِالذّات مشاهده ايتدكلرندن و اونلر داها دنياده ايكن تسليمه مجبور اولدقلرندن، صِرف بر كفرِ عنادى ايله كفرى إلتزام ايتمهلرندن، إبليسه تابع بو بدبخت إبليس خدمتجيلرينڭ عذابنى، كفرلرى گبى، أشدِّ عذابه لايق قيلمقدهدر.
رسالۀِ نور تبشيراتيله، إخبارِ غيبيلريله، گچمش عصرلرڭ ساكنلرينڭ نظرلرينى غبطه و تحسين ايله عصريمزه باقديرمقدهدر. وراثتِ نبوى يوليله پك علويتى حائز و اُمّتڭ أڭ مبجّلى اولان و برنجى صفنى تشكيل ايدن أصحابِ كرامڭ، خصوصيله حضرتِ علىنڭ (رض) كرامتِ عَلَويهلرى و داها صوڭره محقّقينڭ و أصفيانڭ سرفرازى حضرتِ غوثڭ (قس) كرامتِ غوثيهلريله و نجم الدّينِ كبرا و محيى الدينِ عربى (قس) گبى كُمّلينڭ كنديلرندن صوڭرهكى عصرلره عائد إشارتلرينڭ أمثالسز صراحتلريله، ضيانڭ گونشى و حرارتڭ آتشى گوسترمسى گبى، رسالۀِ نوردن أڭ قطعى و أڭ صريح و أڭ ضيادار بر صورتده تبشيراتلريله و إخباراتِ غيبيهلريله بيانلرى؛ إحساناتِ إلٰهيهنڭ أمثالسز حمد و ثنايه لايق بر إكراميدر.
﴿اَلْحَمْدُ لِلّٰهِ هٰذَا مِنْ فَضْلِ رَبِّى﴾
رسالۀِ نور معلوم سوزلريله و بتون أجزالريله جادّۀِ كبراىِ قرآنيهيى گوسترمسى إعتباريله، كمالڭ حدِّ قصوىسنه ايصاله وسيله اولديغى گبى؛ مايهسى خرجِ قرآنى ايله مزيَّن، مُثَنَّا، معظّم، محتشم اولان رسالۀِ نوره لاقيدلق ايتمك، تمرّد و إنكارده بولونمق، إنسانى أعلاىِ علّيّينڭ مقابلى اولان أسفلِ سافلينه دوشورور.
استادم أفنديم حضرتلرى! قصر فهمم، ناقص إفادهم، چوق محدود إحاطهمله؛ ايمان و عرفان آغاجنڭ أڭ صوڭ و أڭ نفس ميوهسى رسالۀِ نورڭ تشريحى و ايضاحنى بن ياپامييورم. ذاتًا اونى تام حقيقتيله سكنۀِ أرضڭ هيچ برى و هيچ بر عنصرى، مكمّل ياپاماز. او سماوى إلهام مجموعهسنڭ تعريفى و تشريحى و ايضاحى؛ كنديسنڭ كنديسنه خاص، ممتاز و سراپا سهلِ ممتنع اولان سلاستلى، حشمتلى، ضيادار، منقّش، مزيَّن اولان إفاده و بيانلرنده نُمَايَان و اوراده ضيابخش و نورأفشاندر.
أى رسالۀِ نور، أى معجزۀِ قرآن!
مفتخر سنڭله إنس و جنّ، زمين و زمان.
ايشيقلاندى قلبلر، طولدى نورڭله جهان؛
بيڭلر سلام سڭا أى معجزۀِ قرآن!
أى رسالۀِ نور، أى دردليلره درمان!
يانغين گوڭللره آبِ كوثر سن اولدڭ
عاشق بيچارهلره وردِ سَحَر سن اولدڭ،
گوڭللره طاقيلى اينجى جوهر سن اولدڭ
مفتخر سنڭله إنس و جنّ، زمين و زمان.
بيڭلر سلام سڭا أى معجزۀِ قرآن!
يانيق گوڭللره صانكه زمزم پوڭارى،
جنّتمثال اورتهسى، باغِ فردوس كنارى.
روشن عالم، نورڭله أى هدايت سردارى!
مفتخر سنڭله إنس و جنّ، زمين و زمان.
بيڭلر سلام سڭا أى معجزۀِ قرآن!
* * *
چوق مشفق، چوق كريم استادم أفنديم،
حضورِ حضرتڭزده، معنًا رحلۀِ تدريسڭزده، عرفانڭزه مشتاق، فيضڭزله سراب شو فقير، شو عاجز طلبهڭزڭ، نورڭ درسلرندن آلديغى إنتباه ايله، حقائقِ قرآنيهنڭ إعجازكار و نامتناهى علوى حقيقتلرندن و مبارك فيضڭزڭ ترشّحاتى اولارق شويله بر حقيقت قلبمه گلدى:
قرآنِ عظيم الشاندن درسمى اوقوركن سورۀِ لقماندهكى
﴿وَمَنْ يُسْلِمْ وَجْهَهُٓ اِلَى اللّٰهِ وَهُوَ مُحْسِنٌ فَقَدِ اسْتَمْسَكَ﴾
آيتنى قرائت ايدركن -غيرِ إختيارى- قلبم، روحم، عقلم بو قدسى كلامڭ پك درين، پك علوى معناسنه صاپلاندى. باشده عصرِ پاكِ محمّدى (عصم) اولديغى حالده بتون عصرلرله قونوشان بو آيتِ كريمه، عصريمزه ده ألبته باقمقدهدر. خصوصيله بو آيتِ جليلهنڭ عصريمزدهكى تام ماصدقى اولاجق بر معنوى ذاته شفرهلى مكالمهسى و خطابى وار دييهرك شدّتلى بر إخطارڭ سائقيله باقدم. او قدسى جملۀِ قرآنيه كه؛ (فَقَدِ اسْتَمْسَكَ) نظمِ جليلنه قدر، رسالۀِ نور مؤلّفنڭ طوغديغى تاريخه ويا رسالۀِ نورڭ مقدّماتنى تحصيلنه باشلاديغى تاريخه، مقامِ جفريسيله پارمق باصمقدهدر. (وَمَنْ يُسْلِمْ وَجْهَهُ اِلَى اللّٰهِ وَهُوَ مُحْسِنٌ فَقَدِ اسْتَمْسَكَ) (١٢٩٢) ايدييور. ى حرفى ايكى دفعه صاييليرسه، (١٣٠٢) ايدييور. درت (و) ٢٤، درت (م) ١٦٠، ايكى (ن) ١٠٠، بر (ى) ١٠، درت (س) ٢٤٠، درت (ل) ١٢٠، بر (ج) ٣، درت (ه) ٢٠، اوچ ألف ٣، بر (ح) ٨، بر (ف) ٨٠، بر (ق) ١٠٠، بر (د) ٤، بر (ك) ٢٠، بر (ت) ٤٠٠. يكون ١٢٩٢ ايدهرك مؤلّفڭ طوغوم تاريخنى گوسترمكدهدر. (ى) ايكى دفعه صاييلديغى تقديرده (١٣٠٢) تاريخى ايدر كه؛ بو تاريخ، رسالۀِ نور مؤلّفنڭ تحصيله، يعنى نورڭ باصامقلرينه باشلاديغى زمانى گوسترييور. ايلريده قرآنه ياپيلاجق تعرّضلرده نور شاكردلرى قرآنڭ أمثالسز ألماس قلنجى رسالۀِ نور ايله ياپيلاجق مجاهدهده، مؤلّفڭ كفرى تأديب ايچون لزوملى قرآنى جبخانه و تجهيزاتى تعلّم و إدّخار ايله مشغول بولوندقلرى تاريخه پارمق باصييور. (بِالْعُرْوَةِ الْوُثْقٰى) نظمِ جليلى پك لطيف بر توافق أثرى اولارق مقامِ جفريسى (١٣٤٧) ايدهرك، تام تامنه رسالۀِ نور مؤلّفنڭ بَيْن العوام و بَيْن الإسلام أڭ چوق قوللانيلان إسمِ مباركى اولان استاد بديع الزمان إسمنه پارمق باصديغندن
﴿وَلَا رَطْبٍ وَلَا يَابِسٍ اِلَّا فٖى كِتَابٍ مُبٖينٍ﴾
نظمِ جليلى ايله، هر شيئى جامع اولان قرآنِ عظيم البيان، ألبته و ألبته گرك إشارى معناسيله و گرك حسابِ جفريسيله، رسالۀِ نور مؤلّفنڭ طوغوم تاريخنه ويا تحصيله باشلاديغى تاريخه و إسملرينه إشارت ايتمكدهدر. رسالۀِ نور جزءلرنده، سورۀِ بقرهدهكى (لَٓا اِكْرَاهَ فِى الدّٖينِ) إلٰى آخر آيتِ كريمهسنڭ حقيقتلى، حكمتلى، محتشم تفسيرى؛ إشارى معنا و حسابِ جفريسيله بيان ايديلديگندن، او حقيقتلى و حشمتلى تفسيرڭ رسالۀِ نوره و مبارك مؤلّفنه لطيف إشارتلرى آراسنده (بِالْعُرْوَةِ الْوُثْقٰى) نظمِ جليلِ سبحانيسى، جفرجه (١٣٤٧) رقمينى گوسترهرك، (استاد بديع الزمان) إسمنه جفرًا توافقى گوسترييور كه: بو آيتڭ سورۀِ لقماندهكى آيتله مناسبتى و ايكى يرده بو حقيقتڭ تكرارى، رسالۀِ نوره چوق قوّتلى بر إشارت و ايماء تشكيل ايتمكدهدر.
رسالۀِ نور كندى شاكردلريله قوپماز بر زنجير، بر حبل المتين وصفنه تام لايق اولارق، بو دهشتلى عصرڭ صولتلى بدعهلرينه قارشى أمثالسز بر قهرمانلقله گوگس گرهرك پيشواىِ عالمِ إسلام اولمش و قرآنِ عظيمڭ دلّالى صفتيله أقطارِ إسلاميهنڭ هر يرنده، حتّى كُرۀِ زمينده مشعلۀِ ايمانى، قرآنڭ أزلى و أبدى ايشيغيله پارلاتمش اولماسى، الحقّ بو وصفه تام لايق اولديغنى نيجه برهانلرله تأييد ايتمش بولونويور.
بو قدسى آيتلرڭ تفصيلاتلى تفسيرى رسالۀِ نور كلّياتنده بيان ايديلمش بولونديغندن، بو يوكسك حقائقى اوڭا حواله ايدهرك درسمه خاتمه ويرييورم.
چوق مبارك استادم أفنديم! حدّيمڭ ميليون كرّه فوقنده اولان بر مسئلهده كوچكلگمه، نهايتسز عجزيمه، صوڭسز فقرمه و جهلمه باقميهرق، جرئتلى حركتمدن طولايى بندهڭزى عفو ايديڭز. يالڭز شوراسنى تكرارًا عرض ايدهيم كه: رحلۀِ تدريسڭزده أخذِ موقع ايتدم؛ حضورِ عرفانڭزه باش قويدم.
أى طبيبِ حاذقم، أى مبارك استادم! بنى عفو ايديڭز. درجۀِ كمالدهكى شفقتڭزدن و إكرامڭزدن آنجق عفو ديلرم. أڭ بيوك أدب و حرمتلرمله مبارك أللريڭزدن اوپر، مبارك دعالريڭزى إسترحام أيلرم أفنديم حضرتلرى...
اَلْبَاقِى هُوَ الْبَاقِى
پك قصورلى، دعاڭزه محتاج طلبهڭز
محمد
* * *
أوّلجه بر بايرام تبريكى اولارق عرض ايديلن شو نظمڭ موضوع ايله علاقهسندن طولايى بورايه درجى مناسب اولور قناعتيله تكرار تقديم ايديلمشدر.
برجِ أنورسڭ أفنديم، قلعۀِ إسلامه سن.
نائل اولمشسڭ بوگون قرآن ايله إكرامه سن.
سنسڭ اول دلّالِ قرآن، يولنه جانلر فدا،
إلتفاتِ شاه مردان ايله سنسڭ مقتدا.
وصفنى رسم ايتمگه يوق طاقتم، گلمز ديله.
سن مؤيّدسڭ أفنديم، اول كراماتِ غوث ايله.
سنسڭ اول نور ناشرى، فيضڭ دمادم آشكار.
اولدى ملحدلر تحصّنگاهى، سنڭله تار و مار.
قيل كرملر بندهڭه كيم، چار و ناچار سويلهدم.
سن مجدّدِ كاربان خاتميسڭ سيّدم.
لطفنى بكلر گدايم، عفو ايدوب خدّامنى،
آلدى فيضندن بو محمد، دائما إلهامنى.
فرقۀِ نجيهيز بز، راهِ توحيد جبههمز.
پيشواىِ عالمِ إسلام سنسڭ شبههسز.
