غيردن بحث ايدر. هم ده فى الجمله عادى شيلردن بحثى خارق العادهدر. شعرڭ خارق العادهلردن بحثى، على الأكثر عاديدر.
إعلم أيّها العزيز! خالقڭ وحدتنى گوسترن آيينهلر و دليللرينى اوقوتان صحيفهلرڭ پك چوق چشيدلرى اولديغى گبى مركزلرى بر و بربرينڭ ايچنه داخل اولمشلردر. بناءً عليه بر آيينهده گوروندى ويا بر صحيفهده اوقوندى مى، هپسنده ده گورونور و اوقونور. فقط بريسنده گورونمهمسى، هپسنده گورونمهمسنى إستلزام ايتمز.
إعلم أيّها العزيز! بر كلمهيى يازان حرفنى يازانڭ غيريسى، بر صحيفهيى يازان سطرى يازانڭ غيريسى، كتابى يازان صحيفهيى يازانڭ غيريسى اولماسى ممكن اولماديغى گبى؛ قارينجهيى خلق ايدن جنسِ حيوانى خلق ايدهنڭ غيريسى، حيوانى يارادان أرضى يارادانڭ غيريسى، أرضى خلق ايدن، ربّ العالمينڭ غيريسى اولماسى محالدر.
ربوبيتِ عامّهنڭ إشارتلرندندر كه، كائنات كتابنده اويله بيوك حرفلر واردر كه، او حرفلرڭ بر قسمنده بر كلمه يازيليدر. بر قسمنده بر كلام، بر قسمنده بر كتاب يازيليدر. مثلا: او كتابده بحر، شجر، أرض برر حرف مقامندهدرلر. برنجى حرفده سمك كلمهسى، ايكنجيسنده شجر كلامى، اوچنجيسنده حيوان كتابى يازيلمشدر. حتّى، يٰس صورتنده تام يٰس سورهسى يازيلديغى گبى، بعض مصنوعاتده، بر كلمه اولان إسمنده، چكردگنده او مصنوعڭ سورهسى و كتابى يازيلمشدر.
إعلم أيّها العزيز! ييلديزلر، شمسلر آراسنده مماثلت اولديغى گبى فى الجمله مساوات ده واردر. بناءً عليه اونلردن برى اوتهكيلره ربّ اولاماز. و اونلردن برينه ربّ اولان، هپسنه ده ربّ اولور. و كذا هر شيئه ده ربّ اولور.