دگلدر. فقط فلسفهنڭ ياڭليشى، سلفلريمزڭ لسانلرينه گيرديگندن، بر محملِ صحيح بولمشدر. زيرا سلف، «درتدر» ديدكلرندن مراد، ظاهرًا درتدر. وياخود حقيقةً أجسامِ عُضْويه يى تشكيل ايدن مولّد الماء و مولّد الحموضه و آزوت و قاربون.. ينه درتدر.
أگر حرّ فكرسهڭ بو فلسفهنڭ شرّينه باق: ناصل أذهانى أسارتله سفالته آتمشدر. آفرين، حرّيتپرور اولان حكمتِ جديدهنڭ همّتنه كه، او مستبد حكمتِ يونانيه يى درت ديواريله زير و زبر ايتمشدر. ديمك محقّق اولدى كه: آياتڭ دلائلِ إعجازينڭ مفتاحى و أسرارِ بلاغتڭ كشّافى، يالڭز بلاغتِ عربيهنڭ معدنندندر. يوقسه فلسفۀِ يونانيهنڭ دستگاهندن دگلدر.
أى برادر!
وقتا كه كشفِ أسرار مراقى بزى شو مقامه قدر گتيردى. بز ده سنى برابر چكدك. سنى تعجيز ايتدك.