شعورسز اولان أسبابِ طبيعيه ايسه، بو قدر حيرتفزا سلسلهلر و بو سلسلهلرى تشكيل ايدن و أفراد دينيلن دهشتأنگيز حدسز ماكينۀِ عجيبۀِ إلٰهيهنڭ تصنيع و ايجادينه عدمِ قابليتلرى جهتيله هر بر فرد و هر بر نوع، مستقلًا صانعِ حكيمڭ يدِ قدرتندن چيقديغنى إعلان و إظهار ايدييور. أوت صانعِ ذو الجلال هر شيئڭ جبههسنده حدوث و إمكان طامغهسنى قويمشدر.
تنبيه: أزليتِ مادّه و حركتِ ذرّاتدن تشكّلِ أنواع گبى امورِ باطلهيه إحتمال ويرمك، صِرف باشقه شيله نفسنى إقناع ايتمك صددنده اولديغى ايچون، او امورڭ أساسِ فاسدهسنى تبعى نظريله عدمِ دركندن نشئت ايدر. أوت نفسنى إقناع ايتمك صورتنده متوجّه اولورسه، محاليت و عدمِ معقوليتنه حكم ايدهجكدر. فرضا قبول ايتسه ده «تغافلِ عن الصّانع» سببيله حاصل اولان إضطرار ايله قبول ايدهبيلير.
تنبيه: مكرّم اولان إنسان، إنسانيتڭ جوهرى إعتباريله دائما حقّى صاتون آلمق ايسته يور و دائما