اُسلوب، كلامڭ قالبى اولديغى گبى، جمالڭ معدنى و حُلَلِ فاخرهنڭ دستگاهيدر. گويا عقلڭ بورازانى دينيلمگه شايان اولان إراده سس ايتمكله، قلبڭ قراڭلق كوشهلرنده ياتان معنالر چيپلاق، يالين آياق، باش آچيق اولارق چيقدقلرندن محلِّ صُوَرْ اولان خياله گيررلر. او خزينة الخيالده بولدقلرى صورتى گيهرلر. أڭ أقلّ بر يازمه يى صارار. ويا بر پابوجى گيهر، لا أقل بر نشان ايله چيقار. هيچ اولمازسه بر دوگمه ايله ويا بر كلمه ايله كندينڭ نرهده تربيه اولديغنى گوسترر.
أگر بر كلامڭ (فقط طبيعتدن چيقمش بر كلامڭ) اُسلوبنده إمعانِ نظر ايدرسهڭ، كندى صنعتى ايچنده ايشلهين متكلّمى او آيينهمثال اُسلوبڭ ايچنده گورهجكسڭ. حتّى نفسنى نَفَسندن و سسندن؛ ماهيتنى نفثندن (اوفورمسندن) توهّم و مزاج و صنعتنى كلاميله ممتزج تخيّل ايتسهڭ، خياليون مذهبنده معاتب اولمايورسڭ. أگر تردّد ايله سنڭ خيالڭ خستهلغى وار ايسه، قصيدۀِ بُرئيّهدن اولان: