قرآنِ معجز البيانڭ إخباراتِ غيبيهسى و هر عصرده شبابيتنى محافظه ايتمهسى و هر طبقه إنسانه موافق گلمهسيله حاصل اولان إعجازدر.
شو شعاعڭ «اوچ جلوه»سى وار.
برنجى جلوه: إخباراتِ غيبيهسيدر.
شو جلوهنڭ «اوچ شوقى» وار.
برنجى شوق: ماضىيه عائد إخباراتِ غيبيهسيدر.
أوت، قرآنِ حكيم بِالإتّفاق اُمّى و أمين بر ذاتڭ لسانيله، زمانِ آدمدن تا عصرِ سعادته قدر أنبيالرڭ مهمّ حالاتنى و أهمّيتلى وقوعاتنى اويله بر طرزده ذكر ايدييور كه، تورات و إنجيل گبى كتابلرڭ تصديقى آلتنده غايت قوّت و جدّيتله إخبار ايدييور. كتبِ سالفهنڭ إتّفاق ايتدكلرى نقطهلرده موافقت ايتمشدر. إختلاف ايتدكلرى بحثلرده، مصحّحانه حقيقتِ واقعهيى فصل ايدييور.
ديمك قرآنڭ نظرِ غيببينيسى، او كتبِ سالفهنڭ عمومنڭ فوقنده أحوالِ ماضيهيى گورويور كه، إتّفاقى مسئلهلرده مصدّقانه اونلرى تزكيه ايدييور. إختلافى مسئلهلرده مصحّحانه اونلره فيصل اولويور. حالبوكه قرآنڭ وقوعات و أحوالِ ماضيهيه دائر إخباراتى عقلى بر ايش دگل كه، عقل ايله إخبار ايديلسين. بلكه، سماعه متوقّف نقلدر. نقل ايسه، قرائت و كتابت أهلنه مخصوصدر. دوست و دشمنڭ إتّفاقيله قرائتسز، كتابتسز، أمانتله معروف، اُمّى لقبيله موصوف بر ذاته نزول ايدييور.
هم او أحوالِ ماضيهيى اويله بر صورتده إخبار ايدر كه، بتون او أحوالى گورور گبى بحث ايدر. چونكه اوزون بر حادثهنڭ عقدۀِ حياتيهسنى و روحنى آلير، مقصدينه مقدّمه ياپار. ديمك قرآندهكى فذلكهلر، خلاصهلر گوسترييور كه، بو خلاصه و فذلكهيى گوسترن، بتون ماضىيى بتون أحوالى ايله گورويور. زيرا بر ذاتڭ بر فنده ويا بر صنعتده متخصّص اولديغى؛ خلاصهلى بر سوزله، فذلكهلى بر صنعتجقله، او شخصلرڭ مهارت و مَلكهلرينى گوسترديگى گبى، قرآنده ذكر اولونان وقوعاتڭ خلاصهلرى و روحلرى گوسترييور كه، اونلرى سويلهين، بتون وقوعاتى إحاطه ايتمش، گورويور، (تعبير جائز ايسه) بر مهارتِ فوق العاده ايله إخبار ايدييور.
ايكنجى شوق: إستقباله عائد إخباراتِ غيبيهسيدر.
شو قسم إخباراتڭ چوق أنواعى وار. برنجى قسم، خصوصيدر. بر قسم أهلِ كشف و ولايته مخصوصدر.
مثلا: محيى الدينِ عربى (الٓمٓ ۞ غُلِبَتِ الرُّومُ) سورهسنده پك چوق إخباراتِ غيبيهيى بولمشدر. إمامِ ربّانى، سورهلرڭ باشندهكى مقطّعاتِ حروف ايله چوق معاملاتِ غيبيهنڭ إشارتلرينى و إخباراتنى گورمشدر و هكذا... علماءِ باطن ايچون قرآن، باشدن باشه إخباراتِ غيبيه نوعندندر. بز ايسه، عمومه عائد اولاجق بر قسمنه إشارت ايدهجگز. بونڭ ده پك چوق طبقاتى وار. يالڭز بر طبقهدن بحث ايدهجگز.
ايشته قرآنِ حكيم، رسولِ أكرم عليه الصلاة والسلامه دير: (حاشيه)
___
(حاشيه): بو غيبدن خبر ويرن آيتلر، پك چوق تفسيرلرده ايضاح ايديلمهسندن و أسكى حرفله طبع ايتمك نيّتى مؤلّفنه ويرديگى عجلهلك خطاسندن بوراده ايضاحسز و او قيمتدار خزينهلر قپالى قالديلر.
