بشنجى مسلك
معروفه و مشهوره اولان خوارقِ ظاهره و معجزاتِ محسوسهدر. سِيَر و تاريخڭ كتابلرى اونلر ايله مشحوندر. علماىِ كرام (جَزَاهُمُ اللّٰهُ خَيْرًا) حقّيله تفسير و تدوين ايتمشلردر. معلومڭ تعليمى لازم گلمهمك ايچون بز تفصيلندن قطعِ نظر ايتدك.
إشارت: شو خوارقِ ظاهرهنڭ هر بر فردى أگر چندان متواتر دگلدر، مطلقا جنسلرى، بلكه چوق أنواعى قطعيًا و يقينًا متواترِ بِالمعنادر. او خوارق بر قاچ نوع اوزرندهدر. ايشته:
بر نوعى: إرهاصاتِ متنوّعهدر. گويا او عصر پيغمبردن (عصم) إستفاده و إستفاضه ايدهرك، كرامت صاحبى اولديغندن، قلبِ حسّاسندن حسِّ قبل الوقوعه بناءً إرهاصاتله، فخرِ عالمڭ گلهجگنى إخبار ايتمشدر.