معجزهنڭ قمرينى منخسف و شمس گبى برهانِ نبوّتى سُها گبى مخفى اولماسنه سبب اولديڭز. بوڭا قياسًا شو حقيقته، شو كتابده بر چوق نمونه بولابيليرسڭ. زيرا بو كتابڭ مسلگى، بنم گبى خارجه بويقوتاژدر. حتّى ضرورت اولمازسه، أفكار و مسائلده و مثاللرده و أساليبده خارجه بويقوتاژ ايتمكدر. فقط توافقِ خاطر اولابيلير. زيرا حقيقت بردر. هانگى قپو ايله گيرسهڭ، عيننى گورهجكسڭ.
خاتمه
سويلهننه باق، سويلهينه باقمه؛ سويلهنيلمشدر... فقط بن ديرم: كيم سويلهمش؟ كيمه سويلهمش؟ نه ايچنده سويلهمش؟ نه ايچون سويلهمش؟ سويلهديگى سوزى گبى دقّت ايتمك، بلاغت نقطۀِ نظرندن لازمدر، بلكه ألزمدر.
إشارت: معلوم اولسون كه؛ فنِّ معانى و بيانڭ مزاياسنڭ بلاغتجه مهمّ بر شرطى، قصدًا و عمدًا