ذهنلرينى چويروب، ألفاظ آرقهسنه قوشوب، طولاشييورلر.
معانينڭ تصوّرلرندن صوڭره ألفاظڭ آرقهسنه گيتمكله فكرلرى چتاللاشمشدر. گيده گيده ألفاظ معنايه غلبه ايتمكله إستخدام ايدهرك؛ «لفظ، معنايه خدمت ايتمك» اولان قضيۀِ طبيعيه عكسنه چوريلديگندن، طبيعتِ بلاغتدن بويله لفظپرست متصلّفلرڭ صنعتنه قدر، يوق بلكه تصنّعلرينه اوزون بر مسافه گيرمشدر. أگر ايسترسهڭ حريرى گبى بر داهيۀِ أدبڭ مقاماتنه گير، گور! او داهيۀِ أدب ناصل حبِّ لفظه مغلوب اولارق لفظپرستلك هوسى او قيمتدار أدبنى لكهدار ايتديگى گبى، لفظپرستلره ده بسطِ عذر ايتمشدر و نمونۀِ إمتثال اولمشدر. اونڭ ايچون او قوجه عبد القاهر بو خستهلغى تداوى ايتمك ايچون، دلائلِ إعجاز و أسرار البلاغتڭ بر ثلثنى اونڭ علاجلرندن طولديرمشدر. أوت لفظپرستلك بر خستهلقدر، فقط بيلينمز كه خستهلقدر...