گونلرڭ اولسون مبارك، خاطرڭ بولسون صفا،
إسمِ پاكِ حقّيچون أحمدِ محمّد مصطفى. (عصم)
* * *
آنقره اونورسيتهسنده اوقونان بر قونفرانسدر
﴿بِاسْمِهٖ سُبْحَانَهُ﴾
رسالۀِ نورڭ درسيله و عزيز و قيمتلى استادم بديع الزمانڭ همّتيله يازيلهبيلن بو قونفرانس، رسالۀِ نور حقّنده طاتلى و ذوقلى بر صحبتدر. رسالۀِ نورڭ قيمت و أهمّيتنى إفاده ايتمك دگلدر. بوڭا جسارتم يوقدر. زيرا بن، رسالۀِ نورڭ أڭ مبتدع، أڭ عاجز بر طلبهسىيم. ملّتلر ايچنده شهرت قزانمش بر شاه أثرڭ دگرينى آڭلاتمغه كولتورم كفايتسزدر. بو بيوك شرف، رسالۀِ نورڭ منوّر، إدراكلى و تقديركار اوقويوجيلرينه مخصوصدر.
بن رسالۀِ نوره قاووشنجهيه قدر، مطبوعاتمزده و كتابلريمزده قرآنِ كريمڭ قيمتنى آڭلاتان تك بر يازى اوقومامشدم. صوڭرهدن آڭلادم كه: قرآنِ كريمى ياريم عصردن فضلهدر، بزده يتيشن أديبلردن زياده؛ أجنبى بيوكلرى تقدير ايدييورلرمش. آمريقاده بياض سرايده بتون دنيانڭ و كائناتڭ گونشى اولان قرآنِ حكيم، يشيل ايپكليلر آراسنده لايق اولديغى يوكسك موقعه قونويورمش. موجدلر، فيلسوفلر، پيسيقولوغلر، سوسيولوغلر، پدهغوغلر قرآنِ كريمى أساس طوتهرق يازيلمش اولان أثرلرى اوقويورلر. او شخصيتلر، بو مقدّس كتابدن آلدقلرى معلومات ايله أثرلر يازهرق دنيا چاپنده شهرت قزانييورلر؛ إنسانلغه، ملّتلرينه خدمت ايدييورلرمش. إسوهچ، نوروهچ و فينلاندياده أڭ بيوك علم آدملرندن متشكّل بر هيئت ميدانه گتيرمشلر؛ گنجلرڭ قورتولوشنى صاغلاياجق خلاصكار بر كتابى سنهلرجه آرامشلر؛ نهايت گنجلگى أڭ يوكسك أخلاق ايله أخلاقلندرمق و دنياده آچيق فكرلى، مستقيم علم آدمى ياپمق ايچون، قرآنِ كريمى اوقوتمانڭ يگانه چاره اولديغى نتيجهسنه وارمشلر.
إسلاميتى و قرآنى تقدير ايدن يابانجيلر چوقدر. داها بر چوق مثاللر ويرمك ممكندر.
ايشته مسلمان اولميان كيمسهلر، إسلام كتابنڭ قيمتنى تقدير ايدوب إستفاده ايدرلرسه، اويانيق مسلمان تورك گنجلگى عجبا داها فضله طورابيلير مى؟ قطعا و أصلا طوراماز و اويوياماز.
معبودِ ذىشانمز اولان جنابِ حق، گنجلگمزڭ أڭ علوى و أڭ قدسى إحتياجلرينه تام جواب ويرهجك بر علمِ حقيقت خزينهسنى يگرمنجى عصرده ده ميدانه گتيرمشدر. ايشته بو زنگين دفينۀِ علميه، قرآنِ كريمڭ حقيقى و پارلاق بر تفسيرى اولان رسالۀِ نوردر. بو أثرلر، قرآنِ حكيمدن ترشّح ايتمش و اونڭ أساسلرى دائرهسنده يازيلمشدر. أثرى تأليف ايدن: بديع الزماندر. بتون حقيقى علم آدملرى -متّفقًا- رسالۀِ نورڭ بو محتشم مؤلّفنڭ، بديع الزمان دينمهيه لايق بر شخصيت اولديغنى تصديق ايتمشلردر. رسالۀِ نور أثرلرينڭ ملّت و گنجلگى ضلالت و صاپقينلق گردابلرندن قورتارهجق بر تفسيرِ قرآن اولديغنى تقدير و تحسينلرله تصديق ايتمشلردر. بويله اولديغى حالده، بو قدر بيوك بر شاه أثرڭ مؤلّفنى بوگون هركس تام طانيمييور دينيلهبيلير.
أوت آرقداشلر، ايچمزده اون بش يگرمى سنهدر قومونيستلر و دين دشمنى جريانلر چوقلقله چاليشييورلرمش. بويله داهيلريمزى طانيتمق شويله طورسون، درلو درلو إسنادلرله كوتولهمشلر. بوڭا موفّق اولمق ايچون ده بتون إمكانلردن إستفاده ايتمگه چاليشمشلر. حقيقى و مجاهد علم آدملريمزى ملّته فنا گوسترمك ايچون بتون غيرتلرينى صرف ايتمشلر. بو فجيع حالڭ بويله اولديغنى، دموقراسينڭ مملكتمزده شو ييللرده گليشمگه باشلاماسى سايهسنده آڭلامش بولونويورز. مگر آلدانمشز و آلداتيلميشز. شيمدىيه قدر دين آدملريمز حقّنده بزه ياپيلان اويدورما تلقيناتلرى و يالان ياڭليش پروپاغندهلرى، بو حقيقتلره واقف اولدقدن صوڭره قفامزدن چيقارهبيلدك. منفى إنطباعلريمزى سيلدك. حقيقى منوّرلرڭ إستفاده ايتدكلرى قدسى كتابمز قرآنه صاريلدق. و قرآنِ حكيمڭ بو عصرده يوكسك بر تفسيرى اولان رسالۀِ نوردن، قرآن و ايمان حقيقتلريله منوّر اولمغه باشلادق.
أوت عبد القادرِ گيلانى، إمامِ غزالى و مولانا جلال الدينِ رومى گبى إسلاميتڭ برر گونشى اولان داهى بيوكلريمزڭ أثرلرينى و حقيقى قيمتلرينى بوگونكى گنجلك ناصل بيلهمييورسه، بديع الزمان سعيد النورسى گبى مِثلسز بر مفسّرِ قرآنى ده تام طانيهمامشدر. أساسًا گيزلى و آشكار دين دشمنلرينڭ بر طاقم قصدِ مخصوصلريله، طانينماسنه ميدان ويريلمهمشدر. فقط بويله بيوك بر مفسّرڭ و بر إسلام داهيسنڭ بو عصرده ده موجود اولديغنى شخصى غيرتلريله اوگرننلر، بديع الزمانڭ تاريخى و جهانشمول دگرينى درحال إدراك ايتمكده و أثرلرندن فائدهلنمق ايچون جان آتمقدهدرلر.
