﴿بِاسْمِهٖ سُبْحَانَهُ ۞ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ اَبَدًا دَائِمًا﴾
عزيز، صدّيق، متفكّر قارداشلرم!
أوّلا: چوق أمارهلرله قطعى قناعتم گلمش كه؛ گيزلى دينسزلر، رسمى بعض مأمورلرى آلداتوب نورڭ محرم بيوك رسالهلرى ايچنده يالڭز رهبرى مصرّانه مدارِ إتهام طوتمالرينڭ و بر بچق سنهدن بَرى بڭا صيقنتى ويرمهلرينڭ سببى رهبردهكى «هو نكتهسى» اولديغنى قطعيًا بيلدم. چونكه بو هُوَنڭ كشف ايتديگى سرِّ توحيد، پك قطعى و بديهى بر صورتده كفرِ مطلقى قيرييور. حتّى بر قسمنده هيچ بر شبهه و وسوسه بيراقمييور. گيزلى دينسزلر بوڭا قارشى چاره بولامدقلرندن، إنتشارينه رسمى ياساق ايله سد چكمك ايچون چاليشديلر. بو هو نكتهسنڭ بر گون أوّل مدرسة الزهرا أركانلرينه بر درس نوعندن سويلهديگم چوق نقطهلرندن يالڭز اوچ نقطهسنى سزلره بيان ايدييورم.
برنجى نقطه: هوا عنصرينڭ يوكسك و أهمّيتلى بر وظيفهسى (اِلَيْهِ يَصْعَدُ الْكَلِمُ الطَّيِّبُ) آيتنڭ سرّيله، گوزل و معنيدار و ايمانى و حقيقتلى كلمهلرڭ قلمِ قدرڭ إستنساخيله و إذنِ إلٰهى ايله إنتشار ايتمهسيله بتون كُرۀِ هواده ملائكه و روحانيلره ايشيتديرمك و عرشِ أعظم طرفنه سَوق ايتمك ايچون قدرتِ إلٰهى قلمنڭ متبدّل بر صحيفهسى اولمقدر. مادام هوانڭ قدسى وظيفهسنڭ، حكمتِ خلقتنڭ أڭ مهمّى بودر. و روىِ زمينى راديولر واسطهسيله بر تك منزل حكمنه گتيروب نوعِ بشره پك بيوك بر نعمتِ إلٰهيه اولمقدر. ألبته و ألبته بشر بو پك بيوك نعمته قارشى، بر عمومى شكر اولارق؛ او راديولرى هر شيدن أوّل كلماتِ طيّبه اولان، باشده قرآنِ حكيم و حقيقتلرى و ايمانڭ و گوزل أخلاقلرڭ درسلرى و بشرڭ لزوملى و ضرورى منفعتلرينه دائر كلماتلر اولمالى كه او نعمته شكر اولسون. يوقسه نعمت بويله شكر گورمزسه، بشره ضررلى دوشر.
أوت بشر، حقيقته محتاج اولديغى گبى، بعض كيفلى هوساته ده إحتياجى وار. فقط بو كيفلى هوسات، بشده بريسى اولمالى. يوقسه هوانڭ سرِّ حكمتنه منافى اولور. هم بشرڭ تنبللگنه و سفاهتنه و لزوملى وظيفهلرينڭ نقصان بيراقيلماسنه سببيت ويروب بشره بيوك بر نعمت ايكن، بيوك بر نقمت اولور. بشره لازم اولان سعيه شوقى قيرار.
شيمدى گوزيمڭ اوڭندهكى ماكينهجك و راديو قابى، قرآنى ديڭلهمك ايچون اوطهمه گتيريلمشدى. باقدم، اون حصّهده بر حصّه كلماتِ طيّبهيه ويريلييور. بونى ده بر خطاىِ بشرى اولارق آڭلادم. إن شاء اللّٰه بشر بو خطاسنى تعمير ايدهجك. و بتون زمين يوزينى بر مجلسِ منوّر، بر منزلِ عالى و بر مكتبِ ايمانى حكمنه گچيرمگه وسيله اولان بو راديو نعمتنه بر شكر اولارق بشرڭ حياتِ أبديهسنه صرف ايديلهجك اولان كلماتِ طيّبه، بشده دردى اولاجق.
ايكنجى نقطه: نور رسالهلرنده دينيلمش كه: «كائناتى خلق ايدهمه ين، بر ذرّهيى خلق ايدهمز. بر ذرّهيى تام يرنده خلق ايدوب منتظم وظيفهلريله چاليشديران، يالڭز كائناتى خلق ايدن ذات اولابيلير.»
