بو ايكى دائره ايله ايكى لوحه آراسندهكى مناسبته باقڭز كه: عبوديت دائرهسى بتون قوّتيله ربوبيت دائرهسى حسابنه چاليشييور. تفكّر، تشكّر، إستحسان لوحهسى ده بتون إشارتلريله حسنِ صنعت و نعمت لوحهسنه باقييور. بو حقيقتى گوزڭ ايله گوردكدن صوڭره، ربوبيت و عبوديت دائرهلرينڭ رئيسلرى آراسنده أڭ بيوك بر مناسبتڭ بولونمامسنه عقلڭجه إمكان وار ميدر؟ و صانعڭ مقاصدينه كمالِ إخلاص ايله خدمت ايدن عبوديت رئيسنڭ صانع ايله عظيم بر مناسبتى و قوى بر إنتسابى و او إنتساب ايله هر ايكى دائره رئيسلرى آراسنده بر معارفه و مكالمه و آليش ويريشڭ اولمامسنه إحتمال وار ميدر؟ اويله ايسه بِالبداهه تحقّق ايتدى كه؛ عبوديت رئيسى، ربوبيتڭ خاص محبوب و مقبوليدر.
أى إنسان! بو سوسلى مصنوعاتى أنواعِ محاسنله تزيين ايدن و بتون ذىحيات اولانلرڭ ذوقلرينه، إشتهالرينه گوره بو قدر نعمتلرى إنعام ايدن صانعڭ أڭ كامل، أڭ جميل و عبادتنه كمالِ إشتياقله توجّه ايدن و صانعڭ محاسنِ صنعتنه تقدير و إستحساناتيله عرش و فرشى طَرَبه، سَوينمهيه گتيرن و صانعڭ إحساناتنه ياپديغى تشكّرات و تكبيرات ايله برّ و بحرى جذبهيه گتيرن شو گوزل مخلوق و مصنوعنه إلتفات ايدوب سوزينى نظرِ إعتباره آلمامسى و تشكّراتنه مقابله ايتمهمسى و توجّه ايدوب كنديسيله قونوشمهمسى و إقتدارينه گوره بتون مخلوقاته بر إمام و مرشد ياپمامسى إمكانى وار ميدر؟