أوت آرقداشلر، قطعى و كامل بر قناعتله دييهبيليرز كه: بو عصردهكى إنسانلرى سعادته قاووشديراجق، اونلرى عقلًا و قلبًا إقناع ايدهجك أثر آنجق رسالۀِ نوردر. بو حكم، نور رسالهلرينى اوقويان منوّرلرڭ قطعى بر حكميدر. هم بو قناعتڭ إصابتنى رسالۀِ نوردهكى علمى قدرت و اوريژيناللك آچيقجه گوسترمكدهدر.
آرقداشلر! ناصل قرآنِ كريمه صاريلانلرڭ دنيا و آخرتلرى معمور اولورسه؛ اونڭ پارلاق بر تفسيرى اولان رسالۀِ نورى اوقويوب عمل ايدنلر ده، حقيقى سعادته ايريشهجكلردر. بو ايمانى أثرلرى اوقويان گنجلرڭ ايمانى قوّتلنهجك، إستقباللرى پارلايهجق، علم و عرفان صاحبى اولاجقلردر. هم وطنه، هم ملّته، هم آننه و بابالرينه فائدهلى، يوكسك أخلاقه صاحب گنجلر اولارق تمايز ايدهجكلردر. اللّٰهڭ خالص بر قولى، پيغمبرڭ حقيقى بر اُمّتى حالنه گلمك بختيارلغنه نائل اولاجقلردر.
رسالۀِ نور حقّنده بيلگى صوران آرقداشلريمزه گلنجه: بو خصوصده بر فكر ايدينهبيلمك ايچون، هيچ بر يردن ايضاحات آلمغه لزوم يوقدر. سز بو فيّاض أثرلرى اوقويڭ. بِالذّات كندى جهد و شخصى غيرتڭزله اونى آڭلامغه و طانيمايه چاليشڭ. او علم و عرفان خزينهسنه بِالذّات گيريڭز. ايشته آنجق او زمان، آرزو ايتديگڭز معلوماتى حقّيله ألده ايتمش اولاجقسڭز.
أوت رسالۀِ نورى اوقودقجه، قرآن نورى ايچڭزه طولاجق، او قرآنى حقيقتلر عقلڭزى و قلبڭزى تنوير ايدهجك و ايمانڭزى إنكشاف ايتديروب قوّتلنديرهجكدر. نور رسالهلرينى اوقودقجه، إلٰهى بر فيض، روح و معنويات عالمڭزى قاپلاياجقدر. حياتده سزلره بيوك بر حضور و سعادتڭ رفاهى ايچنده ياشايهبيلمهنڭ قپولرى آچيلاجقدر. دنيانڭ بر آخرت مزرعهسى اولديغنى و بو فانى دنيايه، أبدى بر حياتڭ قزانيلماسى ايچون گلديگڭزى بو أثرلردن اوگرنهجك و بو ايمان جهتندن دنيانڭ جنّتدن داها ذوقلى اولديغنى حسّ ايدهجكسڭز. ايشته بويله صوڭسز و معنوى بر شوق و عشقله دنيايى، شو گچيجى حيات ايچون دگل؛ أبدى بر حياتى و باقى بر سعادتى قزانمق ايچون سَوهجكسڭز.
هم نماز قيلمانڭ و عبادتڭ، بيوك و قدسى بر ذوق اولديغنى بر قات داها آڭلايهجقسڭز. نمازده ربِّ رحيممزڭ، اللّٰهمزڭ حضورنده طورمقدن او قدر درين و إلٰهى بر ذوق طويمغه باشلايهجقسڭز كه؛ نمازسز گچن گونلريڭز إضطراب و صيقنتيلرله طولاجق. أڭ سَوينجلى، أڭ مسعود آنلريڭزى، اللّٰهه عبادت و طاعتده بولاجقسڭز.
آرقداشلر! رسالۀِ نور، يگرمنجى عصرڭ مسلمانلرينى و بتون إنسانلرى، قويو فكر قراڭلقلرندن و مدهش ضلالت يوللرندن قورتارمق ايچون مؤلّفڭ كندى إختياريله دگل، بر إحسانِ إلٰهى اولارق يازيلمش اولان إلهامى بر أثردر. ايشته إنسان اوزرندهكى تأثيرى پك بيوك اولان بويله بر أثرى دواملى اولارق تأنّى ايله و لغتلرڭ معنالرينى اوگرنهرك دقّتله اوقويهبيلسهڭز، گيجهلى گوندوزلى چاليشان بر چوق نور طلبهلرى گبى سز ده بيوك بر حضور و سعادته قاووشورسڭز. هم غايت جوّال و فعّال بر حاله گليرسڭز. او قدسى أثرلرى گونلرجه اوقويهبيلمهنڭ إلٰهى حظّى ايله چيرپنيرسڭز. بو گبى قيمتلى ئولچويه صيغميان أثرلرله مشغول اولابيلمك ايچون بش دقيقهيى بيله بوشه گچيرمزسڭز. و هم دائما جيبڭزده، چانطهڭزده نورلرى طاشيمق، اوقومق؛ دائما اوقومق ايچون زمانلريڭزى بيوك بر قيمتله قيمتلنديرهجكسڭز. نورلرى اوقومق سَوْگيسيله، نورلرى اوقومق هيجانيله، نورلرى اوقومق إحتياجيله يانهجقسڭز.
أوت آرقداشلر! رسالۀِ نور اويله جاذبهدار بر أثردر كه؛ رسالۀِ نورله قرآنه و ايمانه خدمت ايتمهنڭ قدسيت و بيوكلگنى آڭلادقجه، دنياده ايكن سزلرى جنّته دعوت ايتسهلر؛ بويله مقدّس بر وظيفهيى، بويله علوى بر سعادتى شيمدى بيراقوب گيتمك ايستهميهجكسڭز. ايمان جهتيله و ايمانى قورتارمق دعواسنه خدمت ايتمك غايهسيله، دنيانڭ بر معنوى جنّت حكمنده اولديغنى حسّ ايدهجكسڭز.