بو جملهنڭ كلّى حجّتلرندن بر جزئى حجّتى شودر كه: كلمهلرڭ أنواعنڭ قابى و محفظهسى اولان يانمدهكى بو راديو ماكينهجگندهكى بر آووج هوا، قطعيًا گوسترييور كه؛ شيمدى ألمزده باقديغمز راديو ايستاسيون جدولى نامندهكى ليستهده يازيلى ايكى يوزه ياقين مركزدن بر ساعتدن بر سنهيه قدر اوزاق و مختلف مسافهلردن عين دقيقهده بر تك كلمۀِ قرآنيه، مثلا «اَلْحَمْدُ لِلّٰه» كلامى تام حروفاتيله و شيوهسيله و سويله ينڭ مخصوص صداسنڭ طرزيله، بو ماكينهدهكى بر آووج هوانڭ ذرّهلريله هيچ تغيّر ايتمهدن قولاغمزه گلمك ايچون و مختلف كلماتِ قرآنيهيى آيرى آيرى صدا ايله، چشيد چشيد شيوه ايله، كذا هيچ تغيّر ايتمهدن و بوزولمادن بزم قولاغمزه گتيرمك ايچون او بر آووج هوانڭ هر بر ذرّهسنده اويله حدسز بر قوّت و إحاطهلى بر إراده و بتون روىِ زميندهكى مركزلرده او قرآنى اوقويان حافظلرڭ آيرى آيرى شيوهلرينى بيلهجك إحاطهلى بر علم و اونلرى بتون گورهجك و ايشيدهجك محيط بر گوز و هر شيئى بر آنده ايشيدهبيلير بر قولاق اولمازسه، ألبته بو معجزۀِ قدرت وجوده گلميهجك. ديمك بو بر آووجدهكى هوا ذرّهلرى، يالڭز و يالڭز بتون كائناتى إحاطه ايدن بر علم و إرادهنڭ و سمع و بصرڭ صاحبى بر ذاتڭ و هيچ بر شى اوڭا آغير گلمه ين و أڭ بيوك شى، أڭ كوچك شى گبى قدرتنه قولاى گلن بر قديرِ مطلقڭ قدرتى و إرادهسى و علميله بو معجزاتِ قدرته مظهر اولويورلر. يوقسه، تموّجاتِ هوائيهده موجوديتى توهّم ايديلن سرسرى تصادفڭ و كور قوّتڭ و صاغير طبيعتڭ ايجادينه ير ويرمك؛ هر بر ذرّهيى، بتون زمين يوزندهكى كُرۀِ هوائيهده بولونان هر شيئى گورور، بيلير و ياپار حاكمِ مطلق ايتمكدر. بو ايسه يوز بيڭ درجه عقلدن اوزاق، محال محاللر ايچنده بر خرافهدر. أهلِ ضلالت گلسينلر، مذهبلرى نه قدر عقلدن اوزاق و خرافه اولدقلرينى گورسونلر.
اوچنجى نقطه: بو راديو ماكينهجگنده و معنوى كلمات چيچكلرينه صاقسيلق ايدن بو قابجقدهكى بر آووج هوانڭ گوستردكلرى معجزاتِ قدرتدن بو حقيقت آڭلاشيلييور كه: هر بر ذرّه جنابِ حقّى ذاتيله و صفاتيله تعريف ايدر و إثبات ايدر. بتون كائناتى تفتيش ايدن حكمالر و علمالر بيوك و گنيش دليللرله، ذاتِ واجب الوجودڭ وجودينى و وحدتنى إثبات ايتمك ايچون بتون كائناتى نظره آليرلر. صوڭره معرفت اللّٰهى تام ألده ايدييورلر. حالبوكه ناصل گونش چيقديغى وقت بر ذرّهجك جام، عين دڭز يوزى گبى گونشى گوسترييور و او گونشه إشارت ايدييور. اويله ده، بو بر آووج هوادهكى هر بر ذرّه ده مذكور حقيقته بناءً عينًا كائنات دڭزندهكى جلوۀِ توحيدى، صفاتِ كماليله كنديلرنده گوسترييورلر.
