هم سنڭ چوق يورغونلغڭى دخى بيليرز. شيمدى عنصر البلاغت و إعجازڭ مفتاحى اولان ايكنجى مقالهنڭ ايچريسنه سنى گزديرمك ايسته يورم. صاقين او مقالهنڭ إغلاقِ اسلوبى و ايچنده جلوهگر اولان مسائلڭ ألبسهلرينڭ پريشانيتى، سنى تماشاسندن متنفّر ايتمهسين. زيرا إغلاق ايدن، معناسندهكى دقّت و قيمتدر. و پريشان ايدن و زينتِ ظاهريهدن مستغنى ايدن، معناسندهكى جمالِ ذاتيهسيدر.
أوت، نازلانان و إستغنا گوسترن نازنينلرڭ مَهرلرى دقّتدر. و منزللرى دخى قلبڭ سويداسيدر. بونلره گيديرديگم ألبسه، زمانڭ موداسنه مخالفدر. زيرا كرد مكتبى دينيلن يوكسك طاغلرده بيومش اولديغمدن آلاتورقه ترزيلگه آليشامدم. هم ده شخصڭ اُسلوبِ بيانى، شخصڭ تمثالِ شخصيتيدر. بن ايسه گورديگڭز ويا ايشيتديگڭز گبى، حلّى مشكل بر معمّايم...
﴿تَمَّ تَمَّ﴾