رسالۀِ نوره چاليشانلر، ايمان و إسلاميت خدمتى اوغرنده اويله بر فراغت و فداكارلغه صاحب اولمشلر كه؛ اونلرده منفعتِ شخصيه دينيلن عادى و بياغى مقصدلر ير بولامامش و طوتونهمامشدر. زيرا نور طلبهلرنده أڭ برنجى مقصد و أڭ بيوك غايه، رضاءِ إلٰهيدر. اللّٰهه حدسز شكرلر اولسون؛ رسالۀِ نوره چاليشمانڭ، مقدّس كتابمز قرآنِ عظيم الشانه خدمت اولديغنى اوگرنن اويانيق و قيمتدار و فداكار آرقداشلريمز ميليونلرى گچمشدر. عقلى يرنده اولانلر ايچون پك آشكار اولارق گورونن بو حقيقتى، هيچ بر فرد إنكار ايدهممكدهدر. اللّٰه ايچون بر چاليشمه اولان رسالۀِ نور فعاليتلرنده، إلٰهى بر عشق و شوقله، قلبى و روحى بر سَوْگيله گيجه اويقولرينى دخى فدا ايدنلر اولمقدهدر.
باقڭز!.. رسالۀِ نوره خدمت ايدن نورڭ اويله حقيقى طلبهلرى وار كه؛ اونلردن بريسنه دينيلسه: «رسالۀِ نور يرينه شو كتابلرى إستنساخ ايت ده، آمريقالى ميلياردر فوردڭ ثروتنى سڭا ويرهلم.» رسالۀِ نورڭ سطرلرندن قلمنڭ اوجنى بيله قالديرمدن، او بختيار طلبه شويله جواب ويرهجكدر:
-دنيايى، ثروتيله و سلطنتيله ويرسهڭز قبول ايتمهم. چونكه جنابِ حق بزه، رسالۀِ نورڭ مطالعهسى و خدمتيله توكنمز، باقى بر خزينه ويرهجكدر. عجبا سزڭ او دنيوى ثروتڭز بنى مسعود ايدهجك ميدر؟ بو شبههليدر. فقط ربّمزڭ إحسان ايدهجگى باقى ثروت ايله حقيقى بر سعادته قاووشهجغمزده شك و شبهه يوقدر.
قيمتلى قارداشلرم! رسالۀِ نورڭ يوكسك دگرينى آڭلامقده ويا اونى ايشيدوب طانيمقده برآز گيجيكمش اولان گنجلر، ايچلرى صيزلايه صيزلايه شويله ديمكدهدرلر: «شو گج اويانان قيمتدار گنجلگمى فانى، گچيجى شيلرله ضايع ايتميهجگم. آنجق و آنجق قرآنه و ايمانه خدمت اوغرنده، سَوْگيلى اللّٰهڭ و سَوْگيلى پيغمبريمڭ أمرلرينه إطاعت يولندهكى خدمتلره وقف ايدهجگم. آنجق بويلهلكله، بو موقّت گنجلگمده باقى بر گنجلگى ألده ايتمش اولاجغم.»
رسالۀِ نوره بو قدر باغلانيلديغنى گورونجه، دنيادن علاقهمزڭ كسيلديگى ظنّنه واريلماسين؛ بِالعكس بو جهت، شو خطِّ حركتمزله تبارز ايدر: مجرّد ايسهك ايشلريمزى، طلبه ايسهك درسلريمزى، مأمور ايسهك وظيفهمزى، تجّار ايسهك تجارتمزى ياپييورز. دنيوى مشغلهمز نه قدر فضله بولونورسه بولونسون، درس و إمتحانلريمز نه درجه صيقى اولورسه اولسون، رسالۀِ نوره چاليشمغه و خدمته ينه وقت بولويورز و بولابيليرز. زمان آييرييورز و آييرابيليرز. زيرا ناصلكه هر گون أكمك، صو و هوايه إحتياج وار. عينًا اويله ده، بونلردن داها فضله اولارق، هر گون قرآن و ايمان حقيقتلرندن معنوى غدالريمزى آلمغه محتاجز.
أوت رسالۀِ نورله اولان إشتغالمز، ايش و درسلريمزدهكى موفّقيتى قات قات آرتديرهرق بزه قوّت و هوس ويرييور. بزده، دنيايه دين ايچون چاليشمق فكرينى اويانديرييور. بزه وقتڭ قيمتنى إدراك ايتديرييور. تقويم ياپراقلرينڭ گرى دونميهجگنى قلب و عقلمزه تأثيرلى بر صورتده إخطار ايدهرك، عمر سرمايهسى اولان زمانمزى قيمتلنديرمك شوق و عزمڭى ويرييور. چاليشمه ساعتلرنده شوراده بوراده بوش بوشنه ويا لزوملى ظنّنه قاپيلديغمز و فقط بزجه فائدهسز شيلرله وقتلريمزى ئولديرمكدن بزى قورتارييور. حتّى إستراحت زمانلرنده دخى، ايمان حقيقتلرينه چاليشمه سَوْگيسنى حصوله گتيرهرك، رحمتِ إلٰهينڭ حركت ايچنه درج ايتديگى فعاليت ذوقنى طاتديرييور. بويلهجه فانى بر عمرده، باقى بر حياتى قزانمانڭ يولنده يوروتويور.
قيمتلى قارداشلرم! رسالۀِ نورڭ يوكسك دگرينى تام بيان ايتمك ممكن دگلدر. اونڭ قيمتى، اونى دائمى و صداقتله اوقويانلرڭ روحنى او قدر صارييور، او قدر كندينه رام و مفتون ايدييور كه؛ تحقيقى ايمان مرتبهلرنده ترقّى ايدن او فداكارلردن برينڭ باشنه بتون دين دشمنلرى طوپلانوب رسالۀِ نوردن واز گچيرمگه چاليشسهلر، ينه موفّق اولامازلر و اولامديلر.
بن كه، رسالۀِ نورى تأليف ايله وظيفهلنديريلن و إستخدام ايديلن استادڭ خدمتجيسى اولمايى أڭ بيوك بر نعمت بيليرم. خدمتجيسنڭ خدمتجيلگنى ياپمغى بر شرف عدّ ايدرم. بو قلبى و صميمى باغليلغى چوق گورنلر اولابيلير؛ فقط هيچ ده فضله بولمامليدر.
مثلا: قيمتلى بر أثر اوقورز، مؤلّفنه قارشى ايچمزده آز چوق بر تقدير حسّى بليرر. موليرڭ، هوغونڭ، گوتهنڭ أثرلرينه بر حيرانلق طويارز. عجبا، إسلام ديننڭ رهبرى اولان قرآنِ حكيمى تفسير ايدن بر إسلام داهيسنڭ شخصنه قارشى باغليلغڭ درجهسى ناصل اولماليدر؟ او مشهورلردن برينڭ أثرى كاغده يازيليرسه، بديع الزمان سعيد النورسىنڭ قرآن تفسيرى اولان نور رسالهلرينى آلتون صحيفهلره نقش ايتمك لازمدر. دينه معارض اولميان مستقل بر فيلوزوفڭ أثرينى تدقيق ايچون ساعتلرجه چاليشليرسه، ايكى جهانڭ سعادتنى درس ويرن بديع الزمانڭ أثرلرينى اوقومق ايچون اويقولريمزى ترك ايتمك گركدر.
