محمّد عليه الصلاة والسلامدر. بناءً عليه توحيدڭ حقيقت و قوّتى نسبتنده نبوّتِ أحمديه (عصم) حق و حقيقتدر.
إعلم أيّها العزيز! سطحِ عالمده قورولان شو سرگئِ إلٰهيده تشهير ايديلن تزييناته، كمالاته، گوزل منظرهلره و ربوبيتڭ حشمتيله الوهيتڭ عظمتنه بر مشاهد، بر متنزّه، بر متحيّر، بر متفكّر لازمدر كه، او گوزللكلرى گورسون؛ او منظرهلر آراسنده تنزّه ايتسين؛ او خارقه نقشلره، زينتلره تفكّر ايله حيران اولسون. صوڭره او سرگيدن صانعنڭ جلالنه، مالكنڭ إقتدار و كمالاتنه إنتقال ايله اونڭ عظمتنه سجدۀِ حيرت ايتسين. بو وظيفهيى ايفا ايدهجك إنساندر. چونكه إنسان گرچه جاهل، ظلمتلى بر شيدر امّا، اويله بر إستعدادى واردر كه، عالمه بر أنموذج و بر نمونه اولمغه لياقتى واردر. هم او إنسانده اويله بر أمانت وديعه بيراقيلمشدر كه، اونڭ ايله گيزلى دفينهيى بولور، آچار. هم او إنساندهكى قوّتلر تحديد ايديلميهرك مطلق بيراقيلمشدر. بوڭا بناءً كلّى بر نوع شعور صاحبى اولور كه، سلطانِ أزلڭ عظمت و حشمتنڭ شعشعهسنى إدراك ايدييور.
أوت معشوقڭ حسنى، عاشقڭ نظرينى إستلزام ايتديگى گبى، نقّاشِ أزلينڭ ربوبيتى ده إنسانڭ نظرينى إقتضا ايدر كه، حيرت و تفكّر ايله تقدير و تحسينلرده بولونسون.
أوت گُل و چيچكلرڭ يوزلرينى گوزللشديرن ذات، ناصل او گوزل يوزلره آريلردن، بلبللردن إستحسان عاشقلرى ايجاد ايتمهسين؟ و گوزللرڭ گوزل يوزلرنده گوزللگى يارادان، ألبته او گوزللگه مشتاقلرى ده ياراتير.
كذالك بو عالمى شو قدر زينتلر ايله، نقشلر ايله تزيين ايدن مالك الملك، ألبته و ألبته او خارقه، آنتيقه، معجزه منظرهلرى، زينتلرى، سيرجيلردن، مشاهدلردن،