دخى دگلدر. بلكه شيشهنڭ گموشه اولان مباينتى بر إستعارۀِ بديعهنڭ قرينهسيدر. ديمك شيشه شفّافيتيله، فضّه دخى بياض و پارلاقلق حسبيله، گويا جنّتڭ قدحلرينى تصوير ايتمك ايچون ايكى نمونهدرلر كه، صانعِ رحمٰن بو عالمه گوندرمش. تا نفس و ماللريله جنّته مشترى اولانلرڭ رغباتنى تهييج و إشتهالرينى آچسين.
عينًا بونڭ گبى، (مِنْ جِبَالٍ فٖيهَا مِنْ بَرَدٍ) بر إستعارۀِ بديعه اوندن تقطّر ايدييور. او إستعارهنڭ زمينى ايسه، زمين و آسمان مابيْننده حُكمِ خيال ايله تصوّر اولونان مسابقت و رقابتڭ تخيّلى اوزرينه مؤسّسدر. مزرعهسى شويلهدر كه: زمين قار و بَرَدْ ايله تزمُّل ويا تعمّم ايدن طاغلريله و رنگارنك بساتينيله سوسلنديگى گبى، گويا اوڭا رقابةً و عنادًا آسمان دخى جبال و بساتينى آڭديران رنگارنك ايله تشكّل ايدن و طاغلره نظيرهلر ياپمق ايچون پارچه پارچه طاغيلان بلوطلريله صاريلوب جلوهگر اولويور. او طاغ گبى پارچه پارچه