إعلم أيّها العزيز! طاووس قوشى گبى پك گوزل بر قوش، يمورطهدن چيقار، تكامل ايدر، سمالرده طيرانه باشلار. آفاقِ عالمده شهرت قزاندقدن صوڭره، يرده قالان يمورطهسنڭ قابوغى ايچريسنده او قوشڭ گوزللگنى، كمالاتنى، ترقّياتنى آرايوب بولمق ايستهين آدمڭ أحمق اولديغنده شبهه يوقدر.
بناءً عليه تاريخلرڭ نقل ايتدكلرى پيغمبريمزڭ (عصم) بدايتِ حياتنه مادّى، سطحى، صورى بر نظر ايله باقان بر آدم شخصيتِ معنويهسنى إدراك ايدهمز و درجۀِ قيمتنه واصل اولاماز. آنجق بدايتِ حياتنه و لوازمِ بشريتنه و أحوالِ ظاهريهسنه اينجه بر قشر، نازك بر قابوق نظريله باقيلماليدر كه، او قشر ايچريسندن، ايكى عالمڭ گونشى و طوبٰى گبى شجرۀِ محمّديه (عصم) چيقمشدر. و فيضِ إلٰهى ايله صولانمش و فضلِ ربّانى ايله تكامل ايتمشدر.
بناءً عليه نبىِّ ذىشانڭ (عصم) مبدأِ حياتنه عائد أحوالِ صوريهسندن ضعيف بر شى ايشيدلديگى زمان اوستنده طورماملى؛ درحال باشنى قالديروب أطرافِ عالمه نشر ايتديگى نورلره باقمالى.
مع هذا مبدأِ حياتنه شك و شبهه ايله باقان آدم هر حالده مصدر ايله مظهر، منبع ايله معكس، ذاتى ايله تجلّى آرالرينى فرق ايدهمييور. و بو يوزدن شبههيه دوشر. أوت نبىِّ ذىشان (عصم) تجلّياتِ إلٰهيهيه مظهر و معكسدر؛ مصدر و منبع دگلدر. چونكه او ذات يالڭز عابددر و عبادتجه هركسدن ايلريدر. ديمك بو قدر گورونن ترقّيات، كمالات اونڭ ذاتى مالى دگلدر. آنجق خارجدن ويريلن رحمٰنِ رحيمڭ تجلّيلريدر.
أوّلجه بيان ايديلديگى گبى، هيچ بر شى، بر ذرّهيه بيله، معناىِ إسميله مصدر اولاماز. امّا بر ذرّه، معناىِ حرفيله سمانڭ ييلديزلرينه مظهر اولور. يالڭز غفلت ايله او ذرّهنڭ مصدر اولديغى ظنّيله باقيلديغندن، صنعتِ إلٰهيهيى طاغوتى بر طبيعته مال ايدرلر.
❊ ❊ ❊
إعلم أيّها العزيز! شو گورديگڭ بيوك عالمه بيوك بر كتاب نظريله باقيليرسه، نورِ محمّدى (عصم) او كتابڭ كاتبنڭ قلمنڭ مركّبيدر.
أگر او عالمِ كبير، بر شجره تخيّل ايديليرسه، نورِ محمّدى هم چكردگى، هم ثمرهسى اولور.
أگر دنيا مجسّم بر ذىحيات فرض ايديليرسه، او نور اونڭ روحى اولور.
أگر بيوك بر إنسان تصوّر ايديليرسه، او نور اونڭ عقلى اولور.
أگر پك گوزل شعشعهلى بر جنّت باغچهسى تخيّل ايديليرسه، نورِ محمّدى اونڭ عندليبى اولور.
أگر پك بيوك بر سراى فرض ايديليرسه، نورِ محمّدى او سلطانِ أزلڭ مقرِّ سلطنت و حشمتى و تجلّياتِ جماليهسيله آثارِ صنعتنى حاوى اولان او يوكسك سرايه ناظر و منادى و تشريفاتجى اولور. بتون إنسانلرى دعوت ايدييور. او سرايده بولونان بتون آنتيقه صنعتلرى، خارقهلرى و معجزهلرى تعريف ايدييور. خلقى او سراى صاحبنه، صانعنه ايمان ايتمك اوزره جاذبهدار، حيرتأفزا دعوت ايدييور.
❊ ❊ ❊
إعلم أيّها العزيز! نبوّتِ أحمديهيى إثبات ايدن دليللردن برى ده توحيددر. أوت، مراتبيله توحيد بايراغنى كائناتڭ أڭ اوست تپهسى اوستنده ديكمش اولان و أنظارِ عالمه قارشى مقاملريله برابر توحيده دلاّللق ايدن و أنبيانڭ مجمل بيراقدقلرى حقائقى تفصيلاتيله بيان ايدن و آچيقلايان آنجق و آنجق حضرتِ محمّد عليه الصلاة والسلامدر. بناءً عليه توحيدڭ حقيقت و قوّتى نسبتنده نبوّتِ أحمديه حق و حقيقتدر
❊ ❊ ❊
إعلم أيّها العزيز! كائنات بر شجرهدر. عناصر اونڭ داللريدر. نباتات ياپراقلريدر. حيوانات اونڭ چيچكلريدر. إنسانلر اونڭ ثمرهلريدر. بو ثمرهلردن أڭ ضيادار، نورلى، أحسن، أكرم، أشرف، ألطف سيّد الأنبيا و المرسلين، إمامُ المتّقين، حبيبِ ربّ العالمين حضرتِ محمّددر.
﴿عَلَيْهِ اَفْضَلُ الصَّلَوَاتِ مَادَامَتِ الْاَرْضُ وَالسَّمٰوَاتُ﴾
❊ ❊ ❊