أوت دنيوى بر كتابه بش ليرا اودرسك، رسالۀِ نور گبى دنيا و آخرتده إنسانى مسعود قيلان و أڭ يوكسك بر موقع و شرفه نائل اولان بر تفسيرِ قرآنه يوز ليرا ويررز و ويرييورز. ايجاب ايدرسه اونڭ نشرى اوغرنده ثروتمزى ده فدا ايتمك، إسلام جنگاورلرينڭ طورونلرى اولان بز گنجلره لازم و ألزمدر، آرقداشلر!...
اويله ايسه گليڭز قارداشلرم!...
نورلرڭ درسنده ديز ديزه، خدمتنده أل أله، جهادِ دينيهده اوموز اوموزه ويرهلم؛ نورلردن نور آلمغه، ايمانى درسلرندن درس آلمغه شدّتله محتاج اولديغمز نور رسالهلرينه برابرجه چاليشهلم. گوروشهلم، قونوشالم. اللّٰه يولنده، دين يولنده قوشهلم. دينسزلره قارشى مجادله بايراغنى آچارق جهادِ دينيه ميدانلرنده، خدمتِ ايمانيه محيطلرنده طاتلى جانلريمزى فدا ايدهلم.
قيمتلى قارداشلرم!... رسالۀِ نورده چوق اوستون مزيت و خصوصيتلر واردر. او ممتاز و مستثنا خاصيتلر، شيمدىيه قدر تأليف ايديلمش اولان هيچ بر أثرده گورولمييور. عمرينى اوقومقله گچيرن حقيقى علم آدملرندن رسالۀِ نورى اوقويانلر بو حقيقتى إظهار ايدييورلر. و او قدرشناس و اوستون شخصيتلر بو زمانده ياشايان إنسانلرڭ، علمى نه قدر زنگين اولورسه اولسون، رسالۀِ نورى اوقومغه محتاج اولدقلرى قناعتنه وارييورلر. أنانيت و علمى قيصقانجلق گبى خستهلقلره مبتلا اولمقدن قورقان فضيلتلى عالم و منوّرلر رسالۀِ نوره درحال صاريلييورلر. بعضلرى آلتمش يتمش ياشلرنده اولديغى حالده ينه نور رسالهلرينه طلبه اولمق شرف و نعمتنى قزانمغه چاليشييورلر.
بديع الزمان سعيد النورسى حضرتلرى دييور كه: «رسالۀِ نور باشقه كتابلر گبى يالڭز علم ويرمييور، اونڭ معنوى درسى ده واردر.» ايشته بو معنوى ديرسڭ تأثيريدر كه؛ رسالۀِ نورى اوقويانلرڭ روح و قلبلرى، وجدان و لطيفهلرى او فيّاض درسدن حصّهلرينى و غدالرينى آلييورلر. بو معنوى ديرسڭ نفوذى دگل ميدر كه؛ نور رسالهلرينى اوقويانلرڭ معنوى عالملرى إلٰهى نورلرله ييقانييور. و إلٰهى بر جاذبه و إلٰهى بر تأثير ايله ايمان حقيقتلرينه مسخّر و مفتون و مجلوب بر حاله گلهرك اللّٰه و رسول اللّٰه يولنده يوكسهلييورلر.
علمِ ايمان عاشقلرى، رسالۀِ نور اوقويور. دينى معلومات مراقليلرى، رسالۀِ نور اوقويور. حقيقت آراييجيلرى، رسالۀِ نور اوقويور. مجادلهجى مجاهد فطرتلر، رسالۀِ نور اوقويور. حماست، بهادرلق و قهرمانلغڭ شاهقهسنه ايريشمك ايستهين قابليتلر، رسالۀِ نور اوقويور. ملّيتجيلر، رسالۀِ نور اوقويور. فن و صنعت أربابى، رسالۀِ نور اوقويور. مثبت علم حيرانلرى، رسالۀِ نور اوقويور. أهلِ تصوّف، رسالۀِ نور اوقويور. أدبيات مراقليلرى رسالۀِ نور اوقويور. ديمك هر بر طبقۀِ إنسانيه رسالۀِ نوره روحنده بيوك بر إحتياج طويمقده و اوندن إستفاده ايتمكدهدرلر.
آرقداشلر! رسالۀِ نورى اوقويانلرڭ إقناع قابليتى آرتار، عقل و منطغى ايشلر و قوّت بولور. هر هانگى بر موضوعى، سويهسى نسبتنده مقنع بر صورتده إفاده ايدهبيلمك مزيتنه صاحب اولور. زيرا او نورجى، باشدن باشه عقلى، منطقى و مقنع بر شاه أثرڭ شاهانه درسلريله تنوّر و تفيّض ايتمكدهدر.
حقيقى مدنيتڭ و يوكسك إچتماعياتڭ، إنسانلق قانونلرينڭ منبعى و أساسى، قرآندر. قرآن عموم نوعِ بشره خطاب ايدن بر خطيبِ عموميدر. قرآنِ حكيمڭ حقيقى و برّاق و پارلاق بر تفسيرى اولان رسالۀِ نورده آراديغڭز ايمانى و إسلامى، عقلى و فكرى، قلبى و روحى بر چوق إحتياجلريڭزڭ تطمين ايديلديگنى گورهجكسڭز. قفاڭزدهكى بر قسم إستفهاملرڭ تام إقناع ايديجى بر طرزده جوابلانديريلديغنى بيوك بر حيرانلق و شكران حسلرى ايچنده مشاهده ايدهجك و رسالۀِ نورڭ، كنديڭزه خطاب ايدن إلٰهى حقيقتلر مجموعهسى اولديغنه قانع اولارق صوڭسز بر حضور ايچنده مسعودانه بر حيات ياشامغه باشلايهجقسڭز. او نورلرى دفعهلرجه و حتّى بر عمر بوينجه اوقومق ذوق و سَوْگيسندن كنديڭزى قورتاراميهجقسڭز.
رسالۀِ نور موضوعنى بيوك بر علاقه ايله تعقيب ايدن اويانيق آرقداشلرم!
