هو نكتهسى
﴿بِاسْمِهٖ سُبْحَانَهُ ۞ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ اَبَدًا دَائِمًا﴾
چوق عزيز و صدّيق قارداشلرم؛
قارداشلرم، (لَا اِلٰهَ اِلَّاهُوَ) و (قُلْ هُوَ اللهُ) دهكى (هُوَ) لفظنده يالڭز مادّى جهتده بر سياحتِ خياليۀِ فكريهده هوا صحيفهسنڭ مطالعهسيله آنى بر صورتده گورونن بر ظريف نكتۀِ توحيدده؛ مسلكِ ايمانيهنڭ حدسز درجه قولاى و وجوب درجهسنده سهولت بولونماسنى و شرك و ضلالتڭ مسلگنده حدسز درجهده مشكلاتلى، ممتنع بيڭلر محال بولونديغنى مشاهده ايتدم. غايت قيصه بر إشارتله او گنيش و اوزون نكتهيى بيان ايدهجگم.
أوت ناصلكه بر آووج طوپراق، يوزر چيچكلره نوبتله صاقسيلق ايدن قابنده أگر طبيعته، أسبابه حواله ايديلسه لازم گلير كه؛ يا او قابده كوچك مقياسده يوزر، بلكه چيچكلر عددنجه معنوى ماكينهلر، فابريقهلر بولونسون وياخود او پارچهجق طوپراقدهكى هر بر ذرّه، بتون او آيرى آيرى چيچكلرى، مختلف خاصيتلريله و حياتدار جهازاتيله ياپمالرينى بيلسين؛ عادتا بر إلٰه گبى حدسز علمى و نهايتسز إقتدارى بولونسون. عينًا اويله ده: أمر و إرادهنڭ بر عرشى اولان هوانڭ، روزگارڭ هر بر پارچهسى و بر نَفَس و طيرناق قدر اولان (هُوَ) لفظندهكى هواده؛ كوچوجك مقياسده، بتون دنياده موجود تلفونلرڭ، تلغرافلرڭ، راديولرڭ و حدسز و مختلف قونوشمالرڭ مركزلرى، سانتراللرى، آخذه و ناقلهلرى بولونسون و او حدسز ايشلرى برابر و بر آنده ياپابيلسين وياخود او (هُوَ) دهكى هوانڭ بلكه عنصرِ هوانڭ هر بر پارچهسنڭ هر بر ذرّهسى، بتون تلفونجيلر و آيرى آيرى عموم تلغرافجيلر و راديو ايله قونوشانلر قدر معنوى شخصيتلرى و قابليتلرى بولونسون و اونلرڭ عموم ديللرينى بيلسين و عين زمانده باشقه ذرّهلره ده بيلديرسين، نشر ايتسين. چونكه بِالفعل او وضعيت قسمًا گورونويور و هوانڭ بتون أجزاسنده او قابليت وار.
ايشته أهلِ كفرڭ و طبيعيّون و مادّيونلرڭ مسلكلرنده دگل بر محال، بلكه ذرّهلر عددنجه محاللر و إمتناعلر و مشكلاتلر آشكاره گورونويور. أگر صانعِ ذو الجلاله ويريلسه، هوا بتون ذرّاتيله اونڭ أمربر نفرى اولور. بر تك ذرّهنڭ منتظم بر تك وظيفهسى قدر قولايجه، حدسز كلّى وظيفهلرينى خالقنڭ إذنيله و قوّتيله و خالقه إنتساب و إستناد ايله و صانعنڭ جلوۀِ قدرتى ايله بر آنده شمشك سرعتنده و (هُوَ) تلفّظى و هوانڭ تموّجى سهولتنده ياپيلير. يعنى، قلمِ قدرتڭ حدسز و خارقه و منتظم يازيلرينه بر صحيفه اولور و ذرّهلرى، او قلمڭ اوجلرى و ذرّهلرڭ وظيفهلرى دخى، قلمِ قدرڭ نقطهلرى بولونور. بر تك ذرّهنڭ حركتى درجهسنده قولاى چاليشير.
