النّاس!.. فضاده اوچان مجذوب و مسافر و متحرّك اولان كُرۀِ زمينه و جريانيله برابر مستقرّنده إستقرار ايدن شمسه و أجرامِ علويه يى بربريله باغلايان جاذبۀِ عموميهيه و فضاىِ غيرِ متناهيده دال و بوداقلرى منتشر اولان شجرۀِ خلقتدن، عناصرِ كثيرهدن اولان مناسباتِ كيميويهيه نظر و تدبّر ايديڭز؛ تا صانعِ عالمڭ عظمتنى تصوّر ايدهسڭز. وياخود: او قدر كوچكلگيله برابر بر عالمِ حيواناتِ خردهبينيه يى إستيعاب ايدن بر قطره صويه، عقلڭ خردهبينيله تماشا ايديڭز؛ تا صانعِ كائناتڭ هر شيئه قادر اولديغنى تصديق ايدهسڭز.
عجبا او حالده؛ دليل مدّعادن داها خفى و داها محتاجِ ايضاح اولماز مى ايدى؟ هم ده اونلرجه مظلم بر شيله، حقيقتى تنوير ايتمك وياخود اونلرڭ بداهتِ حسلرينه قارشى مغالطۀِ نفس گبى بر أمرِ غيرِ معقوله تكليف اولماز مى ايدى؟ حالبوكه إعجازِ قرآن پك يوكسك و پك منزّهدر كه؛ اونڭ صافى و پارلاق دامننه، إخلالِ افهام اولان غُبار قونابيلسين.