غرضڭ جهتنه أمارات ايله إشارت و علاماتڭ نصبيله قصد و عمدينى گوسترمكدر. زيرا اونده تصادف بر پاره ايتمز.
فنِّ بديعڭ و تزييناتِ لفظيهنڭ شرطى ايسه، تصادف و عدمِ قصددر. وياخود تصادفى گبى طبيعتِ معنايه ياقين اولمقدر.
تلويح: پوشيده اولماسين كه، طبيعته و حقيقتِ خارجيهيه دلالت ايدن و حُكمِ ذهنى يى قانونِ خارجى ايله ربط ايدن؛ تعبير جائز ايسه پرده يى دهلهرك، آلتندهكى حقّى گوسترن آلَتلرڭ أڭ ثقّابى (اِنَّ) ئ تحقيقيهدر. أوت شو (اِنَّ) نڭ شو خاصيتنه بناءًدر كه، قرآنده كثرتله إستعمال اولونمشدر.
تنبيه: أى برادر! بو مقالهدهكى قوانينِ لطيفه شو پريشان أساليبدن تبرّى و نفرت ايتمهسى سنى تغليط ايتمهسين. مثلا: أگر بو قانونلر ايى اولسيديلر، اونلرى