عجميلرڭ بلاغتِ عربيهنڭ صنعتنه گيردكلرندن فكرڭ مجراىِ طبيعيسى اولان نظمِ معانيدن، ذوقِ بلاغتى نظمِ لفظه چويرمشلردر. شويله كه:
أفكار و حسّياتڭ مجراىِ طبيعيسى نظمِ معانيدر. نظمِ معانى ايسه منطقله مشيّددر. منطقڭ اسلوبى ايسه متسلسل اولان حقائقه متوجّهدر. حقائقه گيرن فكرلر ايسه، قارشيسنده اولان دقائقِ ماهياتده نافذدرلر. دقائقِ ماهيات ايسه، عالمڭ نظامِ أكملنه ممدّ و مستمِددرلر. نظامِ أكملده هر بر حُسنڭ منبعى اولان حسنِ مجرّد مندمجدر. حسنِ مجرّد ايسه مزايا و لطائف دينيلن بلاغت چيچكلرينڭ بوستانيدر. چيچكلرڭ بوستانى، جِنانِ خلقتده جلوهگر اولان، أزهاره پرستش ايدن و شاعر دينيلن بلبللرڭ نغماتيدر. بلبللرڭ نغماتنه آهنگِ روحانى ويرن ايسه، نظمِ معانيدر. حال بويله ايكن، عربدن اولميان دخيل و طُفيلى و عجميلر، بلاغتِ عربيهده اُدَبا صيرهسنه گچمگه چاليشدقلرندن، ايش چيغيردن چيقدى. زيرا بر ملّتڭ مزاجى او ملّتڭ