وهم و تنبيه: رسولِ أكرمڭ هر بر فعل و هر بر حالنده صدق لمعان ايدر. فقط هر فعلى و هر حالى خارقه اولمق لازم دگلدر. زيرا إظهارِ خارقه تصديقِ مدّعا ايچوندر. حاجت اولماديغى ويا مناسب اولماديغى وقتده جريانِ عموميهيه متابعتله، قوانينِ عادات اللّٰهه دستهدادِ تسليم اولويور. هم ده اويله اولمق گركدر.
أى برادر!.. شو تنبيه، برنجى مسلگڭ مقدّمهسنڭ طائفهسندندر. نسيانڭ خطاسيله يولنى شاشيرمقله يرينى غيب ايدوب شورايه گيرمشدر. اييجه شو نكتهلرى طوت. ايشته نتيجهيه گيرييورز:
باق أى برادر! فنون و علومڭ زبدۀِ حقيقيهسى براهينِ عقليه اوزرينه مؤسّس اولان ديانت و شريعتِ إسلاميه اويله فنونلرى تضمّن ايتمشدر. أزجمله: فنِّ تهذيبِ روح و رياضة القلب و تربية الوجدان و تدبير الجسد و تدوير المنزل و سياسة المدنيه و نظامات العالم و فنّ الحقوق و سائره... لزوم گورولن يرلرده تفصيل و لزوم