قرآنِ كريمڭ معناسى بيلينمسه ده اوقونديغى و ديڭلنديگى زمان روحلرده ناصلكه معنوى و درونى بر تأثير حصوله گلير. زيرا كلام، اللّٰه كلاميدر. بو كلام اللّٰهدهكى و إسلاميتدهكى معنانڭ قدسيتيدر كه؛ توركلر إسلاميتله جهانگير اولديلر، قطعهلر بلدهلر فتح ايتديلر. بيڭ سنهدن بَرى إسلاميتڭ بايراقدارلغنى ياپمقدهدرلر. عينًا اويله ده، قرآنڭ بو عصرده يوكسك بر تفسيرى اولان رسالۀِ نوردهكى بعض بحثلرى باشلانغيجده تمامًا آڭلايهمازسهڭز ده، اونڭ معنوى تأثيرى و معنوى فيضى، روح و قلبڭزه نفوذ ايدر. معنا عالمڭزى إستيلا ايدر. قطعيًا إستفادهسز قالمازسڭز و قالمييورز.
هم إنسان، يالڭز عقلدن عبارت دگلدر. قلب، روح، سرّ و وجدان گبى معنوى لطيفه و جهازاته ده مالكدر. عقلڭز، هر بر مسئلۀِ ايمانيهيى برنجى اوقويوشده حقّيله قاوراياماسه ده، قلب و روح اوندن حصّهسنى آلير. رسالۀِ نورڭ بو معنوى تأثيريدر كه، رسالۀِ نورڭ ايلك تأليفى زماننده سكز اون نور طلبهسى واركن، شيمدى ميليونلر اولمشدر. دنيا فكر جريانلرى ايچنده أڭ قوّتلى بر ايمان جريانى اولارق آناطولىيى إستيلا ايتمش. آوروپا، آمريقا، آسيا قطعهلرينه قدر وارلغنى و قوّتنى قبول ايتديرمش؛ دين دشمنلرينى دهشته دوشورهرك مغلوبيته دوچار ايتمش؛ ايمان و إسلاميته حيات و حركت ويرمش؛ نسلِ جديدى إهتزازه گتيرمش و قهرمان و جنگاور فطرتلرى إنكشاف ايتديرهرك، جهادِ إسلاميه ميدانلرنده هر شيئنى ايمان اوغرنده فدا ايتديرهجك درجهده قوشديرمشدر و قوشديرمقدهدر. نهايت، دنيانڭ و عالمِ إسلامڭ فوق العاده تقدير و حيرانلغنه مظهر اولمش و اولمقدهدر.
بونڭ ايچون، دواملى اوقومغه هر گون دوام ايديڭز. كندينى تكرار تكرار، ذوقله و شوقله اوقوتان بو شاه أثر كلّياتنى اوقودقجه، آڭلايشڭز زيادهلشهجكدر. آڭلامهنڭ تك چارهسى: نورلرله باش باشه قالوب، ذهنى جهد صرف ايدهرك، تكرار تكرار اوقومق سَوْگيسيله پايدار اولمقدر.
محترم آرقداشلرم! رسالۀِ نورڭ اسلوبى، أمثالسز و هيچ بر اُسلوبله قابلِ قياس اولميان جاذب بر اسلوبدر. بديع الزمان سعيد النورسى بر مفسّرِ قرآن اولمقله برابر، عصريمزڭ أڭ بيوك أديبى و قوّتلى بر بليغيدر. فقط لفظڭ گوستريش و طنطنهسنه دگر ويرن أديبلردن دگلدر. بِالعكس أڭ فضله معنايه أهمّيت و قيمت ويروب، لفظڭ خاطرى ايچون معنادن فداكارلق ياپميان، ألبسه ايچون وجوددن كسمهين بر مؤلّفدر. او، ذاتنه خاص و غايت مؤثّر و غايت جاذبهدار بر اُسلوبِ بيانه صاحبدر. بونڭ ايچون نور رسالهلرنده، قرآن و ايمان حقيقتلرى أڭ برّاق و أڭ مكمّل، أڭ جاذب و أڭ مؤثّر بر طرزده ايضاح و إثبات ايديلمشدر.
رسالۀِ نور، جامع حقيقتلر و وجيز سوزلر خزينهسيدر. بر جملهده بر صحيفهلك، بر صحيفهده اون صحيفهلك، بر رسالهده بر كتابلق معنا إفاده ايدن و جامع الكلام خصوصيتنه مالك اولان بر شاه أثردر. بونڭ ايچوندر كه؛ درسلرى چوق تأثيرليدر و غايت نافذدر. متخصّص ذاتلرجه معلومدر كه؛ ايمانى مسئلهلرده فضله تفصيلات، ديرسڭ تأثير و تفهيمنى زورلاشديرهبيلير. او درسلرڭ قناعت ويريجى و تطمينكار اولماسنده چوق دفعه فائدهلى بر نتيجه ألده ايديلهمز. بو حقيقته بناءً، بِالخاصّه ايمانى حقيقتلرڭ مجمل اولارق درس ويريلمسى داها تأثيرلى و داها ويريملى و داها آڭلايشلى اولور و اولمقدهدر. بو دستوره إستنادًا، رسالۀِ نور تفصيلاته و تفرّعاته طالمامشدر. ذهنى تفرّعاتله طاغيتمامق متودينى أساس طوتمشدر.
ايمان علمنه مشتاق آرقداشلرم! بديع الزمان سعيد النورسى، إخلاص رسالهسنڭ صوڭنده، بزلره چوق بيوك بر مژده ويرييور. او قدر خارقه بر قولايلغى بشره تقديم ايدهبيلمك، عصريمزه قدر هيچ بر مؤلّفده گورولمهمشدر قناعتندهيز.
دييور كه: «بو رسالهلرى آڭلايهرق و قبول ايدهرك بر سنه اوقويان، بو زمانڭ حقيقتلى بر عالمى اولابيلير.»
أوت فن بتون خيزيله ايلرلهمكدهدر. معنوياتده يوكسلمك ده بونڭله موازيدر. مادّى آلانده، بر ساعتلك يولڭ بر ثانيهيه اينديريلديگى بر دورى ياشييورز. معنويات ساحهسى ايسه، داها سرعتلى و داها وسعتليدر. أسكى زمانده ياريم عصرده ألده ايديلهبيلن علمِ حقيقت، شيمدى قيصه بر زمانده قزانيلهبيلييور. بلكه ده داها آز بر مدّتده عين ثمره و نتيجه حاصل اولويور. جنابِ حقّڭ رحمت و كرميله بو عصر مسلمانلرينه و إنسانلرينه لطف بيورديغى بو قدر سلامتلى و قولاى ألده ايديلهبيلهجك إسلامى بر معارفڭ، ايمانى بر نتيجهنڭ موجوديتنى ايشيدن و عقلى باشنده اولان هر إنسان، خصوصًا هر مسلمان؛ بو زنگين ثروته مالك اولمق ايچون، نور رسالهلرينه بيوك بر صداقت و سَوْگيله چاليشمقدن ناصل گرى قالابيلير؟
غيرتلى آرقداشلرم! او قدر دگرلى، او قدر قيمتدار بر أثر كلّياتنى بر آن أوّل اوقومق و اونلردن هر گون ايمانى و إسلامى غدالريڭزى آلمق ايچون بتون همّت و وارلغڭزله چاليشهجغڭزدن أمينم. بويله اولماڭزى تمنّى ايدييورم. زيرا گنجلك گيدييور، عمر گچييور، زمانلر گرى گلمييور...