___
﴿فَاصْبِرْ اِنَّ وَعْدَ اللّٰهِ حَقٌّ ۞ لَتَدْخُلُنَّ الْمَسْجِدَ الْحَرَامَ اِنْ شَٓاءَ اللّٰهُ اٰمِنٖينَ مُحَلِّقٖينَ رُؤُسَكُمْ وَمُقَصِّرٖينَ لَا تَخَافُونَ ۞هُوَ الَّذٖٓى اَرْسَلَ رَسُولَهُ بِالْهُدٰى وَدٖينِ الْحَقِّ لِيُظْهِرَهُ عَلَى الدّٖينِ كُلِّهٖ ۞ وَهُمْ مِنْ بَعْدِ غَلَبِهِمْ سَيَغْلِبُونَ فٖى بِضْعِ سِنٖينَ لِلّٰهِ الْاَمْرُ ۞ فَسَتُبْصِرُ وَيُبْصِرُونَ بِاَيِّكُمُ الْمَفْتُونُ ۞ اَمْ يَقُولُونَ شَاعِرٌ نَتَرَبَّصُ بِهٖ رَيْبَ الْمَنُونِ قُلْ تَرَبَّصُوا فَاِنّٖى مَعَكُمْ مِنَ الْمُتَرَبِّصٖينَ ۞ وَاللّٰهُ يَعْصِمُكَ مِنَ النَّاسِ ۞ فَاِنْ لَمْ تَفْعَلُوا وَلَنْ تَفْعَلُوا ۞ وَلَنْ يَتَمَنَّوْهُ اَبَدًا ۞ سَنُرٖيهِمْ اٰيَاتِنَا فِى الْاٰفَاقِ وَفٖٓى اَنْفُسِهِمْ حَتّٰى يَتَبَيَّنَ لَهُمْ اَنَّهُ الْحَقُّ ۞ قُلْ لَئِنِ اجْتَمَعَتِ الْاِنْسُ وَالْجِنُّ عَلٰٓى اَنْ يَاْتُوا بِمِثْلِ هٰذَا الْقُرْاٰنِ لَا يَاْتُونَ بِمِثْلِهٖ وَلَوْ كَانَ بَعْضُهُمْ لِبَعْضٍ ظَهٖيرًا ۞ يَاْتِى اللّٰهُ بِقَوْمٍ يُحِبُّهُمْ وَيُحِبُّونَهُٓ اَذِلَّةٍ عَلَى الْمُؤْمِنٖينَ اَعِزَّةٍ عَلَى الْكَافِرٖينَ يُجَاهِدُونَ فٖى سَبٖيلِ اللّٰهِ وَلَا يَخَافُونَ لَوْمَةَ لَٓائِمٍ ۞ وَقُلِ الْحَمْدُ لِلّٰهِ سَيُرٖيكُمْ اٰيَاتِهٖ فَتَعْرِفُونَهَا ۞ قُلْ هُوَ الرَّحْمٰنُ اٰمَنَّا بِهٖ وَعَلَيْهِ تَوَكَّلْنَا فَسَتَعْلَمُونَ مَنْ هُوَ فٖى ضَلَالٍ مُبٖينٍ ۞ وَعَدَ اللّٰهُ الَّذٖينَ اٰمَنُوا مِنْكُمْ وَعَمِلُوا الصَّالِحَاتِ لَيَسْتَخْلِفَنَّهُمْ فِى الْاَرْضِ كَمَا اسْتَخْلَفَ الَّذٖينَ مِنْ قَبْلِهِمْ وَلَيُمَكِّنَنَّ لَهُمْ دٖينَهُمُ الَّذِى ارْتَضٰى لَهُمْ وَلَيُبَدِّلَنَّهُمْ مِنْ بَعْدِ خَوْفِهِمْ اَمْنًا﴾
گبى چوق آياتڭ إفاده ايتديگى إخباراتِ غيبيهدر كه، عينًا طوغرى اولارق چيقمشدر. ايشته پك چوق إعتراضات و تنقيداته معروض و أڭ كوچك بر خطاسندن طولايى دعواسنى غيب ايدهجك بر ذاتڭ لسانندن بويله تردّدسز، كمالِ جدّيت و أمنيتله و قوّتلى بر وثوقى إحساس ايدن بر طرزده بويله إخباراتِ غيبيه، قطعيًا گوسترر كه؛ او ذات، استادِ أزليسندن درس آلييور، صوڭره سويلهيور.
اوچنجى شوق: حقائقِ إلٰهيهيه و حقائقِ كونيهيه و امورِ اُخرويهيه دائر إخباراتِ غيبيهسيدر.