ايشته بن (لَا اِلٰهَ اِلَّاهُوَ) و (قُلْ هُوَ اللهُ) دهكى حركتِ فكريه ايله سياحتمده هوا عالمنى تماشا و او عنصرڭ صحيفهسنى مطالعه ايدركن، بو مجمل حقيقتى تام واضح و مفصّل عين اليقين مشاهده ايتدم و (هُوَ) نڭ لفظنده، هواسنده بويله پارلاق بر برهان و بر لمعۀِ واحديت بولونديغى گبى؛ معناسنده و إشارتنده غايت نورانى بر جلوۀِ أحديت و چوق قوّتلى بر حجّتِ توحيد و (هُوَ) ضميرينڭ مطلق و مبهم إشارتى هانگى ذاته باقييور إشارتنه بر قرينۀِ تعيّن او حجّتده بولونماسى ايچوندر كه، هم قرآنِ معجز البيان، هم أهلِ ذكر مقامِ توحيدده بو قدسى كلمهيى چوق تكرار ايدرلر دييه علم اليقين ايله بيلدم.
أوت مثلا بر نقطه بياض كاغدده، ايكى اوچ نقطه قونولسه قاريشديغى و بر آدم، مختلف چوق وظيفهلرى برابر ياپماسيله شاشيراجغى و بر كوچك ذىحياته، چوق يوكلر يوكلنمهسيله آلتنده أزيلديگى و بر لسان و بر قولاق، عين آنده متعدّد كلمهلرڭ برابر چيقماسى و گيرمهسى إنتظامنى بوزوب قاريشهجغى حالده؛ عين اليقين گوردم كه: (هُوَ) نڭ آناختارى ايله و پوصولاسيله فكرًا سياحت ايتديگم هوا عنصرنده هر بر پارچهسى حتّى هر بر ذرّهسى ايچنه مختلف بيڭلر نقطهلر، حرفلر، كلمهلر قونولديغى ويا قونولهبيلهجگى حالده، قاريشمديغنى و إنتظامنى بوزماديغنى؛ هم آيرى آيرى پك چوق وظيفهلر ياپديغى حالده، هيچ شاشيرمادن ياپيلديغنى و او پارچهيه و ذرّهيه پك چوق آغير يوكلر يوكلنديگى حالده هيچ ضعف گوسترميهرك، گرى قالميهرق إنتظام ايله طاشيديغنى؛ هم بيڭلر آيرى آيرى كلمه، آيرى آيرى طرزده، معناده او كوچوجك قولاق و لسانلره كمالِ إنتظامله گلوب چيقوب، هيچ قاريشميهرق بوزولميهرق او كوچوجك قولاقلره گيروب، او غايت اينجهجك لسانلردن چيقديغى و او هر ذرّه، هر پارچهجق، بو عجيب وظيفهلرى گورمكله برابر كمالِ سربستيت ايله جذبهدارانه حال ديلى ايله و مذكور حقيقتڭ شهادتى و لسانيله (لَا اِلٰهَ اِلَّا هُوَ) و (قُلْ هُوَ اللّٰهُ اَحَدٌ) دييوب گزر و فورطنهلرڭ و شمشك و برق و گوك گورولتيسى گبى هوايى چارپيشديريجى طالغهلر ايچرسنده إنتظامنى و وظيفهلرينى هيچ بوزميور و شاشيرميور و بر ايش ديگر بر ايشه مانع اولمايور... بن عين اليقين مشاهده ايتدم.
ديمك يا هر بر ذرّه و هر بر پارچه هواده نهايتسز بر حكمت و نهايتسز بر قوّتى، قدرتى و بتون علمى، إرادهسى و نهايتسز ذرّاته حاكمِ مطلق بر خاصّهلرى بولونمق لازمدر كه؛ بو ايشلره مدار اولابيلسين. بو ايسه، ذرّهلر عددنجه محال و باطلدر. هيچ بر شيطان دخى بونى خاطره گتيرهمز. اويله ايسه بو صحيفۀِ هوانڭ حقّ اليقين، عين اليقين، علم اليقين درجهسنده بداهتله ذاتِ ذو الجلالڭ حدسز غيرِ متناهى علمى و حكمتله چاليشديرديغى قلمِ قدرت و قدرڭ متبدّل صحيفهسى و بر لوحِ محفوظڭ عالمِ تغيّرده و متبدّل شئوناتنده بر لوحِ محو إثبات نامنده يازار بوزار تختهسى حكمندهدر.
