توافق ايتمدكلرندن مَيلِ تجدّده و فكرِ ايجاده و جرئتِ تغييره سبب اولمشلردر. بو قاعده لغاتده اولديغى گبى، خيالات و معانى و حكاياتده دخى جريان ايدر. اويله ايسه هر شيئه ظاهره گوره حكم ايتمهمك گركدر. محقِّقڭ شأنى؛ غوّاص اولمق، زمانڭ تأثيراتندن تجرّد ايتمك، ماضينڭ أعماقنه گيرمك، منطقڭ ترازيسيله طارتمق، هر شيئڭ منبعنى بولمقدر. بو حقيقته بنى مطّلع ايدن، بر وقت صباوتمده آى طوتولدى. والدهمدن سؤال ايتدم. ديدى كه: «ييلان آيى يوتمش.» ديدم: «نهدن داها گورونويور؟» ديدى كه: «آسمانڭ ييلانى نيمشفّافدر.»
ايشته باق: ناصل تشبيه حقيقت اولوب حيلولتيله حقيقتِ حالى منخسف ايتمشدر. زيرا مائلِ قمر، منطقة البروج ايله رأس و ذَنَبده تقاطع ايتدكلرندن او ايكى دائرۀِ موهومهدن ايكى قوسى، ييلانڭ مرادفى اولان تنّين ايله أهلِ هيئت بر تشبيهه بناءً تسميه أيلديلر. ذاتًا آى