أوت قرآنڭ حقائقِ إلٰهيهيه دائر بياناتى و طلسمِ كائناتى فتح ايدوب و خلقتِ عالمڭ معمّاسنى آچان بياناتِ كونيهسى، إخباراتِ غيبيهنڭ أڭ مهمّيدر. چونكه او حقائقِ غيبيهيى حدسز ضلالت يوللرى ايچنده إستقامتله اونلرى گيدوب بولمق، عقلِ بشرڭ كارى دگلدر و اولاماز. بشرڭ أڭ داهى حكمالرى او مسائلڭ أڭ كوچگنه عقللريله يتيشمديگى معلومدر. هم قرآن، گوسترديگى او حقائقِ إلٰهيه و او حقائقِ كونيهيى بياندن صوڭره و صفاىِ قلب و تزكيۀِ نفسدن صوڭره و روحڭ ترقّياتندن و عقلڭ تكمّلندن صوڭره بشرڭ عقولى «صدقت» دييوب او حقائقى قبول ايدر. قرآنه «بارك اللّٰه» دير. بو قسمڭ، قسمًا اون برنجى سوزده ايضاح و إثباتى گچمشدر. تكراره حاجت قالمامشدر. امّا أحوالِ اُخرويه و برزخيه ايسه، چندان عقلِ بشر كندى باشيله يتيشهميور، گورهميور. فقط، قرآنڭ گوسترديگى يوللر ايله اونلرى گورمك درجهسنده إثبات ايدييور. اوننجى سوزده، قرآنڭ شو إخباراتِ غيبيهسى نه درجه طوغرى و حق اولديغى ايضاح و إثبات ايديلمشدر. اوڭا مراجعت ايت.
ايكنجى جلوه: قرآنڭ شبابتيدر.
هر عصرده تازه نازل اولويور گبى تازهلگنى، گنجلگنى محافظه ايدييور.
أوت قرآن، بر خطبۀِ أزليه اولارق عموم عصرلردهكى عموم طبقاتِ بشريهيه بردن خطاب ايتديگى ايچون اويله دائمى بر شبابتى بولونمق لازمدر. هم ده، اويله گورولمش و گورونويور. حتّى أفكارجه مختلف و إستعدادجه متباين عصرلردن هر عصره گوره گويا او عصره مخصوص گبى باقار، باقديرر و درس ويرر. بشرڭ آثار و قانونلرى، بشر گبى إختيار اولويور، دگيشييور، تبديل ايديلييور. فقط قرآنڭ حكملرى و قانونلرى، او قدر ثابت و راسخدر كه، عصرلر گچدكجه داها زياده قوّتنى گوسترييور.
أوت، أڭ زياده كندينه گووهنن و قرآنڭ سوزلرينه قارشى قولاغنى قپايان شو عصرِ حاضر و شو عصرڭ أهلِ كتاب إنسانلرى قرآنڭ (يَٓا اَهْلَ الْكِتَابِ يَٓا اَهْلَ الْكِتَابِ) خطابِ مرشدانهسنه او قدر محتاجدر كه، گويا او خطاب طوغريدن طوغرىيه شو عصره متوجّهدر و (يَا اَهْلَ الْكِتَابِ) لفظى (يَا اَهْلَ الْمَكْتَبِ) معناسنى دخى تضمّن ايدر. بتون شدّتيله، بتون تازهلگيله، بتون شبابتيله (يَٓا اَهْلَ الْكِتَابِ تَعَالَوْا اِلٰى كَلِمَةٍ سَوَٓاءٍ بَيْنَنَا وَبَيْنَكُمْ) صيحهسنى عالمڭ أقطارينه صاوورييور.
مثلا: شخصلر، جماعتلر، معارضهسندن عاجز قالدقلرى قرآنه قارشى؛ بتون نوعِ بشرڭ و بلكه جنّيلرڭ ده نتيجۀِ أفكارلرى اولان مدنيتِ حاضره، قرآنه قارشى معارضه وضعيتنى آلمشدر. إعجازِ قرآنه قارشى، سحرلريله معارضه ايدييور. شيمدى، شو مدهش يڭى معارضهجىيه قارشى إعجازِ قرآنى، (قُلْ لَئِنِ اجْتَمَعَتِ الْاِنْسُ وَالْجِنُّ) آيتنڭ دعواسنى إثبات ايتمك ايچون مدنيتڭ معارضه صورتيله وضع ايتديگى أساساتى و دساتيرينى، أساساتِ قرآنيه ايله قارشيلاشديرهجغز.
برنجى درجهده: برنجى سوزدن تا يگرمى بشنجى سوزه قدر اولان موازنهلر و ميزانلر و او سوزلرڭ حقيقتلرى و باشلرى اولان آيتلر، ايكى كرّه ايكى درت ايدر درجهسنده مدنيته قارشى قرآنڭ إعجازينى و غلبهسنى إثبات ايدر.
ايكنجى درجهده: اون ايكنجى سوزده إثبات ايديلديگى گبى، بر قسم دستورلرينى خلاصه ايتمكدر.
