مهمّ بر مسئله: «أنا»نڭ ايكى وجهى واردر. بر وجهنى نبوّت آلمشدر. بر وجهنى ده فلسفه آلمشدر.

برنجى وجه، عبوديتِ محضه‌يه منشأدر. ماهيتى حرفيه اولوب، مستقل دگلدر. وجودى تبعى اولوب، أصلى دگلدر. مالكيتى وهمى اولوب، حقيقى دگلدر. وظيفه‌سى، خالقڭ صفاتنى فهم ايتمك ايچون بر ميزان و بر مقياس اولمقدر. أنبيا (عليهم السلام) أنانيتڭ بو وجهنه باقمقله، ملكى تمامًا اللّٰهه تسليم ايده‌رك نه ملكنده، نه ربوبيتنده، نه الوهيتنده شريكى اولماديغنه حكم ايتمشلردر. أنانڭ بو وجهندن جنابِ حق شجرۀِ طوباءِ عبوديتى إنبات ايدوب؛ دال و بوداقلرى كائنات باغچه‌سنده أنبيا، أوليا، صدّيقين گبى مبارك ثمره‌لرى ويرمشدر.

ايكنجى وجهى آلان فلسفه، أنانڭ وجودينى أصلى و كنديسنى مستقل و مالكِ حقيقى اولديغنى زعم ايتمشلردر. وظيفه‌سى ده يالڭز حبِّ ذاتيله تكمّلِ حياتدر. أنانڭ بو سياه يوزندن أنواعًا شركلر، ضلالتلر چيقمشدر. أزجمله: قوّۀِ بهيميه دالنده صنملر طوغمشلردر. قوّۀِ غضبيه غُصنندن فرعونلر، نمرودلر چيقمشدر. قوّۀ عقليه‌دن دهريّون، مادّيون، فلاسفه چيقمشلردر كه، واجب الوجوده بر مخلوقِ واحدى ويرر. باقى قالان ملكنى غيره تقسيم ايدرلر.

خلاصه: أنا، حدِّ ذاتنده بر هوا، بر بخار گبى ايكن، ويريلن أهمّيته گوره مايع حالنه گلير. صوڭره الفتله قالينلاشير. صوڭره غفلت و عصيان ايله اويله قالينلاشير كه، صاحبنى يوتار. خلقى، أسبابى ده كنديسنه قياس ايده‌رك خالقڭ أوامرينه مبارزه‌يه باشلار. كوچك عالمده يعنى إنسانده أنا، بيوك إنسانده يعنى كائناتده طبيعته بڭزه‌يور. ايكيسى ده طاغوتلردندر.