ايشته هوا عنصرينڭ يالڭز نقلِ أصوات وظيفهسنده مذكور جلوۀِ وحدانيتى و مذكور عجائبى گوسترديگى و ضلالتڭ حدسز محاليتنى إظهار ايتديگى گبى، عنصرِ هوائينڭ سائر أهمّيتلى وظيفهلرندن برى ده ألكتريق، جاذبه، دافعه، ضيا گبى سائر لطائفڭ نقلنده شاشيرمادن منتظمًا، أصوات نقلندهكى وظيفهيى گورديگى عين زمانده، بو وظيفهلرى گورديگى عين زمانده، بتون نباتات و حيواناته تنفّس و تلقيح گبى حياته لزومى بولونان لوازماتى كمالِ إنتظام ايله يتيشديرييور. أمر و إرادۀِ إلٰهيهنڭ بر عرشى اولديغنى قطعى بر صورتده إثبات ايدييور. و سرسرى تصادف و كور قوّت و صاغير طبيعت و قاريشق، هدفسز أسباب و عاجز، جامد، جاهل مادّهلر بو صحيفۀِ هوائيهنڭ كتابتنه و وظيفهلرينه قاريشماسى هيچ بر جهتله إحتمال و إمكانى بولونماديغنى عين اليقين درجهسنده إثبات ايتديگنه قطعى قناعت گتيردم و هر بر ذرّه و هر بر پارچه لسانِ حال ايله (لَا اِلٰهَ اِلَّا هُوَ) و (قُلْ هُوَ اللهُ اَحَدٌ) ديدكلرينى بيلدم و بو (هُوَ) آناختارى ايله هوانڭ مادّى جهتندهكى بو عجائبى گورديگم گبى، هوا عنصرى ده بر (هُوَ) اولارق عالمِ مثال و عالمِ معنايه بر آناختار اولدى. گوردم كه؛
عالمِ مثال، نهايتسز فوطوغرافلر و هر بر فوطوغراف، حدسز حادثاتِ دنيويهيى عين زمانده هيچ قاريشديرميهرق آلييور. بيڭلر دنيا قدر بيوك و گنيش بر سينهماءِ اُخرويه و فانياتڭ فانى و زائل حاللرينى و وضعيتلرينى و گچيجى حياتلرينڭ ميوهلرينى سرمدى تماشاگاهلرده و جنّتده سعادتِ أبديه أصحابلرينه دنيا ماجرالرينى و أسكى خاطرهلرينى لوحهلريله گوزلرينه گوسترمك ايچون پك بيوك بر فوطوغراف ماكينهسى اولارق بيلدم. (حاشيه)
___
(حاشيه): فقط ظاهر حقيقتلر گبى قوّتلى برهانلرله و حجّتلرله إثبات ايتمگه زمان و زمين، حال و وضعيت مساعده ايتمديگندن قيصه كسيلدى.
___
هم لوحِ محفوظڭ، هم عالمِ مثالڭ ايكى حجّتى و ايكى كوچك نمونهسى و ايكى نقطهسى إنسانڭ باشنده اولان قوّۀِ حافظه و قوّۀِ خياليه مرجمك كوچكلگنده ايكن، هيچ قاريشديرميهرق كمالِ إنتظام ايله ايچلرنده بر بيوك كتبخانه قدر معلوماتڭ يازيلماسى قطعى إثبات ايدر كه، او ايكى قوّهنڭ نمونۀِ أكبر و أعظملرى، عالمِ مثال ايله لوحِ محفوظدر.
هوا و صو عنصرلرينڭ، خصوصًا نطفهلرڭ صويى و هوا عنصرى طوپراق عنصرينڭ پك فوقنده داها زياده حكمت و إراده ايله و قلمِ قدر و قدرت ايله يازيلدقلرى و تصادف و كور قوّتڭ و صاغير طبيعتڭ و جامد و هدفسز أسبابڭ قاريشماسى يوز درجه محال و هيچ بر جهتله ممكن اولماديغى و حكيمِ ذو الجلالڭ قلمِ قدر و حكمتنڭ صحيفهسى اولديغى علم اليقين ايله قطعى بيليندى.
متباقيسى شيمديلك يازديريلمادى. عمومه بيڭلر سلام.
اَلْبَاقِى هُوَ الْبَاقِى
قارداشڭز
سعيد النورسى
❊ ❊ ❊