إشارت: بو تصويراتله برابر حسِّ ظاهره إستنادًا؛ ظاهر، متعصّبانه بر جمودِ باردى گوسترمك، ناصلكه بلاغتڭ حرارت و لطافتنه منافيدر. اويله ده: دليلِ صانع اولان نظامِ عالمڭ أساسى اولان حكمة اللّٰهڭ شاهدى اولان إستحسانِ عقلىيه جارح و مخالفدر. شويله مثلا: سبحان طاغنه چوق فرسخله اوزاق بر مسافهدن متوجّه اولسهڭ و ايستهسهڭ كه: سبحان سنڭ جهاتِ أربعهڭه مقابل گلسه وياخود هر جهته مقابل اولارق گورمشسڭ، بو تبديل و تبدّله لازم اولان راحت بر سببى اولان قاچ حركتِ وضعيه ايله بر قاچ آديم آتمق گبى أڭ قيصه يولى ترك و سبحان طاغى گبى دهشتلى بر جِرمِ عظيمى سنى حيرتده بيراقهجق بر دائرۀِ عظيمه يى قطع ايتمهسنى تخيّل ويا تكليف ايتمك گبى بر غايت اوزون يولى و إسراف و عبثيته عجيب بر مثالى، نظامِ عالمه أساس طوتمق، بنجه نظامه جنايت ايتمكدر. شيمدى إنصافله نظرِ حقيقتله بو تعصّبِ باردهيه باق: ناصل إستقراءِ تامّڭ شهادتيله ثابت اولان بر حقيقتِ باهرهيه