جسيم عروقى متشابكه، اوزون بوغوملرى متناسقه و متشعِّب داللرى متعانقه، ميوه و ثمراتى متنوّعه اولان بر شجرۀِ حقيقت سڭا تصوير ايدر. أگر ايسترسهڭ آلتنجى مسئلهيه تماشا ايت. زيرا چندان مشوّش ايسه، بر درجه بو مسئلهنڭ بر پارچهسنه مثال اولابيلير.
تنبيه و إعتذار: أى برادر! بيليرم كه شو مقاله سڭا غايت مغلق گورونويور. فقط نه چاره، مقدّمهنڭ شأنى إجمال و ايجازدر. كتبِ ثلاثهده سڭا تجلّى ايدهجكدر.
اوننجى مسئله
كلامڭ سلاستى ايسه: بر درجه حسّياتدن طفره لق و إشتباك ايتمهمك و طبيعتى تقليد و خارجه تمثّل و مسيلِ غرضده سداد و مقصد و مستقرّڭ تميّزيدر. شويله كه: كلامده حسّياتده تمام اولمادن چيفته آتمق، باشقهسيله مزج ايتمك، سلاستنى تغيير ايدر. و نظامسز إشتباكدن توقّى و معانئِ متسلسلهدن تدرّج لازمدر.