ايشته مدنيتِ حاضره، فلسفهسيله حياتِ إجتماعيۀِ بشريهده نقطۀِ إستنادى «قوّت» قبول ايدر. هدفى «منفعت» بيلير. دستورِ حياتى «جدال» طانير. جماعتلرڭ رابطهسنى «عنصريت و منفى ملّيت» بيلير. غايهسى، هوساتِ نفسانيهيى تطمين و حاجاتِ بشريهيى تزييد ايتمك ايچون بعض «لهويات»در.
حالبوكه: قوّتڭ شأنى، تجاوزدر. منفعتڭ شأنى، هر آرزويه كافى گلمديگندن اوستنده بوغوشمقدر. دستورِ جدالڭ شأنى، چارپيشمقدر. عنصريتڭ شأنى، باشقهسنى يوتمقله بسلنمك اولديغندن تجاوزدر.
ايشته شو مدنيتڭ شو دستورلرندندر كه، بتون محاسنيله برابر بشرڭ يوزده آنجق يگرميسنه بر نوع صورى سعادت ويروب سكساننى راحتسزلغه، سفالته آتمشدر.
امّا حكمتِ قرآنيه ايسه نقطۀِ إستنادى، قوّت يرينه «حقّى» قبول ايدر. غايهده، منفعت يرينه «فضيلت و رضاىِ إلٰهى»يى قبول ايدر. حياتده، دستورِ جدال يرينه «دستورِ تعاونى» أساس طوتار. جماعتلرڭ رابطهلرنده، عنصريت و ملّيت يرينه «رابطۀِ دينى و صنفى و وطنى» قبول ايدر. غاياتى، «هوساتِ نفسانيهنڭ نامشروع تجاوزاتنه سد چكوب روحى معالياته تشويق و حسّياتِ علويهسنى تطمين ايتمكدر و إنسانى كمالاتِ إنسانيهيه سَوق ايدوب إنسان ايتمكدر.»
حقّڭ شأنى ايسه، إتّفاقدر. فضيلتڭ شأنى، تسانددر. تعاونڭ شأنى، بربرينڭ إمدادينه يتيشمكدر. دينڭ شأنى أخوّتدر، إنجذابدر. نفسِ أمّارهيى گملهمكله باغلامق، روحى كمالاته قامچيلامقله سربست بيراقمهنڭ شأنى، سعادتِ داريْندر.
ايشته مدنيتِ حاضره، أديانِ سابقۀِ سماويهدن، باخصوص قرآنڭ إرشاداتندن آلديغى محاسنله برابر، قرآنه قارشى بويله حقيقت نظرنده مغلوب دوشمشدر.
اوچنجى درجه: بيڭلر مسائلندن يالڭز نمونه اولارق اوچ درت مسئلهيى گوسترهجگز. أوت قرآنڭ دستورلرى، قانونلرى، أزلدن گلديگندن أبده گيدهجكدر. مدنيتڭ قانونلرى گبى إختيار اولوب ئولومه محكوم دگلدر. دائما گنجدر، قوّتليدر. مثلا: مدنيتڭ بتون جمعياتِ خيريهلرى ايله، بتون جبّارانه شديد إنضباط و نظاماتلريله، بتون أخلاقى تربيهگاهلريله، قرآنِ حكيمڭ ايكى مسئلهسنه قارشى معارضه ايدهميوب مغلوب دوشمشلردر. مثلا:
﴿وَاَقٖيمُوا الصَّلٰوةَ وَاٰتُوا الزَّكٰوةَ ۞ وَاَحَلَّ اللّٰهُ الْبَيْعَ وَحَرَّمَ الرِّبٰوا﴾
قرآنڭ بو غلبۀِ إعجازكارانهسنى بر مقدّمه ايله بيان ايدهجگز. شويله كه:
«إشارات الإعجاز»ده إثبات ايديلديگى گبى؛ بتون إختلالاتِ بشريهنڭ معدنى بر كلمه اولديغى گبى، بتون أخلاقِ سيّئهنڭ منبعى دخى بر كلمهدر.
برنجى كلمه: «بن طوق اولايم، باشقهسى آجلقدن ئولسه بڭا نه.»
ايكنجى كلمه:«سن چاليش، بن ييهيم.»
أوت حياتِ إجتماعيۀِ بشريهده خواص و عوام، يعنى زنگينلر و فقيرلر، موازنهلريله راحتله ياشارلر. او موازنهنڭ أساسى ايسه: خواص طبقهسنده مرحمت و شفقت، آشاغيسنده حرمت و إطاعتدر. شيمدى برنجى كلمه، خواص طبقهسنى ظلمه، أخلاقسزلغه، مرحمتسزلگه سَوق ايتمشدر. ايكنجى كلمه، عوامى كينه، حسده، مبارزهيه سَوق ايدوب راحتِ بشريهيى بر قاچ عصردر سلب ايتديگى گبى؛ شو عصرده سعى، سرمايه ايله مبارزه نتيجهسى هركسجه معلوم اولان آوروپا حادثاتِ عظيمهسى ميدانه گلدى.
