بشنجى مقدّمه
مجاز، علمڭ ألندن جهلڭ ألنه دوشسه حقيقته إنقلاب ايدر، خرافاته قپو آچار. شويله كه: مجازات و تشبيهات، نه وقت جهلڭ يسارِ مظلمانهسى، علمڭ يمينِ نورانيسندن قاچيروب غصب ايتسه وياخود مجاز ايله تشبيه بر اوزون عمر سورسهلر، حقيقته إنقلاب ايدهرك طراوت و زلالندن بوش اولوب، شراب ايكن سراب و نازنين و حسنا ايكن عجوزۀِ شَمْطا و قوجه قارى اولور. أوت مجاز شفّافيتيله شعلۀِ حقيقت اوندن تلمّع ايدر. فقط حقيقته إنقلابيله كثيف اولوب، حقيقتِ أصليه يى منكسف ايدر. لٰكن بو تحوّل بر قانونِ فطريدر. بوڭا شاهد ايسترسهڭ، لغاتڭ تجدّد و تغيّراتنڭ و إشتراك و ترادفڭ سرلرينه مراجعت ايت. ايى قولاق ويرسهڭ ايشيدهجكسڭ كه: سلفڭ ذوقلرينه گيدن چوق كلماتى ويا حكاياتى ويا خيالاتى ويا معانى، إختيار و زينتسز اولدقلرندن خلفڭ هوسِ شبابانهلرينه