أڭ بيوك داهى آنجق بر ويا ايكى حسّڭ ايقاظنه موفّق اولابيلمشدر. أزجمله: حسِّ حرّيت و حميت و محبّت...
بو نقطهيه بناءً جزيرة العرب صحراءِ وسيعهسنده اولان أقوامِ بدويده كامنه و نائمه و مستوره اولان حسّياتِ عاليه (كه، بيڭلره بالغدر) بردن إنكشاف، بردن ايقاظ، بردن فوران و غليانه گتيرمك؛ شمسِ حقيقتڭ، ضياءِ شُعلهفشانڭ خاصّهسيدر. بو نقطه يى عقلنه صوقميانڭ، بز جزيرة العربى گوزينه صوقهجغز. ايشته جزيرة العرب... اون اوچ عصر بشرڭ ترقّياتندن صوڭره، أڭ مكمّل فيلسوفلردن يوز دانه يى گوندرسين، يوز سنه قدر چاليشسين؛ عجبا بو زمانه نسبةً او زمانه نسبت ياپديغنڭ يوزده برينى ياپابيلير مى؟..
إشارت: كيم توفيق ايسترسه، عادت اللّٰه و خلقت و فطرت ايله آشنالق ايتمك و دوستلق ايتمك گركدر. يوقسه، فطرت توفيقسزلكله بر جوابِ ردّ ويرهجكدر.