ايشته قرآنِ حكيمڭ معنوى معجزهسنڭ بر لمعهسى اولان رسالۀِ نور بو حقيقتى ايضاحاتيله إثبات ايتمهسى ايچوندر كه؛ مدقّق بر نورجى، حضورِ دائمى قزانمق و معرفت اللّٰهى هر وقت تخطّر ايتمك ايچون و حضورِ دائمى خاطرى ايچون (لَا مَوْجُودَ اِلَّا هُو) ديمگه مجبور اولمايور. و ينه بر قسم أهلِ حقيقتڭ دائمى حضورى بولمق ايچون (لَا مَشْهُودَ اِلَّا هُو) ديدكلرى گبى، او نورجى بويله ديمگه محتاج اولمايور. بلكه (وَفٖى كُلِّ شَىْءٍ لَهُ اٰيَةٌ تَدُلُّ عَلٰى اَنَّهُ وَاحِدٌ) پارلاق حقيقتنڭ قدسى پنجرهسى اوڭا كافى گلييور. بو قدسى عربى فقرهنڭ قيصهجق بر ايضاحى شودر كه:
أوت هركسڭ بو عالمده برر عالمى وار، برر كائناتى وار. عادتا ذىشعورلر عددنجه بربرى ايچنده حدسز كائناتلر، عالملر وار. هركسڭ خصوصى عالمنڭ و كائناتنڭ و دنياسنڭ ديرگى كندى حياتيدر. ناصل هركسڭ ألنده بر آيينهسى بولونسه و بر بيوك سرايه مقابل طوتسه، هركس بر نوع سرايه، آيينهسى ايچنده صاحب اولور. اويله ده هركسڭ خصوصى بر دنياسى وار. بر قسم أهلِ حقيقت بو خصوصى دنياسنى (لَا مَوْجُودَ اِلَّا هُو) دييه إنكار ايتمكله، تركِ ماسوا سرّيله جنابِ حقّه قارشى حضورِ دائمى و معرفتِ إلٰهيه بولور. و بر قسم أهلِ حقيقت ده ينه دائمى معرفت و حضورى بولمق ايچون (لَا مَشْهُودَ اِلَّا هُو) دييوب كندى خصوصى دنياسنى نسيان حپسنه صوقار، فانيلك پردهسنى اوستنه چكر؛ حضورى بولمقله بتون عمرينى بر نوع عبادت حكمنه گتيرر.
شيمدى بو زمانده قرآنڭ إعجازِ معنويسيله تظاهر ايدن (وَفٖى كُلِّ شَىْءٍ لَهُ اٰيَةٌ تَدُلُّ عَلٰى اَنَّهُ وَاحِدٌ) سرّيله، يعنى ذرّهلردن ييلديزلره قدر هر شيده بر پنجرۀِ توحيد وار و طوغريدن طوغرىيه ذاتِ واحدِ أحدى صفاتيله بيلديرن آيتلرى، يعنى دلالتلرى و إشارتلرى وار. ايشته هو نكتهسيله بو مذكور حقيقتِ قدسيهيه و ايمانيهيه و حضوريهيه إجمالاً إشارتلر واردر. رسالۀِ نور، بو حقيقتى ايضاحاتيله إثبات ايتمش. أسكى زماندهكى أهلِ حقيقت بر درجه مجملاً و مختصرًا بيان ايتمشلر. ديمك بو دهشتلى زمان، داها زياده بو حقيقته محتاجدر كه، قرآنِ حكيمڭ إعجازيله بو حقيقت تفصيلاتيله إحسان ايديلمش، نور رسالهلرى ده بو حقيقته بر ناشر اولمشلر.
اَلْبَاقِى هُوَ الْبَاقِى
قارداشڭز
سعيد النورسى
❊ ❊ ❊
اون دردنجى سوزڭ ذيلندن
قيصهجق بر علاوه و أكدر
آلتنجى سؤالڭ تتمّهسى و حاشيهسى
أهلِ ضلالت و إلحاد، مسلكلرينى محافظه و أهلِ ايمانڭ إنتباهلرينه مقابله و ممانعت ايتمك ايچون، او درجه غريب بر تمرّد و عجيب بر حماقت گوسترييورلر كه، إنسانى إنسانيتدن پشيمان ايدر.
