ايشته دليلِ إختراعينڭ إجمالى... أگر آچيق اولارق مفصّلًا ايسترسهڭ قرآنڭ فردوسنه گير. زيرا هيچ بر رطب و يابس يوقدر كه؛ او تنزّهگاهده يا چيچك ويا غنجه حالنده بولونماسين. أگر أجل مساعد و مشيئت تعلّق و توفيق رفيق اولورسه، ألفاظِ قرآنيهنڭ أصدافنده شو برهانى تزيين ايدن جوهرلرى، گلهجك كتبده تفصيل ايديلهجكدر.
وهم و تنبيه: أگر سؤال ايتسهڭ: «نهدر شو طبيعت كه دائما اونڭ ايله طن طن ايدييورلر؟ نهدر شو قوانين و قُوٰى كه دائما اونلر ايله مُتَدَمْدِمْدرلر؟» جواب ويرهجگز كه: عالمِ شهادت دينيلن، جسدِ خلقتڭ عناصر و أعضاسنڭ أفعاللرينى إنتظام و ربط آلتنه آلان شريعتِ فطريۀِ إلٰهيه واردر. ايشته شو شريعتِ فطريهدر كه، «طبيعت» ويا «مطبعۀِ إلٰهيه» ايله مسمّادر. أوت طبيعت، خلقتِ كائناتده جارى اولان قوانينِ إعتباريهسنڭ مجموع و محصّلهسندن عبارتدر. ايشته قُوٰى ديدكلرى شى، هر برى شو شريعتڭ برر حكميدر.