ايشته مدنيت، بتون جمعياتِ خيريه ايله و أخلاقى مكتبلريله و شديد إنضباط و نظاماتيله، بشرڭ او ايكى طبقهسنى مصالحه ايدهمديگى گبى، حياتِ بشرڭ ايكى مدهش يارهسنى تداوى ايدهمهمشدر.
قرآن، برنجى كلمهيى أساسندن «وجوبِ زكات» ايله قلع ايدر، تداوى ايدر. ايكنجى كلمهنڭ أساسنى «حرمتِ ربا» ايله قلع ايدوب تداوى ايدر. أوت، آيتِ قرآنيه عالم قپوسنده طوروب ربايه ياساقدر دير. «غاوغه قپوسنى قپامق ايچون بانقه قپوسنى قپايڭز» دييهرك إنسانلره فرمان ايدر. شاكردلرينه «گيرمهيڭز» أمر ايدر.
ايكنجى أساس: مدنيت، تعدّدِ أزواجى قبول ايتمييور. قرآنڭ او حكمنى كندينه مخالف حكمت و مصلحتِ بشريهيه منافى تلقّى ايدر. أوت أگر إزدواجدهكى حكمت، يالڭز قضاىِ شهوت اولسه، تعدّد بِالعكس اولمالى. حالبوكه، حتّى بتون حيواناتڭ شهادتيله و إزدواج ايدن نباتاتڭ تصديقيله ثابتدر كه؛ إزدواجڭ حكمتى و غايهسى، تناسلدر. قضاىِ شهوت لذّتى ايسه، او وظيفهيى گورديرمك ايچون رحمت طرفندن ويريلن بر اجرتِ جزئيهدر.
مادام حكمةً، حقيقةً، إزدواج نسل ايچوندر، نوعڭ بقاسى ايچوندر. ألبته، بر سنهده يالڭز بر دفعه تولّده قابل و آيڭ يالڭز ياريسنده قابلِ تلقّح اولان و أللى سنهده يأسه دوشن بر قادين، أكثرى وقتده تا يوز سنهيه قدر قابلِ تلقيح بر أركگه كافى گلمديگندن، مدنيت پك چوق فاحشهخانهلرى قبول ايتمگه مجبوردر.
اوچنجى أساس: محاكمهسز مدنيت، قرآن قادينه ثُلث ويرديگى ايچون آيتى تنقيد ايدر. حالبوكه حياتِ إجتماعيهده أكثر أحكام، أكثريت إعتباريله اولديغندن؛ أكثريت إعتباريله بر قادين، كندينى حمايه ايدهجك بريسنى بولور. أركك ايسه، اوڭا يوك اولاجق و نفقهسنى اوڭا بيراقهجق بريسيله تشريكِ مساعى ايتمگه مجبور اولور. ايشته بو صورتده بر قادين، پدرندن ياريسنى آلسه، قوجهسى نقصانيتنى تأمين ايدر. أركك، پدرندن ايكى پارچه آلسه، بر پارچهسنى تزوّج ايتديگى قادينڭ إدارهسنه ويرهجك؛ قيز قارداشنه مساوى گلير. ايشته عدالتِ قرآنيه بويله إقتضا ايدر، بويله حكم ايتمشدر. (حاشيه)
___
(حاشيه): محكمهيه قارشى و محكمهيى صوصديران لايحۀِ تمييزڭ مدافعاتندن بر پارچهدر. بو مقامه حاشيه اولمش:
«بن ده عدليهنڭ محكمهسنه ديرم كه: بيڭ اوچ يوز أللى سنهده و هر عصرده اوچ يوز أللى ميليون إنسانلرڭ حياتِ إجتماعيهسنده أڭ قدسى و حقيقتلى بر دستورِ إلٰهىيى، اوچ يوز أللى بيڭ تفسيرڭ تصديقلرينه و إتّفاقلرينه إستنادًا و بيڭ اوچ يوز أللى سنه ظرفنده گچمش أجداديمزڭ إعتقادلرينه إقتداءً تفسير ايدن بر آدمى محكوم ايدن حقسز بر قرارى، ألبته روىِ زمينده عدالت وارسه، او قرارى ردّ و بو حكمى نقض ايدهجكدر.»
___
دردنجى أساس: صنمپرستلگى شدّتله قرآن منع ايتديگى گبى، صنمپرستلگڭ بر نوع تقليدى اولان صورتپرستلگى ده منع ايدر. مدنيت ايسه، صورتلرى كندى محاسنندن صايوب قرآنه معارضه ايتمك ايستهمش. حالبوكه گولگهلى گولگهسز صورتلر، يا بر ظلمِ متحجّر ويا بر رياىِ متجسّد ويا بر هوسِ متجسّمدر كه، بشرى ظلمه و ريايه و هوايه، هوسى قامچيلايوب تشويق ايدر.