مثلا: بو آخرده بشرڭ بر درجه عموميت شكلنى آلان ظلملى، ظلماتلى عصيانندن عناصرِ كلّيه قيزدقلرندن و خالقِ أرض و سماوات دخى، دگل خصوصى بر ربوبيت، بلكه بتون كائناتڭ، بتون عالملرڭ ربّى و حاكمى حيثيتيله، كلّى و گنيش بر تجلّى ايله كائناتڭ هيئتِ مجموعهسنده و ربوبيتڭ دائرۀِ كلّيهسنده نوعِ إنسانى اويانديرمق و دهشتلى طغيانندن واز گچيرمك و طانيمق ايستهمدكلرى كائنات سلطاننى طانيتديرمق ايچون أمثالسز، كسيلمه ين بر صو، هوا، ألكتريقدن؛ زلزلهيى، فورطنهيى و حربِ عمومى گبى عمومى و دهشتلى آفاتى نوعِ إنسانڭ يوزينه چارپهرق اونڭله حكمتنى، قدرتنى، عدالتنى، قيّوميتنى، إرادهسنى و حاكميتنى پك ظاهر بر صورتده گوسترديگى حالده؛ إنسان صورتنده بر قسم أحمق شيطانلر ايسه، او كلّى إشاراتِ ربّانيهيه و تربيۀِ إلٰهيهيه قارشى أبلهانه بر تمرّد ايله مقابله ايدوب دييورلر كه: «طبيعتدر؛ بر معدنڭ پاطلاماسيدر، تصادفيدر. گونشڭ حرارتى ألكتريقله چارپماسيدر كه، آمريقاده بش ساعت بتون ماكينهلرى طورديرمش و قسطمونى ولايتى جوّنده و هواسنده سمايى قيزارتمش، يانغين صورتنى ويرمش.» دييه معناسز هذيانلر ايدييورلر. ضلالتدن گلن حدسز بر جهالت و زندقهدن نشئت ايدن چركين بر تمرّد سببيله بيلمييورلر كه: أسباب يالڭز برر بهانهدرلر، برر پردهدرلر. طاغ گبى بر چام آغاجنڭ جهازاتنى طوقومق و يتيشديرمك ايچون بر كوى قدر يوز فابريقه و تزگاه يرينه كوچوجك چكردگنى گوسترر: «ايشته بو آغاج بوندن چيقمش» دييه صانعنڭ او چامده گوسترديگى بيڭ معجزاتى إنكار ايدر مِثللو بعض ظاهرى سببلرى إرائه ايدر. خالقڭ إختيار و حكمت ايله ايشلهنن پك بيوك بر فعلِ ربوبيتنى هيچه اينديرر. بعضًا غايت درين و بيلينمز و چوق أهمّيتلى، بيڭ جهتده ده حكمتى بولونان بر حقيقته فنّى بر نام طاقار. گويا او نام ايله ماهيتى آڭلاشيلدى، عاديلشدى، حكمتسز، معناسز قالدى.
ايشته گل! بلاهت و حماقتڭ نهايتسز درجهلرينه باق كه: يوز صحيفه ايله تعريف ايديلسه و حكمتلرى بيان ايديلسه آنجق تماميله بيلينهجك درين و گنيش بر حقيقتِ مجهولهيه بر نام طاقار؛ معلوم بر شى گبى: «بو بودر» دير. مثلا: «گونشڭ بر مادّهسى، ألكتريقله چارپماسيدر.»
هم برر إرادۀِ كلّيه و برر إختيارِ عام و برر حاكميتِ نوعيهنڭ عنوانلرى بولونان و «عادت اللّٰه» ناميله ياد ايديلن فطرى قانونلرڭ بريسنه، خصوصى و قصدى بر حادثۀِ ربوبيتى إرجاع ايدر. او إرجاع ايله، اونڭ نسبتنى إرادۀِ إختياريهدن كسر؛ صوڭره طوتار تصادفه، طبيعته حواله ايدر. أبو جهلدن زياده مضاعف بر أجهليت گوسترر. بر نفرڭ ويا بر طابورڭ ظفرلى حربنى بر نظام و قانونِ عسكريهيه إسناد ايدوب؛ قوماندانندن، پادشاهندن، حكومتندن و قصدى حركاتدن علاقهسنى كسر مِثللو عاصى بر ديوانه اولور.
هم ميوهدار بر آغاجڭ بر چكردكدن ايجادى گبى، بر طيرناق قدر بر اودون پارچهسندن چوق معجزاتلى بر اوسته، يوز اوقّه مختلف طعاملرى، يوز آرشين مختلف قوماشلرى ياپسه؛ بر آدم او اودون پارچهسنى گوستروب ديسه: «بو ايشلر، طبيعى و تصادفى اولارق بوندن اولمش.» او اوستهنڭ خارقه صنعتلرينى، هنرلرينى هيچه اينديرسه، نه درجه بر حماقتدر. عينًا اويله ده... (سكوت!)
