أرض هول ويا طوپ ويا فرفره ويا صاپان طاشى گبى صانعِ حكيم دستِ قدرتله دونديروب، آتمقله چويرييور. تا پارچه پارچه ايدهرك داها اييسنه تبديل ايدهجگنه نظرِ حكمتله گورهجگز. صوڭره ده سماواتدن آصيلوب، جوّدن گچهجگز. تدريجًا، بشيگمز اولان و بشرڭ ياتوب و إستراحت أيلهمسى ايچون خالقِ رحمٰن، سطحنى سروب مهيّا و ممهّد ايتمش اولان كُرۀِ أرضه اينهجگز. صوڭره ده بشر، چوجقلغندن چيقديغى گبى بشيگنى آتوب خراب ايتمكله بشرى سعادتسراىِ أبديهيه گوندريلمهسنه نظرِ دقّتله تماشا ايدهجگز. بونى تمامًا تماشا ايتديگمزدن صوڭره، زمان و مكان ايله مقيّد اولميان سيرِ روحانى ايله زمانِ ماضى قطعهسنه گيروب أبناءِ جنسمز اولان أبناءِ ماضى ايله سيّالۀِ برقيۀِ تاريخيه ايله مخابره ايدهجگز. او مغربِ إختفانڭ كوشهسنده وقوعه گلن حادثاتى اوگرنوب، اوندن فكر ايچون بر