أوت بز، نه معلّملريمزدن بر مدد و نه ده پدر و والدهلريمزدن بر تشويق بكلهمييورز و بكلهمهيز. بز آنجق اللّٰهڭ عنايتيله كندى كنديمزى يتيشديرمك ضرورت و ثباتندهيز. إن شاء اللّٰه دوام و صداقتله چاليشهرق مطلقه يوكسلهجگز. تا، ايمان و إسلاميت مراتبنڭ ذروهسنه اولاشهجغز. قلبمزى نورِ قرآنله، قفامزى علمِ ايمانله آيدينلاتهجغز. قلب و عقلمزى چاليشديرهجغز. اللّٰهڭ خاص و خالص فقط مجاهد بر قولى، رسول اللّٰهڭ إخلاصلى فقط فداكار و جنگاور بر اُمّتى اولمق يولنده نور رسالهلريله يورويهجگز و ايلرلهيهجگز.
رسالۀِ نوردن أسكيمز يازى اوگرنمگه گلنجه:
قرآن يازيسيله اولان نور رسالهلرينى يازمقدهكى قزانجمز چوق بيوكدر. أسكيمز يازىيى قيصه بر زمانده اوگرنييورز. هم يازاركن معلومات ألده ايدييورز. هم رسالۀِ نور أجزالرينى چوغالتمقله، ايمانه و قرآنه خدمت ايديلديگى ايچون پك بيوك معنوى قزانجلر قزانييورز. هم يازيلاراق ايدينيلن بيلگى حافظهيه داها أساسلى يرلشييور. بونڭ ايچون شيمدىيه قدر بيڭلرله گنج رسالۀِ نورى يازهرق قرآن يازيسنى اوگرنمش و اوگرنمكدهدر.
قيمتلى قارداشلرم! رسالۀِ نورڭ بر چوق مزيت و خصوصيتلرندن بر قاچنى داها سزلره نقل ايدهجگم: رسالۀِ نوردهكى خارق العاده علمى قوّت، تقليدى ايمانى تحقيقى ايمانه چويرييور؛ إنسانى صلابتلى و قوّتلى بر مسلمان، علميله عمل ايدن بر مؤمنِ كامل اولمغه طوغرى گوتورويور. منحوس، پيس ذوقلردن نفرت ايتديروب واز گچيرييور. أڭ علوى و أڭ تميز، أبدى و سرمدى ذوق و حظلر ويرهجك حركتلره سَوق ايدييور. إنسانه حياتى سَوْديرييور. بدبينلكدن قورتاروب، ايمانلى بر نيكبينلك ويرييور. اويوشيق و تنبللرى جوّال ياپييور؛ روحى بر جولان إنسانڭ ايچ عالمنده حكمفرما اولويور. اورته حلّى دگل، أڭ ايلرى و أڭ يوكسك بر إنسان اولمق هوسنى اويانديرييور. غرور و كبر گبى كوتو أخلاقلرى قالديرييور. إنسانى تواضع، محويت و وقار گبى فضيلتلرله دگرلنديرييور. خصم طرفلرى باريشديرييور. فنالغه، فنالقله دگل، اييلكله مقابله ايتمك درسنى ويرييور. سز گبى تميز و تربيهلى گنجلرى، فنا بر محيطڭ فنا گورهنكلريله أخلاقسز حاله دوشمك فلاكتندن محافظه ايدييور.
ايشته بونڭ ايچوندر كه؛ رسالۀِ نورى صداقت و دوامله اوقويان حقيقى بر نور طلبهسى، أخلاقًا دوشوك إنسانلر آراسنده قالسه ده، أخلاقنى بوزمادن اونلردن اوزاقلاشوب كندينى قورتارييور.
هم أخلاق و تربيهسنى يوكسلتمك ايچون، نفس مجادلهسنه گيريشييور. رسالۀِ نوردن آلديغى معلومات و ايمانى قوّتله موفّق اولويور.
هم كندينى، او بوزوق جمعيته و كيمسهلره قاپديرمايور. بِالعكس رسالۀِ نورى نشر ايدهرك ايمانى أساسلرڭ ضعيفلامسى نتيجهسى اولارق بوزولان بر جمعيتى إقناع و إصلاح ايتمك جهدينه صاحب اولويور. إجتماعى يوكسك أساسلرله مجهّز بر إصلاحاتجى گبى، غايه و پرنسبنده ترقّيلر قيد ايدييور. دعواسنى يوروتمكده و يرلشديرمكده عادتا ظفردن ظفره قوشمايه باشلايور.
أوت آرقداشلر! بوگون إجتماعى درد و يارهلريمزى حلّ ايدوب تداوى ايدهجك أڭ أساسلى و أڭ تأثيرلى فاكتور و نظامى حاوى اولان بر حقيقت قايناغى واردر. او ده رسالۀِ نوردر. بونڭ ايچوندر كه، حقيقتى إدراك ايدهبيلن حقيقى منوّرلر و اويانيق مكتبليلر بيوك بر چغونلقله رسالۀِ نوره صاريلمقدهدرلر.
أوت دوشونجهمز، دائما ترقّى ايتمكده اولاجقدر. بو موقّت دنيانڭ، أبدى سعادتى قزانمق ايچون بر تجارتخانه اولديغنى رسالۀِ نور بزه درس ويرييور. بز ده، بتون حقيقى علملرڭ معدنى، أساسى، نورى و روحى اولان ايمان علمنى تحصيل و إكتساب ايتمك ايچون و مقدّس دعوامزده موفّق و قدسى مجادلهمزده مظفّر اولمق ايچون آزه قناعت ايتميهجگز. دائما يوكسلمك، دائما ايلرلهمك، دائما ترقّى ايتمك ايچون نور رسالهلرينه چاليشهجغز و چاليشديرهجغز.
١٩٤٧ قونيه نور طلبهلرى نامنه
زبير گوندوز آلپ
* * *