(سكوتڭ سببى شيمدى سويلهنهمز.)
اَلْبَاقِى هُوَ الْبَاقِى
سعيد النورسى
❊ ❊ ❊
﴿بِاسْمِهٖ سُبْحَانَهُ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ اَبَدًا دَائِمًا﴾
عزيز، صدّيق قارداشلرم!
أوّلا: سكسان سنه بر معنوى عمرِ باقى قزانديران شهورِ ثلاثهڭزى و مبارك قدسى گيجهلريڭزى و ليلۀِ رغائبڭزى و ليلۀِ معراجڭزى و ليلۀِ برائتڭزى و ليلۀِ قدريڭزى روح و جانمزله تبريك و هر بر نورجينڭ معنوى قزانجلرى و دعالرى عموم قارداشلرى حقّنده مقبوليتنى رحمتِ إلٰهيهدن رجا و خدمتِ نوريهده موفّقيتڭزى تبريك ايدرز.
ثانيًا: تسمّم وسيلهسيله نسيانِ مطلق خستهلغنڭ مصيبتى، بنم حقّمده بر نعمت و مرحمت حكمنه و بعض حقائقڭ كشفنه بر آناختار اولديغنى بڭا چوق آجيمامق ايچون خبر ويرييورم. فقط ينه دعاڭزى روح و جانمله رجا ايدييورم.
أوت شيمدى سراج النور باشندهكى مناجاتى اوقودم. الفت و عادت و يكنسقلق پردهلرى آلتنده چوق خارقه حقيقتلر گيزلهنييور گوردم. بِالخاصّه أهلِ غفلت و أهلِ طبيعت و فلسفهنڭ دينسز قسمى، بو عادت اللّٰه قانونلرينڭ پردهسى آلتنده چوق معجزاتِ قدرتِ إلٰهيهيى گورميوب؛ طاغ گبى بر حقيقتى، ذرّه گبى بر عادى أسبابه إسناد ايدر، يوكلتير. قديرِ مطلقڭ، هر شيدهكى معرفت يولنى سدّ ايدر. اوندهكى نعمتلرى كور اولوب گورميهرك، شكر و حمد قپوسنى قپايورلر.
مثلا: بر تك كلمهيى عين آنده ميليون، بلكه ميليار كلمه اولارق، جلوۀِ قدرت صحيفۀِ هواده إستنساخ ايتديگى گبى؛ (اِلَيْهِ يَصْعَدُ الْكَلِمُ الطَّيِّبُ) آيتنڭ رمزيله هر كلمۀِ طيّبه، بتون كُرۀِ هواده بردن، عادتا زمانسز، قلمِ قدرت ايله إستنساخ ايديلديگى گبى؛ معنوى و مقبول حقيقتلرڭ بر يازار بوزار تختهسى حكمنده اولان كُرۀِ هواده قدرتڭ عجيب بر معجزهسنڭ زمانِ آدمدن بَرى الفت پردهسى آلتنده أهلِ غفلت نظرنده صاقلانديغى گبى؛ شيمدى راديو نامى ويردكلرى عينِ حقيقت ايله ثابت اولمش كه: ايچنده حدسز بر علم و حكمت و إراده بولونان غيرِ متناهى بر قدرتِ أزليهنڭ جلوهسى، هر ذرّۀِ هوائيده حاضر و ناظردر كه؛ حدسز آيرى آيرى كلمهلر هر بر ذرّۀِ هوائينڭ كوچوجك قولاغنه گيروب، اينجهجك ديلندن چيقديغى حالده قاريشمييور، بوزولمييور، شاشيرمييور.
ديمك بتون أسباب طوپلانسه، تك بر ذرّهنڭ بو وظيفۀِ فطريهسندهكى جلوۀِ قدرتِ قدسيهيى هيچ بر جهتده ياپامديغى؛ و بو هر ذرّهنڭ حدسز اينجه كوچك قولاغنده و ديلنده غايت خارقه صنعته هيچ بر جهتده هيچ بر پارمق قاريشمديغى ايچون، أهلِ ضلالت و أهلِ غفلت الفت، عادت، قانونلق، يكنسقلق پردهسى ايله صاقلايوب؛ عادى بر إسم طاقوب، موقّت كنديلرينى آلداتييورلر.
