بر نوعى دخى: غيبدن اولان إخباراتِ كثيرهسيدر. گويا طيّار اولان روحِ مجرّدى، زمان و مكانِ معيّنڭ قيدلرينى قيرمش و حدودِ ماضيه و مستقبله يى چيگنهمش، هر طرفنى گورهرك بزه سويلهمش و گوسترمشدر.
بر قسمى دخى: تحدّى وقتنده إظهار اولونان خوارقِ حسّيهدر. بيڭه قريب تعداد اولونمشدر. ديمك سويلهديگمز گبى هر بر فردى، آحادى ده اولورسه مجموعى متواترِ بِالمعنادر.
بريسى: مبارك اولان پارمقلرندن صويڭ نبعانيدر. گويا معدنِ سخاوت اولان يدِ مباركهسندن مايۀِ حيات اولان صويڭ نبعانيله، منبعِ هدايت اولان لسانندن مايۀِ أرواح اولان زلالِ هدايتڭ فوراننى حسًّا تصوير ايدييور.
برى ده: تكلّمِ شجر و حجر و حيواندر. گويا هدايتندهكى حياتِ معنويه، جمادات و حيواناته دخى سرايت ايدهرك نطقه گتيرمشدر.