هم قرآن مرحمةً، قادينلرڭ حرمتنى محافظه ايچون، حيا پردهسنى طاقماسنى أمر ايدر. تا هوساتِ رذيلهنڭ آياغى آلتنده او شفقت معدنلرى ذلّت چكمهسينلر. آلَتِ هوسات، أهمّيتسز بر متاع حكمنه گچمهسينلر. (حاشيه) مدنيت ايسه، قادينلرى يووالرندن چيقاروب، پردهلرينى ييرتوب، بشرى ده باشدن چيقارمشدر. حالبوكه عائله حياتى، قادين أركك مابيْننده متقابل حرمت و محبّتله دوام ايدر. حالبوكه آچيق صاچيقلق، صميمى حرمت و محبّتى إزاله ايدوب عائلهوى حياتى زهرلهمشدر.
___
(حاشيه): تستّرِ نسوان حقّنده اوتوز برنجى مكتوبڭ يگرمى دردنجى لمعهسى، غايت قطعى بر صورتده إثبات ايتمشدر كه: تستّر، قادينلر ايچون فطريدر. رفعِ تستّر، فطرته منافيدر.
___
خصوصًا صورتپرستلك، أخلاقى فنا حالده صارصديغى و سقوطِ روحه سببيت ويرديگى شونڭله آڭلاشيلير: ناصلكه مرحومه و رحمته محتاج بر گوزل قادين جنازهسنه نظرِ شهوت و هوسله باقمق، نه قدر أخلاقى تخريب ايدر. اويله ده: ئولمش قادينلرڭ صورتلرينه وياخود صاغ قادينلرڭ كوچك جنازهلرى حكمنده اولان صورتلرينه هوسپرورانه باقمق، دريندن درينه حسّياتِ علويۀِ إنسانيهيى صارصار، تخريب ايدر.
ايشته شو اوچ مثال گبى بيڭلر مسائلِ قرآنيهنڭ هر بريسى، سعادتِ بشريهيى دنياده تأمينه خدمت ايتمكله برابر حياتِ أبديهسنه ده خدمت ايدر. سائر مسئلهلرى مذكور مسئلهلره قياس ايدهبيليرسڭ.
ناصل مدنيتِ حاضره، قرآنڭ حياتِ إجتماعيۀِ بشره عائد اولان دستورلرينه قارشى مغلوب اولوب قرآنڭ إعجازِ معنويسنه قارشى حقيقت نقطهسنده إفلاس ايدر. اويله ده: مدنيتڭ روحى اولان فلسفۀِ آوروپا و حكمتِ بشريهيى، حكمتِ قرآنله يگرمى بش عدد سوزلرده ميزانلرله ايكى حكمتڭ موازنهسنده، حكمتِ فلسفيه عاجزه و حكمتِ قرآنيهنڭ معجزه اولديغى قطعيتله إثبات ايديلمشدر. ناصلكه اون برنجى و اون ايكنجى سوزلرده، حكمتِ فلسفيهنڭ عجزى و إفلاسى؛ و حكمتِ قرآنيهنڭ إعجازى و غناسى إثبات ايديلمشدر، مراجعت ايدهبيليرسڭ.
هم ناصل مدنيتِ حاضره، حكمتِ قرآنڭ علمى و عملى إعجازينه قارشى مغلوب اولويور. اويله ده: مدنيتڭ أدبيات و بلاغتى ده، قرآنڭ أدب و بلاغتنه قارشى نسبتى: اوكسوز بر يتيمڭ مظلم بر حزن ايله اميدسز آغلاييشى، هم سفلى بر وضعيتده سرخوش بر عيّاشڭ ولولۀِ غناسنڭ (شرقى ديمكدر) نسبتى ايله، علوى بر عاشقڭ موقّت بر إفتراقدن مشتاقانه، اميدكارانه بر حزن ايله غناسى (شرقيسى)؛ هم ظفر ويا حربه و علوى فداكارلقلره سَوق ايتمك ايچون تشويقكارانه قصائدِ وطنيهيه نسبتى گبيدر.
چونكه أدب و بلاغت، تأثيرِ اُسلوب إعتباريله يا حزن ويرر، يا نشئه ويرر. حزن ايسه، ايكى قسمدر: يا فقد الأحبابدن گلير، يعنى أحبابسزلقدن، صاحبسزلكدن گلن قراڭلقلى بر حزندر كه؛ ضلالتآلود، طبيعتپرست، غفلتپيشه اولان مدنيتڭ أدبياتنڭ ويرديگى حزندر. ايكنجى حزن، فراق الأحبابدن گلير، يعنى أحباب وار، فراقنده مشتاقانه بر حزن ويرر. ايشته شو حزن، هدايتأدا، نورأفشان قرآنڭ ويرديگى حزندر.