مثلا: اون دردنجى سوزڭ ذيلنڭ حاشيهسنده دينيلديگى گبى: پك چوق معجزاتلى بر اوسته، بر طيرناق قدر بر اودون پارچهسندن يوز اوقّه مختلف طعاملرى، يوز آرشين مختلف قوماشلرى ياپسه؛ بر آدم، او اودون پارچهسنى گوستروب ديسه: «بو ايشلر طبيعى و تصادفى اولارق بوندن اولمش.» او اوستهنڭ خارقه صنعتلرينى، هنرلرينى هيچه اينديرسه؛ نه درجه بر حماقت و ضلالتده بر خرافت و هذيان اولديغى گبى؛ عينًا اويله ده:
چام و اينجير آغاجى گبى بيڭلر خارقه صنعتلرى تضمّن ايدن بر معجزۀِ قدرتى، نخود گبى ايكى چكردگى گوستروب: «بونلر بوندن اولمش» ديمك؛ ويا كُرۀِ هوايى بر قونفرانس ميدانى و زمين يوزينى بر درسخانه و بر مكتبِ عرفان حكمنه گتيرن و حدسز نعمتلرى تضمّن ايدن و حدسز شكرلر ايله مقابله ايتمك لازمكن و بشرڭ سعادتِ أبديهسندهكى إحساناتِ إلٰهيهنڭ بر معجّل (حاشيه) نمونهسى و هيچ بر شبههيى بيراقميان و طوغريدن طوغرىيه خزينۀِ رحمتدن إحسان ايديلن بر هديۀِ رحمانيهيه راديو نامنى طاقمقله، بو ألكتريق و هوانڭ تموّجاتى نامنى ويرمك ايله، او يوز بيڭ نعمتلره كفران پردهسنى چكمك، (عينًا او مثال گبى) مادّيونلرڭ و أهلِ ضلالتڭ حدسز بر ديوانهلكلريدر كه؛ حدسز بر جنايت اولوب، حدسز بر عذابه اونلرى مستحق ايدر.
___
(حاشيه): بو كلمهده بيوك بر حقيقت خزينهسنڭ آناختارينه إشارت وار.
___
ايشته قارداشلرم حقيقةً بوگون، سراج النورڭ باشندهكى مناجاتى تصحيح نيّتيله اوقودم. قوّۀِ حافظهم تام سونديگى ايچون، بردن او مناجاتڭ حقيقتلرينه قارشى (گويا سكسان ياشنده ايكن يڭى دنيايه گلمشم گبى) بردن الفت و عادتلرى بيلمييور گبى، او معلوم عادتلر پرده اولامادى. كمالِ شوق ايله تام إستفاده ايدوب اوقودم. پك خارقه گوردم. و آڭلادم كه: گيزلى دشمنلريمز بر قسم رسمى مأمورلرى آلداتوب، سراج النورڭ آخرينى بهانه ايدهرك مصادرهسنه؛ يعنى باشندهكى مناجاتڭ إنتشار ايتمهمسنه چاليشدقلرينه قناعتم گلدى. رهبردهكى هو نكتهسى گبى بو مناجات ده، سراج النوره دينسزلر طرفندن هجومنڭ بر سببيدر.
ثالثًا: سزه بتون روح و جانمزله مژده ويرييورز كه؛ نورجيلردهكى تام إخلاص و حقيقى صداقت و صارصيلماز تساند وسيلهسيله، باشمزه گلن بتون مصيبتلر، خدمتِ ايمانيهمز نقطهسنده بيوك نعمتلره چوريلمش و پرده آلتنده خاطر و خياله گلمه ين نورڭ فتوحاتلرى اولويور.
مثلا، إسپارطهدن بورايه يعنى إستانبوله محكمهيه گلمكلگم ايچون يوز بانقنوط، اوتوموبيله مجبوريتله ويريلدى. سزى تأمين ايدييورم كه؛ يالڭز بو مسئلهده و يالڭز رهبره عائد و يالڭز بنم شخصمه عائد ميدانه گلن و گلمگه باشلايان نتيجۀِ خدمته ايكى بيڭ بانقنوط ويرسه ايدم ينه اوجوز صاياجقدم. عمومه عائد نتيجهلرى ده بوڭا قياس ايديلسين.
اَلْبَاقِى هُوَ الْبَاقِى
دعاڭزه محتاج، خسته قارداشڭز
سعيد النورسى
❊ ❊ ❊