ايتمكدهدرلر. بو ايسه دوران سرّيله مغلطۀِ وهميه اوزرينه مؤسّس بر لطافتِ بيانيهدر. شيمدى سَرْمَشْق اولارق ايكى مثالِ مهمّه يى بيان ايدهجگم. تا كه او منوال اوزرينه ايشليهسڭ. شويله:
﴿وَيُنَزِّلُ مِنَ السَّمَٓاءِ مِنْ جِبَالٍ فٖيهَا مِنْ بَرَدٍ ۞
وَالشَّمْسُ تَجْرٖى لِمُسْتَقَرٍّ﴾
شو ايكى آيت غايت شايانِ دقّتدرلر. زيرا ظاهره جمود، بلاغتڭ حقّنى جُحود ديمكدر. زيرا برنجى آيتده اولان إستعارۀِ بديعه، او درجه حرارتليدر كه؛ بوز گبى اولان جمودى أريتير. و بلوط گبى ظاهر پردهسنى برق گبى ييرتار. ايكنجى آيتده بلاغت او قدر مستقر و محكم و پارلاقدر كه، سيرى ايچون گونشى طورديرر.
أوّلكى آيت، (قَوَارٖيرَ مِنْ فِضَّةٍ) نظيرهسيدر. او ده اونڭ گبى بر إستعارۀِ بديعه يى تضمّن أيلهمشدر. شويله كه: جنّتڭ أوانيلرى شيشه اولماديغى گبى گوموش