عزّتڭ كلامنه تأمّل ايت... أزجمله: ذرّهسى بيوك بر طاش قدر بيوك اولان عذابدن تخويف و إنسانى، قَلَقْ و تحمّلسز اولدقلرينى گوسترمك ايچون سَوق ايديلن (وَلَئِنْ مَسَّتْهُمْ نَفْحَةٌ مِنْ عَذَابِ رَبِّكَ) اولان آيته باق. ناصلكه «شيئى ضدّندن إنعكاس ايتديرمك» اولان قاعدۀِ بيانيهيه بناءً، تهويل و تخويف ايچون عذابڭ بر پارچهسنڭ درجۀِ تأثيرينى گوسترمك ايستديگندن، قلّت اولان أساسِ مقصده، ناصل كلامڭ هر طرفى ألنى اورايه اوزاتوب قوّت ويرييور.
شويله: (اِنْ) لفظندهكى تشكيك ايله تخفيف و (مَسَّتْ) دهكى يالڭز تماس و (نَفْحَةٌ) مادّهسنده و صيغهسنده و تنكيرندهكى تقليل و تحقير.. و (مِنْ) دهكى تبعيض و نكاله بدل (عَذَابِ) ذكرندهكى تهوين و (رَبِّكَ) دهكى ايماءِ رحمت، عمومًا تقليلى گوسترمكله، عذابى نهايت درجهده تعظيم و تهويل ايدر.