امّا نشئه ايسه، او ده ايكى قسمدر: بريسى، نفسى هوساتنه تشويق ايدر. او ده تياتروجى، سينهماجى، رومانجى مدنيتڭ أدبياتنڭ شأنيدر. ايكنجى نشئه، نفسى صوصديروب، روحى، قلبى، عقلى، سرّى معالياته، وطنِ أصليلرينه، مقرِّ أبديلرينه، أحبابِ اُخرويلرينه يتيشمك ايچون لطيف و أدبلى معصومانه بر تشويقدر كه، او ده جنّت و سعادتِ أبديهيه و رؤيتِ جمال اللّٰهه بشرى سَوق ايدن و شوقه گتيرن قرآنِ معجز البيانڭ ويرديگى نشئهدر. ايشته
﴿قُلْ لَئِنِ اجْتَمَعَتِ الْاِنْسُ وَالْجِنُّ عَلٰٓى اَنْ يَاْتُوا بِمِثْلِ هٰذَا الْقُرْاٰنِ
لَا يَاْتُونَ بِمِثْلِهٖ وَلَوْ كَانَ بَعْضُهُمْ لِبَعْضٍ ظَهٖيرًا﴾
إفاده ايتديگى عظيم معنا و بيوك حقيقت، قاصر الفهم اولانلرجه و دقّتسزلكله مبالغهلى بر بلاغت ايچون محال بر صورت ظن ايديلييور. حاشا! مبالغه دگل، محال بر صورت دگل، عينِ حقيقت بر بلاغت و ممكن و واقع بر صورتدهدر.
او صورتڭ بر وجهى شودر كه؛ يعنى، قرآندن ترشّح ايتمهين و قرآنڭ مالى اولميان إنس و جنّڭ بتون گوزل سوزلرى طوپلانسه، قرآنى تنظير ايدهمز، ديمكدر. هم ايدهمهمش كه، گوستريلميور. ايكنجى وجه شودر كه: جنّ و إنسڭ حتّى شيطانلرڭ نتيجۀِ أفكارلرى و مُحَصَّلۀِ مساعيلرى اولان مدنيت و حكمتِ فلسفه و أدبياتِ أجنبيه، قرآنڭ أحكام و حكمت و بلاغتنه قارشى عاجز دركهسندهدرلر، ديمكدر. ناصل ده نمونهسنى گوستردك.
اوچنجى جلوه: قرآنِ حكيم، هر عصردهكى طبقاتِ بشرڭ هر بر طبقهسنه گويا طوغريدن طوغرىيه او طبقهيه خصوصى متوجّهدر، خطاب ايدييور.
أوت بتون بنى آدمه بتون طبقاتيله أڭ يوكسك و أڭ دقيق علم اولان ايمانه و أڭ گنيش و نورانى فن اولان معرفت اللّٰهه و أڭ أهمّيتلى و متنوّع معارف اولان أحكامِ إسلاميهيه دعوت ايدن، درس ويرن قرآن ايسه، هر نوعه، هر طائفهيه موافق گلهجك بر درس ويرمك ألزمدر. حالبوكه درس بردر، آيرى آيرى دگل. اويله ايسه، عين درسده طبقات بولونمق لازمدر. درجاته گوره هر برى، قرآنڭ پردهلرندن بر پردهدن حصّۀِ درسنى آلير. شو حقيقتڭ چوق نمونهلرينى ذكر ايتمشز. اونلره مراجعت ايديلهبيلير. يالڭز بوراده بر ايكى جزئنڭ، هم يالڭز بر ايكى طبقهسنڭ حصّۀِ فهمنه إشارت ايدرز:
مثلا: (لَمْ يَلِدْ وَلَمْ يُولَدْ ۞ وَلَمْ يَكُنْ لَهُ كُفُوًا اَحَدٌ) كثرتلى طبقه اولان عوام طبقهسنڭ شوندن حصّۀِ فهمى: «جنابِ حق، پدر و ولددن و أقراندن و زوجهدن منزّهدر.»
داها متوسّط بر طبقه، شوندن «عيسى عليه السلامڭ و ملائكهلرڭ و تولّده مظهر شيلرڭ الوهيتنى نفى ايتمكدر.» چونكه محال بر شيئى نفى ايتمك، ظاهرًا فائدهسز اولديغندن بلاغتده مدارِ فائده اولاجق بر لازمِ حكم مراد اولونور. ايشته جسمانيته مخصوص ولد و والدى نفى ايتمكدن مراد ايسه، ولد و والدى و كفوى بولونانلرڭ، نفىِ الوهيتلريدر و معبود اولمغه لايق اولمادقلرينى گوسترمكدر. شو سردندر كه، سورۀِ إخلاص هركسه، هم هر وقت فائده ويرهبيلير.
