إعلم أيّها العزيز! خيرات و حسناتڭ حياتى نيّت ايلهدر. فسادى ده عُجب، ريا و گوستريش ايلهدر. و فطرى اولارق وجدانده شعور ايله بِالذّات حسّ ايديلن وجدانياتڭ أساسى، ايكنجى بر شعور و نيّت ايله إنقطاع بولور.
ناصلكه عمللرڭ حياتى نيّت ايلهدر. اونڭ گبى، نيّت بر جهتله فطرى أحوالڭ ئولوميدر. مثلا: تواضعه نيّت اونى إفساد ايدر، تكبّره نيّت اونى إزاله ايدر، فرحه نيّت اونى اوچورور، غم و كدره نيّت اونى تخفيف ايدر. و هكذا قياس ايت.
إعلم أيّها العزيز! كائنات بر شجرهدر. عناصر اونڭ داللريدر. نباتات ياپراقلريدر. حيوانات اونڭ چيچكلريدر. إنسانلر اونڭ ثمرهلريدر. بو ثمرهلردن أڭ ضيادار، نورلى، أحسن، أكرم، أشرف، ألطف سيّد الأنبيا و المرسلين، إمامُ المتّقين، حبيبِ ربّ العالمين حضرتِ محمّددر.
﴿عَلَيْهِ اَفْضَلُ الصَّلَوَاتِ مَادَامَتِ الْاَرْضُ وَالسَّمٰوَاتُ﴾
* * *