٦ - أوت سابقًا بيان اولونديغى گبى، جميع فنونله حاصل اولان إستقراءِ تامله ثابت اولان إنتظامِ كامل، او إنتظامى إختلالدن خلاص أيلهين و تكمّل و عمرِ أبدىيه مظهر ايدن حشرِ جسمانينڭ صدفنده اولان سعادتِ أبديه يى بِالضروره إقتضا ايدر.
٧ - أوت، ساعتڭ ثانيه و دقيقه و ساعت و گونلرى صايان چرخلرينه بڭزهين يوم و سنه و عمرِ بشر و دورانِ دنيا، بربرينه مقدّمه اولارق دونر، ايشلر. گيجهدن صوڭره صباحى، قيشدن صوڭره بهارى ايشلدكلرى گبى، موتدن صوڭره قيامت دخى او دستگاهدن چيقهجغنى خبر ويرييورلر. أوت إنسانڭ هر فردى، برر نوع گبيدر. زيرا نورِ فكر اونڭ آمالنه اويله بر وسعت ويرمش كه؛ بتون أزمانى يوتسه طوق اولماز. سائر أنواعڭ أفرادلرينڭ ماهيتى، قيمتى، نظرى، كمالى، لذّتى، ألمى ايسه جزئى و شخصى و محدود و محصور و آنيدر. بشرڭ ايسه علوى، كلّى، سرمديدر. يوم و