داها بر پارچه ايلرى بر طبقهنڭ حصّۀِ فهمى: «جنابِ حق موجوداته قارشى توليد و تولّدى إشمام ايدهجك بتون رابطهلردن منزّهدر. شريك و معيندن و همجنسدن مبرّادر. بلكه موجوداته قارشى نسبتى، خلاّقيتدر. «أمرِ كُنْ فَيَكُونُ» ايله، إرادۀِ أزليهسيله، إختياريله ايجاد ايدر. ايجابى و إضطرارى و صدورِ غيرِ إختيارى گبى منافئِ كمال هر بر رابطهدن منزّهدر.»
داها يوكسك بر طبقهنڭ حصّۀِ فهمى: جنابِ حق أزليدر، أبديدر، أوّل و آخردر. هيچ بر جهتده نه ذاتنده، نه صفاتنده، نه أفعالنده نظيرى، كفوى، شبيهى، مِثلى، مثالى، مثيلى يوقدر. يالڭز أفعالنده، شئوننده تشبيهى إفاده ايدن مَثل وار: (وَلِلّٰهِ الْمَثَلُ الْاَعْلٰى)
بو طبقاته؛ عارفين طبقهسى، أهلِ عشق طبقهسى، صدّيقين طبقهسى گبى آيرى آيرى حصّه صاحبلرينى قياس ايدهبيليرسڭ.
ايكنجى مثال: مثلا، (مَا كَانَ مُحَمَّدٌ اَبَٓا اَحَدٍ مِنْ رِجَالِكُمْ)
طبقۀِ اولٰىنڭ شوندن حصّۀِ فهمى شودر كه: «رسولِ أكرم عليه الصلاة والسلامڭ خدمتكارى ويا «ولدم» خطابنه مظهر اولان زيد، عزّتلى زوجهسنى كندينه كفو بولمديغى ايچون تطليق ايتمش. اللّٰهڭ أمريله رسولِ أكرم عليه الصلاة والسلام آلمش. آيت دير: «پيغمبر سزه أولادم ديسه، رسالت جهتيله سويلر. شخصيت إعتباريله پدريڭز دگل كه، آلديغى قادينلر اوڭا مناسب دوشمهسين.»
ايكنجى طبقهنڭ حصّۀِ فهمى شودر كه: بر بيوك آمر، رعيتنه پدرانه شفقتله باقار. أگر او آمر، ظاهر و باطن بر پادشاهِ روحانى اولسه، او وقت مرحمتى پدرڭ يوز دفعه شفقتندن ايلرى گيتديگندن او رعيتڭ أفرادى اونڭ حقيقى أولادى گبى اوڭا پدر نظريله باقارلر. پدر نظرى، زوج نظرينه إنقلاب ايدهمديگندن؛ قيز نظرى ده زوجه نظرينه قولايجه دگيشمديگندن، أفكارِ عامّهده پيغمبر (عصم)، مؤمنلرڭ قيزلرينى آلماسى شو سرّه اويغون گلمديگندن قرآن دير: «پيغمبر (عصم)، مرحمتِ إلٰهيه نظريله سزه شفقت ايدر، پدرانه معامله ياپار. رسالت نامنه سز اونڭ أولادى گبيسڭز. فقط شخصيتِ إنسانيت إعتباريله پدريڭز دگلدر كه، سزدن زوجه آلماسى مناسب دوشمهسين.»
اوچنجى قسم شويله فهم ايدر كه: پيغمبره (عصم) إنتساب ايدوب اونڭ كمالاتنه إستناد ايدهرك اونڭ پدرانه شفقتنه إعتماد ايدوب قصور و خطيئات ايتمهمليسڭز، ديمكدر. أوت چوقلر وار كه، بيوكلرينه و مرشدلرينه إعتماد ايدوب تنبللك ايدر. حتّى بعضًا، «نمازيمز قيلنمش» دير. (بر قسم عَلويلر گبى.)
دردنجى نكته: بر قسم شو آيتدن شويله بر إشارتِ غيبيه فهم ايدر كه: پيغمبرڭ (عصم) أولادِ ذكورى، رجال درجهسنده قالمهيوب، رجال اولارق نسلى، بر حكمته بناءً قالميهجقدر. يالڭز «رجال» تعبيرينڭ إفادهسيله، نسانڭ پدرى اولديغنى إشارت ايتديگندن، نساء اولارق نسلى دوام ايدهجكدر. فَلِلّٰهِ الْحَمْدُ حضرتِ فاطمهنڭ نسلِ مباركى، حسن و حسين گبى ايكى نورانى سلسلهنڭ بدرِ منوّرى، شمسِ نبوّتڭ معنوى و مادّى نسلنى إدامه ايدييورلر.
﴿اَللّٰهُمَّ صَلِّ عَلَيْهِ وَ عَلٰى اٰلِهِ﴾
(برنجى شعله، اوچ شعاعيله ختامه ايردى.)